ກສນ ຄົ້ນຄວ້າປັບປຸ່ງແຜນປະຕິບັດງານແຫ່ງຊາດ ການຮຽນຮູ້ຕະຫຼອດຊີວິດ

ກົມການສຶກສານອກໂຮງຮຽນ (ກສນ) ກະຊວງສຶກສາທິການ ແລະກິລາ ໄດ້ຈັດກອງປະຊຸມຄົ້ນຄວ້າ ແລະປັບປຸ່ງ (ຮ່າງ) ແຜນປະຕິບັດງານແຫ່ງຊາດ ການຮຽນຮູ້ຕະຫຼອດຊີວິດ ເມື່ອວັນທີ 19 ທັນວາ 2022 ທີ່ຫ້ອງປະຊຸມໂຮງແຮມແກນຣີເວີໄຊ ເມືອງວັງວຽງ ແຂວງວຽງຈັນ, ໂດຍໃຫ້ກຽດເຂົ້າຮ່ວມຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ສີຊະນະ ບຸບຜາ ຫົວໜ້າກົມການສຶກສານອກໂຮງຮຽນ, ທ່ານ ໂຈຮານ ເຮວເມນ ຜູ້ອໍານວຍການສະມາຄົມການສຶກສາຜູ້ໃຫຍ່ຂອງເຢຍລະມັນ, ພ້ອມດ້ວຍຜູ້ຕາງໜ້າຈາກກົມ, ຜູ້ຮັບຜິດຊອບວຽກງານພັດທະນາຊັບພະຍາກອນມະນຸດຈາກກະຊວງສຶກສາທິການ ແລະກິລາ ແລະ ກະຊວງອ້ອມຂ້າງເຂົ້າຮ່ວມ.

ໃນພິທີເປີດກອງປະຊຸມ, ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ກອງປະຊຸມໃນຄັ້ງນີ້ແມ່ນມີຄວາມໝາຍຄວາມສຳຄັນຫຼາຍເພາະຈະໄດ້ຜ່ານ ແລະຮັບຮອງແຜນປະຕິບັດງານແຫ່ງຊາດ ວ່າດ້ວຍການຮຽນຮູ້ຕະຫຼອດຊີວິດ ແລະ ຜ່ານຮ່າງຂໍ້ຕົກລົງຂອງທ່ານນາຍົກລັດຖະມົນຕີ ພາຍຫຼັງທີ່ໄດ້ຮັບການແນະນຳຈາກຫ້ອງວ່າການສຳນັກງານນາຍົກລັດຖະມົນຕີ. ພ້ອມກັນນັ້ນ, ທ່ານຍັງໄດ້ກ່າວອີກວ່າ: ສໍາລັບຂໍ້ຕົກລົງຂອງນາຍົກລັດຖະມົນຕີວ່າດ້ວຍການແຕ່ງຕັ້ງຄະນະກຳມະການເພື່ອການຮຽນຮູ້ຕະຫຼອດຊີວິດແຫ່ງຊາດ, ພາຍຫຼັງທີ່ເອກະພາບກັນແລ້ວໃຫ້ຮີບຮ້ອນນຳສະເໜີຫາຫ້ອງວ່າການສຳນັກງານນາຍົກລັດຖະມົນຕີເພື່ອໃຫ້ຮັບອະນຸມັດໄວ; ສະເໜີໃຫ້ແຕ່ລະພາກສ່ວນນຳເອົາດຳລັດວ່າດ້ວຍການຮຽນຮູ້ຕະຫຼອດຊີວິດໄປສືບຕໍ່ເຜີຍແຜ່, ເຊື່ອຊຶມ ແລະຜັນຂະຫຍາຍຢູ່ໃນຂົງເຂດຮັບຜິດຊອບຂອງຕົນ; ສໍາລັບແຜນປະຕິບັດງານແຫ່ງຊາດວ່າດ້ວຍການຮຽນຮູ້ຕະຫຼອດຊີວິດໃຫ້ມີຄວາມສອດຄ່ອງກັບຈຸດພິເສດຂອງບ້ານເຮົາ, ກິດຈະກຳທີ່ກຳນົດໄວ້ຕ້ອງສາມາດປະຕິບັດໄດ້; ໃຫ້ແຕ່ລະພາກສ່ວນນໍາເອົາແຜນປະຕິບັດງານແຫ່ງຊາດວ່າດ້ວຍການຮຽນຮູ້ຕະຫຼອດຊີວິດໄປຜັນຂະຫຍາຍໃຫ້ເປັນກິດຈະກຳອັນລະອຽດ; ເອົາໃຈໃສ່ສົ່ງເສີມການພັດທະນາ ແລະກໍ່ສ້າງບຸກຄະລາກອນຂອງຂະແໜງການຕົນດ້ວຍການສ້າງສະພາບແວດລ້ອມ ແລະສ້າງໂອກາດໃນການພັດທະນາຕົນເອງໃຫ້ແກ່ພະນັກງານທີ່ສັງກັດຢູ່ໃນກົມກອງ ແລະຢູ່ໃນຂອບເຂດບໍລິການຂອງຕົນ.

ສຳລັບກອງປະຊຸມໃນຄັ້ງນີ້, ຜູ້ເຂົ້າຮ່ວມໄດ້ຮັບຟັງການເຜີຍແຜ່ກ່ຽວກັບດຳລັດວ່າດ້ວຍການຮຽນຮູ້ຕະຫຼອດຊີວິດ; ຄວາມເປັນມາ, ເຫດຜົນ ແລະຄວາມຈຳເປັນໃນການສ້າງແຜນປະຕິບັດງານແຫ່ງຊາດການຮຽນຮູ້ຕະຫຼອດຊີວິດ, ສະເໜີຜົນຂອງກອງປະຊຸມສ້າງຮ່າງເບື້ອງຕົ້ນຂອງແຜນປະຕິບັດງານແຫ່ງຊາດການຮຽນຮູ້ຕະຫຼອດຊີວິດຄັ້ງຜ່ານມາ; ສະເໜີ (ຮ່າງ) ເບື້ອງຕົ້ນຂອງແຜນປະຕິບັດງານແຫ່ງຊາດການຮຽນຮູ້ຕະຫຼອດຊີວິດ ພ້ອມທັງສົນທະນາ ແລະປະກອບຄຳຄິດເຫັນຢ່າງກົງໄປກົງມາກ່ຽວກັບການຜັນຂະຫຍາຍ ແລະ ຈັດຕັ້ງປະຕິບັດດຳລັດຂອງແຕ່ລະກະຊວງ ຫຼືພາກສ່ວນຕົນ, ສິ່ງທ້າທາຍ ແລະທິດທາາງແຜນການໃນຕໍ່ໜ້າ ເພື່ອດຳເນີນການແກ້ໄຂ; ລາຍງານຫຍໍ້ຜົນການຄົ້ນຄວ້າ ແລະ ປຶກສາຫາລືກ່ຽວກັບ (ຮ່າງ) ແຜນປະຕິບັດງານແຫ່ງຊາດ ວ່າດ້ວຍການຮຽນຮູ້ຕະຫຼອດຊີວິດ. ຫຼັງຈາກນັ້ນ, ບັນດາຜູ້ເຂົ້າຮ່ວມຍັງໄດ້ຈັດກຸ່ມຄົ້ນຄວ້າ ແລະປຶກສາຫາລືສົນທະນາຮ່ວມກັນເພື່ອເຮັດໃຫ້ກອງປະຊຸມມີເນື້ອໃນທີ່ຄົບຖ້ວນສົມບູນ ແລະປະສົບຜົນສົບເລັດຕາມລະດັບຄາດໝາຍທີ່ວາງໄວ້. ສຳລັບກອງປະຊຸມດັ່ງກ່າວ, ແມ່ນໄດ້ດຳເນີນໄປເປັນເວລາ 3 ວັນ ລະຫວ່າງວັນທີ 19-21 ທັນວາ 2022.

แชร์