ເຈົ້າແຂວງເຊກອງ ລົງຊີ້ນໍາວຽກງານຄຸ້ມຄອງດ່ານສາກົນດາກຕະອອກ

ແຫລ່ງຂ່າວແຂວງເຊກອງໃຫ້ຮູ້ວ່າ: ໃນວັນທີ 23 ທັນວາ 2022, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ລົງເຄື່ອນໄຫວຊຸກຍູ້ວຽກງານ ແລະ ຕິດຕາມການເປີດທົດລອງນໍາໃຊ້ສາງຄ່ຽນຖ່າຍຕິດສັ່ງ ແລະເກັບມ້ຽນສິນຄ້າຢູ່ດ່ານສາກົນດາກຕະອອກ. ພ້ອມນີ້, ທ່ານໄດ້ຊີ້ນໍາຫລາຍບັນຫາສໍາຄັນໃຫ້ຄະນະຄຸ້ມຄອງ ແລະ ໜ່ວຍງານຕ່າງໆພາຍໃນດ່ານສາກົນດາກຕະອອກສືບຕໍ່ປະຕິບັດເພື່ອອໍານວຍຄວາມສະດວກໃຫ້ຜູ້ໃຊ້ບໍລິການມີຄວາມສະດວກ, ວ່ອງໄວ ແລະມີປະສິດທິຜົນດີຂຶ້ນ.

ພ້ອມນີ້, ທ່ານ ເຫລັກໄຫລ ສີວິໄລ ຍັງໄດ້ເນັ້ນໃຫ້ສືບຕໍ່ສຶກສາອົບຮົມການເມືອງແນວຄິດພະນັກງານ, ສະມາຊິກພັກໃຫ້ເປັນປົກກະຕິຕໍ່ເນື່ອງຕິດພັນກັບການປັບປຸງ, ກໍ່ສ້າງໜ່ວຍພັກ ແລະ ຂະ ຫຍາຍການຈັດຕັ້ງພັກ, ປັບປຸງແບບແຜນການນໍາພາ ແລະ ແບບແຜນວິທີເຮັດວຽກໃຫ້ມີຄຸນນະພາບດີຂຶ້ນ, ເປັນເຈົ້າການຕິດຕາມ, ກວດກາ ແລະ ຄຸ້ມຄອງຄົນເຂົ້າ-ອອກເມືອງ, ການຂົນສົ່ງ, ການສົ່ງອອກ-ນໍາເຂົ້າສິນຄ້າ ແລະການບໍລິການອື່ນໆ ໃຫ້ມີຄວາມສະດວກ, ວ່ອງໄວ ແລະດີຂຶ້ນເປັນກ້າວໆ.

ໃນໂອກາດດຽວກັນນີ້, ຄະນະພັກ-ຄະນະຄຸ້ມຄອງດ່ານ ກໍໄດ້ລາຍງານກ່ຽວກັບການເຄື່ອນໄຫວວຽກງານ ແລະ ການໃຫ້ບໍລິການດ້ານຕ່າງໆພາຍໃນດ່ານຕະຫລອດໄລຍະຜ່ານມາ ໂດຍສະເພາະການເປີດທົດລອງນໍາໃຊ້ສາງຄ່ຽນຖ່າຍຕິດສັ່ງ, ເກັບມ້ຽນສິນຄ້າ, ການຄຸ້ມຄອງການຂົນສົ່ງສິນຄ້າ ແລະວຽກງານອື່ນໆ ເພື່ອຊອກໃຫ້ເຫັນຜົນງານດ້ານດີ, ດ້ານອ່ອນ, ຂໍ້ສະດວກ, ຂໍ້ຫຍຸ້ງຍາກ ແລະວິທີການແກ້ໄຂ, ທັງນີ້ ກໍເພື່ອແນໃສ່ເຮັດໃຫ້ການບໍລິການໃນຕໍ່ໜ້າມີຄວາມສະດວກ, ວ່ອງໄວ, ຖືກຕ້ອງຕາມລະບຽບກົດໝາຍ ແລະສ້າງຄວາມເພິ່ງພໍໃຈແກ່ຜູ້ໃຊ້ບໍລິການ.
ຂ່າວ-ພາບ: ສັນຍາ

• 26/12/2022