ງານເທດສະອາຫານລາວກ້າວສູ່ສາກົນ ຊຶ່ງຈະຈັດຂຶ້ນໃນເດືອນມັງກອນ ປີ 2023

ພິທີຖະແຫລງຂ່າວງານເທສະການອາຫານລາວປະຈຳປີ 2023 ພາຍໃຕ້ຄໍາຂວັນ: “ເທດສະການອາຫານລາວກ້າວສູ່ສາກົນ (Promoting Lao to International recognition), ຈັດຂຶ້ນໃນວັນທີ 26 ທັນວາ 2022 ໂດຍສູນກາງສະຫະພັນແມ່ຍິງລາວ ແລະ ສະມາຄົມນັກທຸລາວກິດແມ່ຍິງ, ໂດຍການເຂົ້າຮ່ວມຂອງທ່ານ ມະໂນ ທອງວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະການຄ້າ, ທ່ານ ນາງ ລາວັນ ສຸດທິສານ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ແລະ ທ່ານ ດາວວັນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດ ພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ປະທານຄະນະບໍລິຫານງານສະມາຄົມນັກທຸລະກິດແມ່ຍິງ ທັງເປັນປະທານ ກຳມະການຈັດງານເທສະການອາຫານລາວປະຈຳປີ 2023 ກ່າວວ່າ: ງານເທສະການອາຫານລາວ ແມ່ນໄດ້ຈັດ ຂຶ້ນໃນທຸກໆປີຜ່ານມາ, ເຊິ່ງໃນປີນີ້ເປັນຄັ້ງທີ 19 ຂອງປີ 2023 ທີ່ຈະເປີດງານຢ່າງເປັນທາງການໃນວັນທີ 24-28 ມັງກອນ 2023 ເປັນເວລາ 5 ວັນ ທີ່ເພິ່ນສວນເຈົ້າອານຸວົງແຄມຂອງນະຄອນຫລວງວຽງຈັນ,ເພື່ອສືບຕໍ່ຊຸກຍູ້- ສົ່ງເສີມແມ່ຍິງຜູ້ຜະລິດ, ຜູ້ປູກຝັງ, ລ້ຽງສັດ, ຮ້ານອາຫານ, ຮ້ານຂາຍຍ່ອຍສິນຄ້າກະສິກຳ ຈາກ 18 ແຂວງທ້ອງ ຖິ່ນຕ່າງໆ ລວມທັງນະຄອນຫລວງວຽງຈັນໄດ້ມາວາງສະແດງ ແລະຂາຍຜະລິດຕະພັນຂອງແຕ່ລະແຂວງພ້ອມທັງອຳນວຍຄວາມສະດວກໃຫ້ຜູ້ປະກອບການແມ່ຍິງໄດ້ສ້າງເຄືອຂ່າຍການຄ້າຢ່າງກວ້າງຂວາງເພື່ອໂຄສະນາກ້າວສູ່ຕະຫລາດສາກົນໃຫ້ນັບມື້ຫລາຍຂຶ້ນ ແລະ ຂົ້າສູ່ຕະຫລາດ E-Commerce ເທື່ອລະກ້າວ. ນອກນີ້ກໍເພື່ອສົ່ງເສີມວັດທະນະທຳ, ຫັດຖະກຳລາວເຊິ່ງຢູ່ຄູ່ກັບວັດທະນະທຳທາງດ້ານອາຫານລາວໃຫ້ມີການພັດທະນາຂຶ້ນໄປເລື້ອຍໆ.

ໃນງານປີ 2023 ທີ່ຈະເຖິງນີ້ມີຮ້ານອາຫານລາວ, ອາຫານປະຍຸກ ແລະອາຫານນານາຊາດມາວາງຂາຍເຖິງ 180 ຮ້ານ, ໃນນັ້ນອາຫານເອກະລັກຈາກທຸກແຂວງໃນທົ່ວປະເທດ ແລະ ຈາກຜູ້ສະໜັບສະໜູນງານລວມ 162 ຮ້ານ, ຂາຍເຄື່ອງຫັດຖະກຳ ແລະກະສິກຳ 18 ຮ້ານ. ຊຶ່ງທັງນີ້ແມ່ນໄດ້ວາງຄາດໝາຍວ່າຈະມີເງິນໝູນໃນງານປີ 2023 ນີ້ ປະມານ 3-4 ຕື້ກີບ.

ສຳລັບກິດຈະກຳໃນງານຈະມີການສະແດງສິລະປະ ແລະເດີນແບບອາພອນເພດຊົງລາວໃນຕອນແລງວັນທີ 24 ແລະ 28 ມັງກອນ 2023; ຈັດໃຫ້ມີການໂຄສະນາຜະລິດຕະພັນຂອງບໍລິສັດ ແລະ ພາກສ່ວນທີ່ສະໜັບສະໜູນ ງານເທດສະການອາຫານເທິງເວທີເປັນປະຈຳທຸກວັນ ແລະ ຈັດໃຫ້ມີການໄລ້ສົດການຂາຍອາຫານເຊິ່ງເປັນ ອາຫານຍອດນິຍົມ ຂອງແຕ່ລະແຂວງ; ຈັດການແຂ່ງຂັນປຸງແຕ່ງເຂົ້າສັງຂະຫຍາແບບດັ້ງເດີມຂອງລາວເຮົາ; ຈັດ ໃຫ້ມີໂຕະຕັ່ງໄວ້ຄອຍບໍລິການແຂກຜູ້ເຂົ້າມາທ່ຽວງານນັ່ງກິນອາຫານໄວ້ໃນຜາມກາງຂອງງານ; ທຸກແລງຈະມີນັກຮ້ອງຮັບເຊີນເພື່ອສ້າງບັນຍາກາດ; ມີຕາງໜ້າຜູ້ສະໜັບສະໜູນນຳພາມວນຊົນຫລິ້ນເກມເພື່ອແຈກລາງວັນຈາກຄະນະຈັດງານ.

ໂອກາດນີ້, ທ່ານຮອງລັດຖະມົນຕີ ກະຊວງອຸດສາຫະກຳ ແລະການຄ້າ ມີຄຳເຫັນວ່າ: ວຽກງານອາຫານ ແລະເຄື່ອງດື່ມແມ່ນວຽກງານໜຶ່ງທີ່ພັກ ແລະລັດຖະບານ ໄດ້ເອົາໃຈໃສ່ໃນການຊຸກຍູ້ສົ່ງເສີມເລື້ອຍໆມາ ແລະ ໃຫ້ ຄວາມສຳຄັນໃນການສົ່ງເສີມສິນຄ້າລາວ ແລະອາຫານລາວເຂົ້າສູ່ຕະຫລາດພາຍໃນ ແລະຕ່າງປະເທດ, ໂດຍ ເມື່ອບໍ່ດົນມານີ້ກໍໄດ້ມີພໍ່ຄົວຊື່ດັງລະດັບໂລກ ທ່ານ Gordon Ramsay ໄດ້ຍົກຍ້ອງໃຫ້ປະເທດລາວເປັນຈຸດມຸ່ງໝາຍທາງດ້ານອາຫານອັນດັບຕົ້ນໆຂອງໂລກ, ເຊິ່ງເພິ່ນກໍໄດ້ມາທ່ອງທ່ຽວໃນປະເທດລາວ ແລະໄດ້ມີໂອກາດເດີນທາງໄປແຂວງຕ່າງໆ, ສຳພັດການໃຊ້ຊີວິດຢູ່ເຂດຊານເມືອງ ແລະ ໄດ້ຍົກຍ້ອງວ່າປະເທດລາວງົດງາມຫລາຍ. ພ້ອມດຽວກັນ, ທ່ານໄດ້ກ່າວຄຳໜຶ່ງກ່ຽວກັບອາຫານລາວວ່າ: “ອາຫານລາວແຊບເກີນຄຳ ບັນຍາຍ” (Lao Food is off the chartsl) ສະແດງໃຫ້ເຫັນວ່າອາຫານລາວເປັນທີ່ຍອມຮັບ ແລະ ເປັນທີ່ຮູ້ຈັກ ກັນຢ່າງກວ້າງຂວາງໃນຕ່າງປະເທດ ແລະ ເຊື່ອໝັ້ນວ່າໃນງານເທດສະການອາຫານລາວທີ່ໃກ້ຈະຈັດຂຶ້ນໃນມໍ່ໆ ນີ້ຈະເປັນເວທີອັນສຳຄັນທີ່ຊ່ວຍຊຸກຍູ້ການພັດທະນາຂະແໜງການອາຫານລາວ, ໂດຍສະເພາະການອອກແບບ ແລະການຕົບແຕ່ງອາຫານພື້ນເມືອງລາວເຮົາທີ່ມີເອກະລັກ, ມີຄວາມແຊບ ແລະດີຕໍ່ສຸຂະພາບຢູ່ແລ້ວໃຫ້ກາຍເປັນເມນູທີ່ມີຄວາມໂດດເດັ່ນ, ການຕົບແຕ່ງສວຍງາມຍິ່ງຂຶ້ນ, ຖືກຕາຕ້ອງໃຈຄົນຕ່າງປະເທດ, ມີການ ພັດທະນາຍີ່ຫໍ້ ແລະສ້າງຊື່ສຽງໂດ່ງດັງໃຫ້ແກ່ອາຫານລາວໃນເວທີສາກົນເທື່ອລະກ້າວ.

แชร์