ກອງປະຊຸມຄົບຄະນະບໍລິຫານງານພັກ ຄະນະໂຄສະນາອົບຮົມສູນກາງພັກ

ກອງປະຊຸມຄົບຄະນະບໍລິຫານງານພັກຄະນະໂຄສະນາອົບຮົມສູນກາງພັກ (ຄອສພ) ເປີດກວ້າງ ຄັ້ງທີ 4 ສະໄໝ ທີ V ແລະ ດຳເນີນຊີວິດການເມືອງຂອງອົງຄະນະພັກ ໂຄສະນາອົບຮົມສູນກາງພັກໄດຈັດຂຶ້ນໃນວັນທີ 26 ທັນວານີ້ທີ່ ຄອສພ ໂດຍການເປັນປະທານຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກມີບັນດາຄະນະບໍລິຫານງານພັກ, ເລຂາໜ່ວຍພັກ, ບັນດາຫົວໜ້າພະແນກເຂົ້າຮ່ວມ.​

ກອງປະຊຸມຄັ້ງນີ້ໄດ້ຜ່ານບົດສະຫຼຸບວຽກງານຄະນະໂຄສະນາອົບຮົມສູນກາງພັກ 1 ປີຜ່ານມາ ແລະທິດທາງແຜນການ ປີ 2023, ຜ່ານບົດສຳຫຼວດຕີລາຄາຊີ້ນຳ-ນຳພາຂອງຄະນະບໍລິຫານງານ ຄອສພ ໄລຍະ 1 ປີຜ່ານມາ ແລະຜ່ານທິດທາງແຜນການໃນປີ 2023.

ສະຫາຍ ນາງ ວິລະວອນ ພັນທະວົງ ຄະນະປະຈຳພັກຮອງຫົວໜ້າຄະນະໂຄສະນາອົບຮົມສູນກາງພັກໄດ້ສະຫຼຸບລາຍງານວຽກງານໂຄສະນາອົບຮົມ ປີ 2022 ແລະ ທິດທາງວຽກງານຈຸດສຸມ ປີ 2023 ໄດ້ຍົກໃຫ້ເຫັນວ່າ: ໃນ 1 ປີຜ່ານມາຄະນະພັກແຕ່ລະຂັ້ນໄດ້ສືບຕໍ່ເປັນເຈົ້າການຈັດຕັ້ງເຊື່ອມຊຶມມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ບັນດາມະຕິກອງປະຊຸມຄົບຄະນະບໍລິຫານງານສູນກາງພັກສະໄໝ XI ຂອງພັກ, ບັນດານິຕິກຳຂອງສູນກາງພັກ ແລະ ຂອງອົງການລັດ ອັນພົ້ນເດັ່ນແມ່ນໄດ້ຈັດຕັ້ງເຊື່ອມຊຶມເອກະສານປີສາມັກຄີລາວ-ຫວຽດນາມ ພ້ອມທັງຈັດກິດຈະກຳຢູ່ທັງສູນກາງ ແລະທ້ອງຖິ່ນທົ່ວປະເທດ ແລະເຊື່ອມຊຶມເອກະສານສຳຄັນອື່ນໆ, ໄດ້ເອົາໃຈໃສ່ເຄື່ອນໄຫວວຽກງານໂຄສະນາຜ່ານສື່ໂດຍໄດ້ເປັນເຈົ້າການຂຽນບົດອອກວິທະຍຸໃນຫົວຂໍ້: ເຂົ້າໃຈມະຕິກອງປະຊຸມໃຫຍ່ ຄັ້ງທີ XI ຂອງພັກຈັດຕັ້ງປະຕິບັດໃຫ້ເປັນຈິງເປັນລາຍການຂອງຄະນະໂຄສະນາອົບຮົມສູນກາງພັກ ແລະໄດ້ອອກອາກາດໃນສະຖານີວິທະຍຸກະຈາຍສຽງແຫ່ງຊາດ ແລະສະຖານີວິທະຍຸກອງທັບ.​

ນອກຈາກນີ້, ຍັງໄດ້ປະກອບສ່ວນຢ່າງຕັ້ງໜ້າໃນການຂຽນບົດຂ່າວ, ບົດຄວາມ, ບົດກາບກອນລົງໃນສື່ສິ່ງພິມຕ່າງໆຈໍານວນໜຶ່ງ. ຄະນະໂຄສະນາອົບຮົມຂັ້ນທ້ອງຖິ່ນ ກໍຄືກົມໂຄສະນາຂັ້ນກະຊວງ-ອົງການຈໍານວນໜຶ່ງ ໄດ້ມີລາຍ ການວິທະຍຸ ເພື່ອໂຄສະນາປຸກລະດົມພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ຢູ່ພາຍໃນກົມກອງກໍຄືທ້ອງຖິ່ນຂອງຕົນ ໃຫ້ຮັບຮູ້ເຂົ້າໃຈ ແລະ ເປັນເຈົ້າການເຂົ້າຮ່ວມພາລະກິດການປົກປັກຮັກສາ ແລະ ສ້າງສາພັດທະນາກົມກອງ, ທ້ອງຖິ່ນຕົນ ຕາມແນວທາງນະໂຍບາຍຂອງພັກ-ລັດ ກໍຄືຄະນະພັກຂັ້ນຂອງຕົນວາງອອກ, ໄດ້ລົງເຄື່ອນໄຫວເກັບກໍາຂໍ້ມູນ ແລະ ຖ່າຍທໍາຕົວແບບວຽກດີຄົນເດັ່ນເພື່ອສ້າງເປັນສາລະຄະດີ ກ່ຽວກັບການຜະລິດກະສິກໍາຂາຍເປັນສິນຄ້າ, ຂຽນເນື້ອໃນບົດສາລະຄະດີໃຫ້ກະຊວງ- ອົງການ, ພ້ອມນັ້ນໄດ້ເຄື່ອນໄຫວໂຄສະນາ ສາຍສາລະຄະດີຢູ່ທ້ອງຖິ່ນໄດ້ຈໍານວນໜຶ່ງ,ໄດ້ສ້າງເນື້ອໃນເອກະສານປາຖະກະຖາ ປີສາມັກຄີລາວ-ຫວຽດນາມ, ພ້ອມທັງຈັດພິທີສະເຫຼີມສະຫຼອງປີສາມັກຄີລາວ-ຫວຽດນາມ, ອອກຄໍາແນະນໍາ ໃຫ້ກະຊວງ-ອົງການ ແລະ ທ້ອງຖິ່ນໃນທົ່ວປະເທດຈັດຕັ້ງເຊື່ອມຊຶມ,ປັບປຸງເນື້ອໃນເອກະສານປາຖະກະຖາວັນສໍາຄັນຂອງຊາດຂອງພັກ ແລະ ສາກົນ, ອອກແຈ້ງການແນະນໍາໃຫ້ບັນດາກະຊວງ-ອົງການ ແລະ ທ້ອງຖິ່ນໃນທົ່ວປະເທດຈັດຕັ້ງການໂຄສະນາ-ປາຖະກະຖາວັນສໍາຄັນດັ່ງກ່າວ,ພ້ອມທັງສະຫຼຸບສັງລວມການຈັດປາຖະກະຖາວັນສໍາຄັນຕ່າງໆ ຂອງຊາດ, ຂອງພັກ ແລະ ສາກົນຈາກການລາຍງານຂອງບັນດາກະຊວງ-ອົງການ ແລະ ທ້ອງຖິ່ນ, ສົມທົບກັບກະຊວງ, ອົງການ, ແຂວງ, ເມືອງ ຈັດຝຶກອົບຮົມວຽກງານໂຄສະນາ-ປາຖະກະຖາໃຫ້ພະນັກງານການນຳ,ພະນັກງານຫຼັກແຫຼ່ງຂອງພາກສ່ວນກ່ຽວຂ້ອງໄດ້ຫຼາຍສົມຄວນ, ສ້າງ ແລະ ປັບປຸງເອກະສານຝຶກອົບຮົມຄວາມຮູ້ພື້ນຖານດ້ານການເມືອງ-ການປົກຄອງ ແລະການສ້າງບ້ານພັດທະນາ;ເອກະສານອົບຮົມການເມືອງ-ແນວຄິດໃຫ້ແກ່ສະມາຊິກພັກ, ພະນັກງານ, ລັດຖະກອນ ແລະ ປະຊາຊົນບັນດາເຜົ່າ, ປັບປຸງຄືນເອກະສານອົບຮົມຜູ້ຊົງຄຸນວຸດທິບັນດາເຜົ່າ; ເອກະສານອົບຮົມປະຊາຊົນລຽບຕາມຊາຍແດນ; ເອກະສານ ອົບຮົມຄູສອນວິຊາສັງຄົມ-ການເມືອງ, ສົມທົບກັບສະຖາບັນຄົ້ນຄວ້າວິທະຍາສາດການສຶກສາກະຊວງສຶກສາທິການ ແລະ ກິລາ, ປັບປຸງຫຼັກສູດວິຊາຄຸນສົມບັດ, ຂຽນເນື້ອໃນບົດວິທະຍາສາດ ໃນຫົວຂໍ້“ຄຸນສົມບັດສິນທໍາປະຕິວັດຂອງປະທານ ໄກສອນ ພົມວິຫານ, ຫົວຂໍ້: ໄກສອນ ພົມວິຫານ ປ່ຽນແປງໃໝ່, ເນື້ອໃນ ແລະ ຮູບການດໍາເນີນວຽກງານແນວຄິດ-ທິດສະດີ ຂອງພັກ, ສົມທົບກັບຄະນະໂຄສະນາອົບຮົມຂັ້ນທ້ອງຖິ່ນ ແລະສຶກສາແຂວງຈັດຝຶກອົບຮົມຄູສອນວິຊາສັງຄົມ-ການເມືອງ, ອົບຮົມຄວາມຮູ້ພື້ນຖານດ້ານການເມືອງ-ການປົກຄອງ ແລະການສ້າງບ້ານພັດທະນາ, ອົບຮົມຜູ້ຊົງຄຸນວຸດທິບັນດາເຜົ່າໄດ້ຫຼາຍພໍສົມຄວນ.
(ຂ່າວ-ພາບ: ສຳນານ)

แชร์