ເຊັນສັນຍາໂຄງການກໍ່ສ້າງຫໍພັກພະນັກງານ ແຂວງໄຊສົມບູນ

ອົງການປົກຄອງ ແຂວງໄຊສົມບູນ ແລະບໍລິສັດ ແຮ່ເຫລັກ ໂກເອກໂກ ຈຳກັດຜູ້ດຽວ ໄດ້ເຊັນສັນຍາໂຄງການກໍ່ສ້າງຫໍພັກພະນັກງານດ້ວຍທຶນຊ່ວຍເຫລືອລ້າຂຶ້ນໃນຕອນບ່າຍຂອງວັນທີ 26 ທັນວາ 2022 ທີ່ຫ້ອງປະຊຸມຫ້ອງວ່າການແຂວງ ໂດຍການເຂົ້າຮ່ວມຂອງສະຫາຍ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ມີສະຫາຍ ໂງ ກວາງ ຫວຽດ ຮອງຜູ້ອຳນວຍການໃຫຍ່ ກຸ່ມບໍລິສັດຮ່ວມມືເສດຖະກິດ ໂກເອກໂກ ຈຳກັດຜູ້ດຽວ ພ້ອມດ້ວຍບັນດາພະແນກການ, ຂະແໜງການທີ່ກ່ຽວຂ້ອງ ແລະຝ່າຍບໍລິສັດຫວຽດນາມ ເຂົ້າຮ່ວມ.

ໃນພິທີ ສະຫາຍ ສົມບູນ ສອນລິດທິເດດ ຫົວໜ້າຫ້ອງວ່າການແຂວງ ໄດ້ຂຶ້ນຜ່ານຮ່າງສັນຍາໃຫ້ທຶນຊ່ວຍເຫລືອລ້າ ລະຫວ່າງ ບໍລິສັດ ແຮ່ເຫັລກ ໂກເອກໂກ ຈຳກັດຜູ້ດຽວ ແລະ ຫ້ອງວ່າການແຂວງ, ຜ່ານສັນຍາກໍ່ສ້າງ ໂຄງການກໍ່ສ້າງຫໍພັກພະນັກງານ ແຂວງໄຊສົມບູນ ຊຶ່ງການກໍ່ສ້າງຫໍພັກພະນັກງານ ເປັນອາຄານ 3 ຊັ້ນ, ເນື້ອທີ່ການກໍ່ສ້າງ 2,864 ແມັດ, ມີ 42 ຫ້ອງ ແລະ ຕິດພັນກັບພຶ້ນຖານໂຄ່ງລ່າງເຕັກນິກເຊັ່ນ: ປະຕູໂຂງ, ຮົ້ວກຳແພງ, ເດີ່ນພາຍໃນ, ອ່າງນໍ້າເສຍ, ລະບົບໄຟຟ້າ ແລະລະບົບນໍ້າປະປາ ມີມູນຄ່າທັງໝົດ 30 ຕື້ດົ້ງ, ໄລຍະເວລາໃນການກໍ່ສ້າງ 12 ເດືອນນັບແຕ່ເດືອນ ທັນວາ ປີ 2022 ຫາ ເດືອນທັນວາ 2023 ( 1ປີ ). ພ້ອມດຽວກັນນັ້ນ ສະຫາຍ ໂງ ກວາງ ຫວຽດ ຮອງຜູ້ອຳນວຍການໃຫຍ່ ກຸ່ມບໍລິສັດຮ່ວມມືເສດຖະກິດ ໂກເອກໂກ ຈຳກັດຜູ້ດຽວ ໄດ້ຂຶ້ນມີຄຳເຫັນ ໃນໄລຍະຜ່ານມາໄດ້ຮັບຄວາມເອົາໃຈໃສ່ ຈາກອຳນາດການປົກຄອງແຂວງ ແລະ ປະຊາຊົນແຂວງໄຊສົມບູນ ຕະຫລອດມາ ພ້ອມທັງຊ່ວຍສ້າງເງື່ອນໄຂສະດວກໃນການປະຕິບັດໜ້າທີ່ວຽກງານ ໃຫ້ບັນລຸຕາມເປົ້າໝາຍ, ໃນການໃຫ້ທຶນຊ່ວຍເຫລືອກໍ່ສ້າງຫໍພັກພະນັກງານໃນຄັ້ງນີ້ ກໍເພື່ອຢາກສ້າງເງື່ອນໄຂສະດວກໃຫ້ກັບຄອບຄົວພະນັກງານ ແຂວງໄຊສົມບູນ ໄດ້ມາພັກອາໄສ ແລະ ມີຄວາມສະດວກໃນການຈັດຕັ້ງປະຕິບັດວຽກງານ. ຈາກນັ້ນ ສະຫາຍ ຫງວຽນ ວັນ ນາມ ຜູ້ອຳນວຍການ ບໍລິສັດກໍ່ສ້າງ ໂກເອກໂກລາວ ຈຳກັດຜູ້ດຽວ ຂຶ້ນມີຄຳເຫັນ ຊຶ່ງສະຫາຍສັນຍາວ່າຈະຈັດຕັ້ງການກໍ່ສ້າງຕາມເງື່ອນໄຂທີ່ລະບຸໄວ້ໃນສັນຍາໃຫ້ສຳເລັດ, ຮັບປະກັນຄວາມປອດໄພ, ຄຸນນະພາບ ແລະ ມີຄວາມຄືບໜ້າ ໃຫ້ທ່ວງທັນໃນການນຳໃຊ້ ແລະ ຊຸກຍູ້ການສະໜອງແຫລ່ງທຶນໃຫ້ໄວທີ່ສຸດ. ໃນໂອກາດທີ່ມີຄວາມໝາຍນີ້ ສະຫາຍ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ໄດ້ມີຄຳເຫັນໂອ້ລົມ ຊຶ່ງໃນໄລຍະຜ່ານມາ ພັກ ແລະ ລັດຖະບານຫວຽດນາມ ໄດ້ຊ່ວຍເຫລືອແຂວງໄຊສົມບູນຫລາຍໂຄງການເຊັ່ນ: ໂຮງຮຽນ, ໂຮງໝໍ, ສະຖານີວິທະຍຸ-ໂທລະພາບແຂວງ, ຊົນລະປະທານຂະໜາດນ້ອຍ ແລະ ບໍລິສັດ ແຮ່ທາດ ແລະຫລອມໂລຫະວຽງຈັນ ຈຳກັດຜູ້ດຽວ ໄດ້ຊຸກຍູ້ປະຊາຊົນສົ່ງເສີມກະສິກຳໃຫ້ກາຍເປັນສິນຄ້າ ໂດຍການປູກມັນສາຄູ ແລະ ເປັນໂຄງການກໍ່ສ້າງທີ່ມີຄວາມໝາຍຄວາມສຳຄັນໃຫຍ່ຫລວງ ທີ່ຈະຊ່ວຍໃຫ້ພະນັກງານ-ລັດຖະກອນ ມີບ່ອນພັກພາອາໄສ, ອຸ່ນອ່ຽນທຸ່ນທ່ຽງໃນການປະຕິບັດໜ້າທີ່ຕາມການມອບໝາຍ, ພ້ອມທັງໃຫ້ການຈັດຕັ້ງດຳເນີນການກໍ່ສ້າງໂຄງການ ແບບມີເຕັກນິກ, ມີຫົວຄິດປະດິດສ້າງ ເຮັດໃຫ້ໂຄງການສຳເລັດຕາມກຳນົດເວລາ ແລະສາມາດນຳໃຊ້ໄດ້ຢ່າງມີປະສິດທິຜົນສູງ.

ຈາກນັ້ນທັງສາມຝ່າຍ ກໍໄດ້ລົງນາມເຊັນສັນຍາໂຄງການກໍ່ສ້າງຫໍພັກພະນັກງານ ລະຫວ່າງ ອົງການປົກຄອງແຂວງ ຕາງໜ້າລົງນາມເຊັນໂດຍ ສະຫາຍ ສົມບູນ ສອນລິດທິເດດ ຫົວໜ້າຫ້ອງວ່າການແຂວງ ກັບ ຜູ້ໃຫ້ທຶນຊ່ວຍເຫລືອລ້າສະຫາຍ ຮວ່າງ ວັນ ຖ່າຍ ຜູ້ອຳນວຍການບໍລິສັດແຮ່ເຫັລກ ໂກເອກໂກ ຈຳກັດຜູ້ດຽວ ແລະ ຜູ້ຮັບເໝົາໂຄງການກໍ່ສ້າງ ສະຫາຍ ຫງວຽນ ວັນນາມ ຜູ້ອຳນວຍການບໍລິສັດກໍ່ສ້າງ ໂກເອກໂກ ຈຳກັດຜູ້ດຽວ ໂດຍຊ້ອງໜ້າ ສະຫາຍ ເລຂາພັກແຂວງ, ຄະນະນຳຂອງແຂວງ, ພະແນກການ ແລະພະຍານທັງສາມຝ່າຍເປັນສັກຂີພິຍານ.
_________
ບກ: ຄຳສາວ ເລືອງຄຳທິບ
ພາບ-ຂ່າວ: ສີລິພອນ ສົງຄຳ

แชร์