ປະທານອົງການກວດກາແຫ່ງລັດຊີ້ແຈງຕໍ່ຄຳຊັກຖາມຂອງບັນດາ ສສຊ

ທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ ໄດ້ຊີ້ແຈງຕໍ່ຄຳຊັກຖາມຂອງບັນດາສະມາຊິກສະພາແຫ່ງຊາດ(ສສຊ) ແລະ ຄະນະປະຈຳສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດຊຸດທີ IX ໃນວັນທີ 23 ທັນວາ 2022 ໂດຍສະເພາະບັນຫາການກວດກາຍົກເວັ້ນພາສີອາກອນກ່ຽວກັບການນຳເຂົ້ານໍ້າມັນເຊື້ອໄຟ, ການກວດກາບ້ວງເງິນຊົດເຊີຍ ຜູ້ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ, ກວດກາການປະຕິຮູບ ທະນາຄານທຸລະກິດ ແລະວິສາຫະກິດລັດ, ນັບທັງການດຳເນີນມາດຕະການແກ້ໄຂຜົນກະທົບໃນຜົນການກວດກາຕາມຜົນການກວດສອບ.

ປະທານອົງການກວດກາແຫ່ງລັດ ໄດ້ຊີ້ແຈງວ່າ: ສຳລັບການກວດກາຍົກເວັ້ນພາສີອາກອນການນຳເຂົ້ານໍ້າມັນເຊື້ອໄຟແມ່ນໄດ້ມີການດຳເນີນການແລ້ວ ແຕ່ມາຮອດປັດຈຸບັນຍັງບໍ່ທັນໄດ້ຄຳຕອບທີ່ແນ່ ນອນ ເຫດຜົນເນື່ອງຈາກບັນຫາດັ່ງກ່າວນີ້ ໄດ້ມີການປະສານກັບພາກສ່ວນທີ່ກ່ຽວຂ້ອງ ຜູ້ທີ່ອະນຸມັດໃຫ້ນຳເຂົ້າ, ຜູ້ທີ່ອະນຸມັດໃຫ້ຍົກເວັ້ນ ແລະກະຊວງກ່ຽວຂ້ອງ, ແຕ່ພາກສ່ວນດັ່ງກ່າວກໍຍັງບໍ່ທັນໄດ້ສະໜອງເອກະສານ ຫລືຂໍ້ມູນໃຫ້ອົງການກວດກາເທື່ອເຊິ່ງພວກເຮົາຈະສືບຕໍ່ປະຕິບັດວຽກທີ່ສະພາແຫ່ງຊາດ ໄດ້ມອບໃຫ້ທີ່ຍັງຄ້າງ ໃນປີ 2023 ນີ້. ສ່ວນການກວດກາບ້ວງເງິນຊົດເຊີຍ ຜູ້ໄດ້ຮັບຜົນກະທົບຈາກ ໂຄງ ການກໍ່ສ້າງເສັ້ນທາງລົດໄຟ ລາວ-ຈີນ ຕາມຕົວເລກທີ່ອົງການກວດກາແຫ່ງລັດ ໄດ້ຕິດຕາມເຊິ່ງມີຜູ້ໄດ້ຮັບຜົນກະທົບທັງໝົດ 6.855 ຄອບຄົວ, ມູນຄ່າທີ່ຈະຕ້ອງໄດ້ຊົດເຊີຍທັງໝົດ 1.948 ຕື້ກວ່າກີບ, ມາຮອດປັດຈຸບັນ ໄດ້ຊົດເຊີຍສຳເລັດແລ້ວ 5.837 ຄອບຕົວ, ມູນຄ່າ 1.483 ຕື້ກີບ, ຍັງຄ້າງ 1.018 ຄອບຄົວ ມູນຄ່າ 232,86 ຕື້ກີບ; ການຊົດເຊີຍໃຫ້ແກ່ຜູ້ຖືກຜົນກະທົບ ຍັງບໍ່ທັນສະຫລຸບຂາດຕົວໄດ້ເທື່ອກຳລັງປະຕິບັດ ແລະຍັງມີຂໍ້ມູນຜົນກະທົບດ້ານທີ່ດິນ ແລະ ສິ່ງປຸກສ້າງຈຳນວນໜຶ່ງຍັງບໍ່ທັນຈະແຈ້ງຍັງຕົກລົງມູນຄ່າການຊົດເຊີຍບໍ່ທັນໄດ້ໂດຍສະເພາະຜົນກະທົບໃນການກໍ່ສ້າງທາງເຂົ້າສູ່ສະຖານີລົດໄຟ ຢູ່ 4 ແຂວງ ແລະນະຄອນຫລວງວຽງຈັນ; ຖ້າລົງເກັບກຳຄືນມູນຄ່າຊົດເຊີຍ ອາດຈະຫລາຍກວ່ານີ້ເພາະຜົນກະທົບຫລາຍອັນທີ່ຍັງບໍ່ທັນໄດ້ຄິດໄລ່ເຊິ່ງຈະໄດ້ປຶກສາຫາລືກັນຄືນໃໝ່. ສ່ວນການແກ້ໄຂຜົນກະທົບຕໍ່ປະຊາຊົນທີ່ຕິດພັນກັບໂຄງການ ກໍ່ສ້າງເສັ້ທາງລົດໄຟລາວ-ຈີນ, ອົງການກວດກາແຫ່ງລັດ ໄດ້ມອບໃຫ້ກະຊວງໂຍທາທິການ ແລະ ຂົນສົ່ງ ຊີ້ນຳຄະນະຄຸ້ມຄອງ ປະສານງານກັບພາກສ່ວນທີ່ກ່ຽວຂ້ອງ ເພື່ອແກ້ໄຂຕໍ່ໄປ.

ຕໍ່ບັນຫາການກວດກາການປະຕິຮູບທະນາຄານທຸລະກິດ ແລະວິສາຫະກິດລັດອົງການກວດກາແຫ່ງລັດຍັງຢູ່ໃນຂັ້ນຕອນການປະສານກັບພາກສ່ວນທີ່ກ່ຽວຂ້ອງເປັນຕົ້ນ ກຳມາທິການສະພາແຫ່ງຊາດ ແລະກະຊວງທີ່ກ່ຽວຂ້ອງ ເພື່ອເອກະພາບໃນການດຳເນີນການແກ້ໄຂໃນຂັ້ນຕໍ່ໄປ ເຊິ່ງໃນເບື້ອງຕົ້ນ ພວກເຮົາໄດ້ແລກປ່ຽນຄຳຄິດເຫັນ ກັບທ່ານປະທານສະພາແຫ່ງຊາດແລ້ວຍັງມີຫລາຍອັນທີ່ຈະຕ້ອງໄດ້ປະສານງານກັນຄືນໃໝ່ ໃຫ້ລະອຽດ. ເຖິງຢ່າງໃດກໍຕາມ ໃນເວລາດຳເນີນການກວດກາ ເຫັນໄດ້ຂໍ້ຫຍຸ້ງຍາກໂດຍສະເພາະແມ່ນການສະໜອງຂໍ້ມູນ, ເອກະສານຂອງພາກສ່ວນທີ່ກ່ຽວຂ້ອງຍັງຊັກຊ້າ, ບໍ່ຊັດເຈນ ແລະຍັງບໍ່ຄົບຖ້ວນເປັນຕົ້ນການກຳນົດຂອບ ຫລືປີ ຂອງການຍົກເວັ້ນພາສີອາກອນບໍ່ແຈ້ງສະນັ້ນ, ເຮັດໃຫ້ການເອົາຂໍ້ມູນເອກະສານທີ່ກ່ຽວຂ້ອງແມ່ນພົບຄວາມຫຍຸ້ງຍາກເຊິ່ງໃນຕໍ່ໜ້າອົງການກວດກາແຫ່ງລັດຈະສືບຕໍ່ປະສານກັບກຳມາທິການແຜນການການເງິນ ແລະ ອົງການກວດສອບ ເພື່ອເອກະພາບດ້ານເນື້ອໃນທີ່ຈະໃຫ້ອົງການກວດກາແຫ່ງລັດດຳເນີນການກວດກາ. ສຳລັບການດຳເນີນມາດຕະການແກ້ໄຂຜົນກະທົບໃນຜົນການກວດກາຕາມຜົນການກວດສອບໃຫ້ມີຄວາມເຂັ້ມງວດ ເດັດຂາດ ແລະ ທັນການຕາມກົດໝາຍວ່າດ້ວຍການກວດກາລັດ ໂດຍສະເພາະແມ່ນການປະຕິບັດວິໄນ ຕໍ່ຫົວໜ້າອົງການກວດກາທີ່ກ່ຽວຂ້ອງຂອງເປົ້າໝາຍທີ່ກວດກາຕາມມາດຕາ 24 ແລະ 25. ສະເພາະມາດຕາ 24 ການແກ້ໄຂຜົນການກວດກາ ໄດ້ກຳນົດຮູບແບບລົງວິໄນຕໍ່ຜູ້ທີ່ເປັນຫົວໜ້າ ທີ່ຕົກລົງແກ້ໄຂຜົນຂອງການກວດກາບໍ່ຖືກຕ້ອງຕາມການຕົກລົງຂອງຂັ້ນເທິງຈະຖືກລົງວິໄນ; ຕໍ່ກັບມາດຕາດັ່ງກ່າວນີ້ ອົງການກວດກາແຫ່ງລັດຍັງບໍ່ທັນໄດ້ຮ່າງກົດໝາຍ ຫລືເອີ້ນວ່ານິຕິກຳໃຕ້ກົດໝາຍເພື່ອເປັນເອກະພາບໃນການປະຕິບັດໃຫ້ເປັນລະບົບ ແລະຂັ້ນຕອນໃນການລົງວິໄນ.

ຕໍ່ຄຳຊັກຖາມຂອງບັນດາສະມາຊິກສາພາແຫ່ງຊາດກ່ຽວກັບການນຳເອົາໂຄງການນອກແຜນຈຳນວນ 38 ໂຄງການ, ມູນຄ່າ 318,01 ຕື້ກີບ, ຜ່ານການດຳເນີນການກວດກາ ເຫັນວ່າໂຄງການດັ່ງກ່າວແມ່ນມີການກໍ່ສ້າງສຳເລັດຫລາຍປີແລ້ວ ເປັນໂຄງການທີ່ມີປະສິດທິຜົນທັງເປັນໂຄງການທີ່ມີຄວາມຈຳເປັນໃຫ້ແກ່ພື້ນຖານໂຄງລ່າງຂອງທ້ອງຖິ່ນ ແລະຮັບໃຊ້ໃຫ້ແກ່ການດຳລົງຊີວິດຂອງປະຊາຊົນ, ແຕ່ໂຄງການດັ່ງກ່າວຍັງບໍ່ທັນໄດ້ຮັບການຊຳລະເງິນເພາະເປັນໂຄງການນອກແຜນ ແລະເຈົ້າຂອງໂຄງການກໍບໍ່ມີຄວາມສາມາດຊຳລະເງິນ; ສະນັ້ນຈິ່ງສະເໜີສະພາແຫ່ງຊາດຊີ້ນຳລັດຖະບານໃຫ້ເອົາເຂົ້າແຜນຫລືບໍ່. ໃນໄລຍະຜ່ານມາການດຳເນີນການກວດກາໂຄງການບໍ່ມີຄວາມຄືບໜ້າເຫດຜົນຍ້ອນຂາດບຸກຄະລາກອນ, ງົບປະມານບໍ່ພຽງພໍເຊິ່ງອົງການກວດກາແຫ່ງລັດໄດ້ແຕ່ງໜ່ວຍງານລົງສົມທົບກັບກະຊວງ, ອົງການ ແລະທ້ອງຖິ່ນດຳເນີນການກວດກາໂຄງການສິບຕື້ລົງມາຈິ່ງສາມາດກວດກາສຳເລັດ 616 ໂຄງ ການ.
ຂ່າວ: ມະນີທອນ, ພາບ: ເກດສະໜາ

แชร์