ຈະລາຈອນ ອອກຂໍ້ຫ້າມສຳລັບຜູ້ຂັບຂີ່ພາຫານະໃນໄລຍະປີໃໝ່ສາກົນ 2023

ກົມຕຳຫຼວດຈະລາຈອນກະຊວງປ້ອງກັນຄວາມສະຫງົບ (ປກສ) ໄດ້ອອກແຈ້ງການແລະຂໍ້ຫ້າມສຳລັບຜູ້ຂັບຂີ່ພາຫານະໃນໄລຍະສະເຫຼີມສະຫຼອງປີໃໝ່ສາກົນ 2023 ເພື່ອເຮັດໃຫ້ການສະເຫຼີມສະຫຼອງສົ່ງທ້າຍປີເກົ່າ - ຕ້ອນຮັບປີໃໝ່ສາກົນ 2023 ມີຄວາມສະຫງົບ, ເປັນລະບຽບຮອບຮ້ອຍ ແລະ ມີຄວາມປອດໄພ.

ທ່ານ ພັອ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນກະຊວງປ້ອງກັນຄວາມສະຫງົບໄດ້ຖແຫຼ່ງຂ່າວຕໍ່ສື່ມວນຊົນໃນວັນທີ 26 ທັນວາ ນີ້ກ່ຽວກັບການກຽມຄວາມພ້ອມວຽກງານປ້ອງກັນ, ສະກັດກັ້ນອຸບັດເຫດຈະລາຈອນທາງບົກ ໃນໄລຍະການເສີມສະຫຼອງສົ່ງທ້າຍປີເກົ່າ - ຕ້ອນຮັບປີໃໝ່ສາກົນ 2023ທີ່ຈະມາເຖິງນີ້ວ່າ:ເພື່ອຮັບປະກັນໃຫ້ການສະເຫຼີມສະຫຼອງສົ່ງທ້າຍປີເກົ່າ - ຕ້ອນຮັບປີໃໝ່ສາກົນ 2023 ມີຄວາມສະຫງົບ, ຄວາມເປັນລະບຽບຮອບຮ້ອຍ ແລະ ປອດໄພໃນການສັນຈອນ ໄປ - ມາ ປາສະຈາກໄດ້ປະກົດການຫຍໍ້ທໍ້ ແລະ ຫຼຸດຜ່ອນຜົນເສຍຫາຍຈາກການເກີດອຸບັດເຫດ, ສະນັ້ນທຸກໆພາກສ່ວນໃນສັງຄົມໃຫ້ເປັນເຈົ້າການ ໃນການປະຕິບັດກົດຈະລາຈອນທາງບົກ, ການຂັບຂີ່ຢ່າງເຂັ້ມງວດ ແລະ ໃຫ້ຄວາມຮ່ວມມືກັບເຈົ້າໜ້າທີ່ຕຳຫຼວດຈະລາຈອນ ໃນການຈັດຕັ້ງປະຕິບັດໜ້າທີ່ ການປ້ອງກັນສະກັດກັ້ນອຸບັດເຫດການຈະລາຈອນທາງບົກ, ປາສະຈາກຜົນເສຍຫາຍທາງດ້ານຊີວິດ, ສຸຂະພາບ ແລະຊັບສິນ ທີ່ເກີດຈາກອຸບັດເຫດຈະລາຈອນທາງບົກໃຫ້ຫຼຸດລົງ.

ກົມຕຳຫຼວດຈະລາຈອນ ຈຶ່ງໄດ້ອອກແຈ້ງການເຖິງ: ປະຊາຊົນ, ພະນັກງານ, ທະຫານ, ຕໍາຫຼວດ ແລະ ຜູ້ໃຊ້ລົດ - ໃຊ້ຖະໜົນ ກ່ຽວກັບການປ້ອງກັນ, ສະກັດກັ້ນອຸບັດເຫດ ໃນໄລຍະສະເຫຼີມສະຫຼອງ ປີໃໝ່ສາກົນ2023 ມີດັ່ງນີ້:1. ຜູ້ຂັບຂີ່ລົດຕ້ອງກຽມຄວາມພ້ອມດ້ານສຸຂະພາບຮ່າງກາຍ, ເອກະສານຂອງຜູ້ຂັບຂີ່ພາຫະນະ ໃຫ້ຄົບຊຸດຕາມລະບຽບການ ເຊັ່ນ: ໃບຂັບຂີ່, ໃບທະບຽນ, ໃບກວດກາເຕັກນິກ, ຄ່າທາງ, ປະກັນໄພ, ແລະໃບອະນຸຍາດດຳເນີນທຸລະກິດສຳລັບລົດຂົນສົ່ງສິນຄ້າ ແລະ ລົດໂດຍສານ; 2. ຜູ້ຂັບຂີ່ລົດຈັກ ຕ້ອງໃສ່ໝວກກັນກະທົບ ທັງຜູ້ຂັບ ແລະ ຜູ້ຊ້ອນທ້າຍ (ຖ້າການລະເມີດທີ່ມີຄວາມສ່ຽງຈະພາໃຫ້ເກິດອຸບັດເຫດ ເຈົ້າໜ້າທີ່ຈະໄດ້ກັກພາຫະນະໄວ້) ເພື່ອຄວາມປອດໄພຂອງຜູ້ຂັບຂີ່; 3. ຜູ້ຂັບຂີ່ລົດໃຫຍ່ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພໃຫ້ແກ່ຜູ້ຂັບຂີ່ ແລະ ຜູ້ໂດຍສານ; 4. ກ່ອນຈະນຳໃຊ້ພາຫະນະຕ້ອງກວດສະພາບເຕັກນິກ ແລະ ຄວາມພ້ອມຂອງພາຫະນະ ໃຫ້ມີຄວາມຮັບປະກັນເປັນຢ່າງດີ; 5. ລົດຂົນສົ່ງໂດຍສານທາງໄກ ຕ້ອງມີໂຊເຟີສຳຮອງ ທຸກຄັ້ງໃນເວລາເດີນທາງ; 6. ສະເພາະເສັ້ນທາງດ່ວນ, ການໃຊ້ຄວາມໄວສູງສຸດບໍ່ໃຫ້ເກີນ 120 km/ຊົ່ວໂມງ ແລະ ຄວາມໄວຕໍ່າສຸດບໍ່ໃຫ້ຫຼຸດ80 km/ຊົ່ວໂມງ (ເຈົ້າໜ້າທີ່ຕຳຫຼວດຈະໄດ້ຈັບຄວາມໄວຜ່ານກ້ອງວົງຈອນປິດ); 7. ຜູ້ຂັບຂີ່ພາຫະນະຕ້ອງເຄົາລົບ ແລະ ປະຕິບັດຕາມກົດລະບຽບຈະລາຈອນທາງບົກ ຢ່າງເຂັ້ມງວດ.

ສຳລັບຂໍ້ຫ້າມສຳລັບຜູ້ຂັບຂີ່ພາຫະນະມີດັ່ງນີ; 1. ຫ້າມຜູ້ຂັບຂີ່ພາຫະນະ ນຳໃຊ້ໂທລະສັບ ໃນເວລາຂັບຂີ່ ຢ່າງເດັດຂາດ; 2. ຫ້າມຜູ້ຂັບຂີ່ດື່ມສິ່ງມືນເມົາ (ເມົາຫ້າມຂັບຂີ່ລົດ) ຢ່າງເດັດຂາດ ຖ້າຫາກກວດກາພົບເຫັນ ເຈົ້າໜ້າທີ່ຕຳຫຼວດຈະລາຈອນຈະໄດ້ກັກໄວ້, ຊ່ວງເມົາແລ້ວຈຶ່ງອະນຸຍາດໃຫ້ໄປ ຫຼື ໃຫ້ຍາດພີ່ນ້ອງໝູ່ຄູ່ມາຮັບເອົາ ເພື່ອຮັບປະກັນຄວາມປອດໄພ;3. ຫ້າມຂັບຂີ່ລົດຄວາມໄວເກີນກົດໝາຍກຳນົດ (ສຳລັບລົດຂົນສົ່ງໂດຍສານ ຫ້າມແລ່ນໄວເກີນ 80 Km/h ຕາມທາງຫຼວງ ສະເພາະຢູ່ເຂດນອກເມືອງ); 4. ຫ້າມຂັບຂີ່ພາຫະນະ ເປັນພືງເປັນແພ, ຊ່ວງຊີງກັນຕາມເສັ້ນທາງ ຢ່າງເດັດຂາດ; 5. ຫ້າມນຳໃຊ້ລົດກະບະບັນທຸກຄົນໂດຍສານ ໃສ່ກະບະລົດ ຢ່າງເດັດຂາດ; 6. ຫ້າມນຳໃຊ້ລົດຂົນສົ່ງໂດຍສານ ແລະ ລົດບັນທຸກສິນຄ້າ, ບັນທຸກສິນຄ້າເກີນກຳນົດ ແລະ ຊ່ວງຊີງເອົາຜູ້ໂດຍສານ; 7. ຫ້າມຜູ້ປົກຄອງປະປ່ອຍໃຫ້ເດັກນ້ອຍ ທີ່ອາຍຸບໍ່ເຖິງກະສຽນ ຂັບຂີ່ພາຫະນະຢ່າງເດັດຂາດ; 8. ຫ້າມຈອດລົດຕາມເສັ້ນທາງດ່ວນ ຢ່າງເດັດຂາດ (ຍົກເວັ້ນກໍລະນີພາຫະນະເປ່ເພ); 9. ຖ້າບຸກຄົນໃດທີ່ລະເມີດຕໍ່ກົດຈະລາຈອນທາງບົກ ຈະຖືກສຶກສາອົບຮົມ ແລະ ປັບໃໝຕາມລະບຽບກົດໝາຍຢ່າງເຂັ້ມງວດ; 10. ສ່ວນການສະເຫຼີມສະຫຼອງປີໃໝ່ ແມ່ນໃຫ້ຈັດຕັ້ງປະຕິບັດຕາມແຈ້ງການ ອໍານາດການປົກຄອງທ້ອງຖິ່ນ ຂອງຕົນທີ່ໄດ້ກຳນົດໄວ້.

ສຳລັບການເກີດອຸບັດເຫດ ໃນໄລຍະການສະເຫຼີມສະຫຼອງປີໃໝ່ສາກົນ 2022 ທີ່ຜ່ານມາດັ່ງນີ້:ໃນໄລຍະການສະເຫຼີມສະຫຼອງປີໃໝ່ສາກົນ 2022 ທີ່ຜ່ານມາມີອຸບັດເຫດຈະລາຈອນທາງບົກ ເກີດຂຶ້ນທັງໝົດຈຳນວນ 197 ລາຍ, ພາຫະນະເປ່ເພ ຈຳນວນ 315 ຄັນ, ຄົນໄດ້ຮັບບາດເຈັບ ຈຳນວນ 297 ຄົນ, ຄົນເສຍຊີວິດ ຈໍານວນ 43 ຄົນ ຍິງ 7 ຄົນ, ສ້າງຜົນເສຍຫາຍທາງດ້ານຊີວິດ, ສຸຂະພາບ, ຊັບສິນຂອງລັດ, ຂອງບຸກຄົນ, ລວມໝູ່ ແລະຂອງປະຊາຊົນບັນດາເຜົ່າຢ່າງມະຫາສານ.

ສາເຫດຕົ້ນຕໍທີ່ພາໃຫ້ເກີດອຸບັດເຫດຈະລາຈອນທາງບົກໃນໄລຍະປີໃໝ່ສາກົນ 2022 ທີ່ຜ່ານມາເປັນຕົ້ນແມ່ນ 2 ສາເຫດ ຄື:1. ສາເຫດດື່ມສິ່ງມຶນເມົາແລ້ວຂັບຂີ່ລົດ ຈຳນວນ 64 ລາຍ, ກວມເອົາ 32,48%, 2. ສາເຫດຂັບຂີ່ພາຫະນະຄວາມໄວເກີນກົດໝາຍກຳນົດ ຈຳນວນ 87 ລາຍ, ກວມເອົາ 44,16 %.
ຂ່າວ-ຮູບບຸນຕອມ.

แชร์