ກະຊວງຍຸຕິທຳປະກາດຜູ້ຄວບຄຸມຊັບສິນ

ກະຊວງຍຸຕິທຳໄດ້ຈັດພິທີປະກາດຜູ້ຄວບຄຸມຊັບສິນ ແລະແຈກຢາຍສື່ໂຄສະນາກົດໝາຍວ່າດ້ວຍການຟື້ນຟູ ແລະລົ້ມລະລາຍຂອງວິສາຫະກິດຂຶ້ນໃນວັນທີ 26 ທັນວານີ້ທີ່ໂຮງແຮມຄຣາວພຣາຊານະຄອນຫຼວງວຽງຈັນໂດຍການເປັນປະທານ ແລະມອບປຶ້ມບັນຊີຜູ້ຄວບຄຸມຊັບສິນຂອງທ່ານເກດສະໜາພົມມະຈັນຮອງລັດຖະມົນຕີກະຊວງຍຸຕິທຳ, ມີບັນດາຮອງຫົວໜ້າກົມກົດໝາຍ, ມີພາກສ່ວນກ່ຽວຂ້ອງແລະແຂກຖືກເຊີນເຂົ້າຮ່ວມ.


ທ່ານ ແສງຕາວັນ ວົງປະເສີດ ຮອງຫົວໜ້າກົມກົດໝາຍໄດ້ຂຶ້ນຜ່ານຂໍ້ຕົກລົງຂອງທ່ານລັດຖະມົນຕີກະຊວງຍຸຕິທຳວ່າດ້ວຍການແຕ່ງຕັ້ງເປັນຜູ້ຄວບຄຸມຊັບສິນສະບັບເລກທີ 1475/ກຍ, ລົງວັນທີ 21 ຕຸລາ 2022 ຊຶ່ງມີຈຳນວນ 28 ທ່ານເປັນຍິງ 10 ທ່ານໃນຊຸດທີ I ຊຶ່ງພວກກ່ຽວມີສິດເຄື່ອນໄຫວວິຊາຊີບຜູ້ຄວບຄຸມຊັບສິນຕາມກົດໝາຍແລະລະບຽບການທີ່ກ່ຽວຂ້ອງ.

ທ່ານເກດສະໜາພົມມະຈັນໄດ້ມີຄໍາເຫັນແລະໃຫ້ທິດຊີ້ນໍາຕໍ່ຜູ້ຄວບຄຸມຊັບສິນວ່າ: ກົດໝາຍວ່າດ້ວຍການຟື້ນຟູແລະການລົ້ມລະລາຍຂອງວິສາຫະກິດແມ່ນໄດ້ຮັບການຈັດຕັ້ງປະຕິບັດຊຶ່ງເຫັນໄດ້ການເຮັດສໍາເລັດໃນການສ້າງເປັນຜູ້ຄວບຄຸມຊັບສິນແລະໄປພ້ອມໆກັບການສ້າງຜູ້ພິພາກສາເພື່ອແກ້ໄຂບັນຫາລົ້ມລະລາຍຂອງວິສາຫະກິດ; ການເຄື່ອນໄຫວວິຊາຊີບຜູ້ຄວບຄຸມຊັບສິນຍັງເປັນວຽກໃໝ່ແລະທ້າທາຍຫຼາຍໃນຂະບວນການຟື້ນຟູແລະການລົ້ມລະລາຍຂອງວິສາຫະກິດຊຶ່ງເປັນຂີດໝາຍອັນໃໝ່ໃຫ້ສປປລາວຜູ້ຄວບຄຸມຊັບສິນທຸກຄົນຕ້ອງເຄື່ອນໄຫວວິຊາຊີບຂອງຕົນດ້ວຍຄວາມໂປ່ງໃສ, ສັດຊື່, ບໍລິສຸດໃຈ, ທ່ຽງທໍາ, ຖືຜົນປະໂຫຍດຂອງວິສາຫະກິດລູກໜີ້ແລະເຈົ້າໜີ້ເປັນຫຼັກ, ຮັກສາຄວາມລັບຂອງວິສາຫະກິດລູກໜີ້, ເຈົ້າໜີ້ແລະບຸກຄົນອື່ນທີ່ກ່ຽວຂ້ອງ, ປະຕິບັດກົດໝາຍແລະລະບຽບການຢ່າງເຂັ້ມງວດ;ຕ້ອງຮັບປະກັນໃນການປະຕິບັດໜ້າທີ່ໃນການແກ້ໄຂຊ່ວຍເຫຼືອວິສາຫະກິດທີ່ຢູ່ໃນສະພາວະລົ້ມລະລາຍຫຼືໃກ້ຈະຢູ່ໃນສະພາວະລົ້ມລະລາຍໃຫ້ມີຄວາມເປັນເອກະພາບ, ມີຄວາມຖືກຕ້ອງ, ມີຄວາມວ່ອງໄວຮັບປະກັນຜົນປະໂຫຍດອັນຊອບທໍາຂອງເຈົ້າໜີ້, ວິສາຫະກິດລູກໜີ້ແລະບຸກຄົນອື່ນທີ່ກ່ຽວຂ້ອງ;ຕ້ອງເຄື່ອນໄຫວວຽກງານຂອງຕົນດ້ວຍຄວາມເອົາໃຈໃສ່, ຄວາມບໍລິສຸດໃຈ, ຢູ່ພາຍໃຕ້ການຊີ້ນໍາແລະຄຸ້ມຄອງ ຂອງກະຊວງຍຸຕິທໍາ, ສານປະຊາຊົນແລະມີຄວາມຮັບຜິດຊອບຕໍ່ການເຄື່ອນໄຫວວຽກງານຂອງຕົນທີ່ລະເມີດກົດໝາຍແລະລະບຽບການອື່ນຊຶ່ງພາໃຫ້ມີຄວາມເສຍຫາຍເກີດຂຶ້ນ, ຕ້ອງມີການສະຫຼຸບລາຍງານທຸກການເຄື່ອນໄຫວແລະສະພາບການຕ່າງໆຢ່າງເປັນປະຈໍາ.
( ຂ່າວ-ພາບ: ວັນເພັງ)

แชร์