ງານສັບປະດາດີຈີຕອນ ແຫ່ງຊາດ 2022 ມີຫຼາຍກວ່າ 120 ຮ້ານເຂົ້າຮ່ວມວາງສະແດງ

ພິທີເປີດງານສັບປະດາດີຈີຕອນແຫ່ງຊາດ ປະຈຳປີ 2022 ໄດ້ຈັດຂຶ້ນໃນວັນທີ 21 ທັນວານີ້ ທີ່ຫໍປະຊຸມແຫ່ງຊາດ ໂດຍໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ (ກຕສ), ມີຮອງລັດຖະມົນຕີ, ມີພາກສ່ວນກ່ຽວຂ້ອງ ແລະແຂກທີ່ຖືກເຊີນເຂົ້າຮ່ວມ.

ທ່ານ ບໍ່ວຽງຄຳ ວົງດາລາ ໄດ້ລາຍງານໃຫ້ຮູ້ວ່າ: ງານສັບປະດາດີຈີຕອນ ປະຈຳປີ 2022 ເປັນງານມະຫະກໍາດີຈີຕອນຄັ້ງທໍາອິດຂອງ ສປປ ລາວ ທີ່ ກຕສ ໄດ້ສົມທົບກັບບັນດາບໍລິສັດຜູ້ອຸປະຖໍາພ້ອມດ້ວຍບັນດາກະຊວງ, ຂະແໜງການ ແລະ ວິສາຫະກິດຕ່າງໆ ທັງນີ້ກໍເພື່ອສົ່ງເສີມໃຫ້ພາກລັດ, ເອກະຊົນ ບັນດາບໍລິສັດ ແລະ ນິຕິບຸກຄົນທີ່ປະກອບການດ້ານໄອຊີທີ ໂທລະຄົມ ແລະ ເຕັກໂນໂລຊີດີຈີຕອນໄດ້ມີໂອກາດສະແດງຜະລິດຕະພັນການບໍລິການ ແລະ ນະວັດຕະກໍາດ້ານດີຈີຕອນພ້ອມກັນນັ້ນກໍເພື່ອແລກປ່ຽນຂໍ້ມູນຂ່າວສານປະສົບການໃນການພັດທະນາຂະແໜງການເຕັກໂນໂລຊີ ແລະການສື່ສານທັງເປັນເວທີໃຫ້ຄວາມຮູ້ແກ່ພະນັກງານ-ລັດຖະກອນ, ນັກທຸລະກິດ, ນັກຮຽນ ນັກສຶກສາ ດ້ວຍການຈັດກອງປະຊຸມສໍາມະນາ ການເຝິກອົບຮົມຕ່າງໆ ແລະການແຂ່ງຂັນທາງດ້ານດິຈິຕອນ.

ໃນງານໄດ້ນໍາເອົາຜົນງານການຈັດຕັ້ງປະຕິບັດວິໄສທັດການພັດທະນາເສດຖະກິດດີຈີຕອນແຫ່ງຊາດໄລຍະ 20 ປີ (2021-2140) ຍຸດທະສາດການພັດທະນາເສດຖະກິດດີຈີຕອນແຫ່ງຊາດໄລຍະ 10 ປີ (2021-2030) ແລະ ແຜນພັດທະນາເສດຖະກິດດີຈີຕອນແຫ່ງຊາດໄລຍະ 5 ປີ (2021-2025) ກໍຄື ແຜນພັດທະນາຂະແໜງການເຕັກໂນໂລຊີ ແລະ ການສື່ສານ 5 ປີ (2021-2025) ມາວາງສະແດງໃຫ້ຜູ້ເຂົ້າຊົມທັງພາຍໃນ ແລະ ຕ່າງປະເທດໄດ້ຮັບຮູ້ເຖິງຜົນສໍາເລັດຂອງການພັດທະນາທາງດ້ານດີຈີຕອນຢູ່ ສປປ ລາວ ໂດຍຜ່ານການວາງສະແດງຮູບພາບ, ວິດີໂອ, ຊັອບແວ, ຮາດແວ ແລະ ຜະລິດຕະພັນທາງດີຈີຕອນຕ່າງໆທີ່ຫຼາກຫຼາຍ ນອກຈາກນີ້ ຍັງມີການສະແດງສິນຄ້າ ແລະ ນະວັດຕະກໍາທາງດ້ານດີຈີຕອນ ຫຼາຍກວ່າ 120 ຮ້ານ ເພື່ອວາງສະແດງຜະລິດຕະພັນ ແລະ ສິນຄ້າຂອງຕົນ, ນອກຈາກນີ້ ຍັງມີການສໍາມະນາ ເຝິກອົບຮົມ ແລະ ອື່ນໆ ງານດັ່ງກ່າວຈະດຳເນີນລະຫວ່າງວັນທີ 21-25 ທັນວາ.

ທ່ານ ພັນຄຳ ວິພາວັນ ໄດ້ກ່າວເປີດງານຢ່າງເປັນທາງການວ່າ: ປັດຈຸບັນໂລກກໍາລັງກ້າວເຂົ້າສູ່ຍຸກແຫ່ງການປະຕິວັດອຸດສາຫະກໍາຄັ້ງທີ 4 ຊຶ່ງເປັນຍຸກແຫ່ງການນໍາໃຊ້ເຕັກໂນໂລຊີດີຈິຕອນ ເຂົ້າໃນການພັດທະນາເສດຖະກິດ-ສັງຄົມ ໃນບັນດາປະເທດຕ່າງໆ ສະນັ້ນ ເພື່ອຈັດຕັ້ງປະຕິບັດມະຕິກອງປະຊຸມໃຫຍຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃຫ້ບັນລຸຜົນສໍາເລັດ ຈຶ່ງມີຄວາມຈໍາເປັນຕ້ອງໄດ້ພັດທະນາ ແລະ ນໍາໃຊ້ເຕັກໂນໂລຊີທັນສະໄໝທີ່ເອີ້ນວ່າເຕັກໂນໂລຊີດີຈີຕອນເຂົ້າໃນການພັດທະນາເສດຖະກິດ-ສັງຄົມ ແນໃສ່ການບໍລິຫານ-ການຄຸ້ມຄອງ ແລະການບໍລິການລັດໃຫ້ມີຄວາມໂປ່ງໃສ,ສະດວກ,ວ່ອງໄວ ແລະ ຕອບສະໜອງຄວາມຕ້ອງການຂອງປະຊາຊົນໂດຍສະເພາະແມ່ນການນໍາໃຊ້ເຕັກໂນໂລຊີດີຈີຕອນເຂົ້າມາແກ້ໄຂການເກັບລາຍຮັບຂອງລັດຖະບານເພື່ອຈັດຕັ້ງປະຕິບັດສອງວາລະແຫ່ງຊາດທີ່ລັດຖະບານໄດ້ຕັ້ງໜ້າດໍາເນີນຢູ່ໃນປັດຈຸບັນການນຳໃຊ້ເຕັກໂນໂລຊີດິຈີຕອນເຂົ້າໃນທຸກໂຂງເຂດວຽກງານແມ່ນການຫັນເປັນດີຈີຕອນຂອງປະເທດເຮົາໃນ 3 ດ້ານພ້ອມກັນຄື: ຫັນການບໍລິຫານລັດແບບດີຈີຕອນ, ສ້າງເສດຖະກິດດີຈີຕອນ ແລະ ສ້າງສັງຄົມດີຈີຕອນ ຍ້ອນແນວນັ້ນລັດຖະບານຈຶ່ງໄດ້ວາງວິໄສທັດການພັດທະນາເສດຖະກິດດີຈີຕອນໄລຍະ 20 ປີ (2021-2040) ແຜນຍຸດທະສາດການພັດທະນາເສດຖະກິດດີຈີຕອນໄລຍະ 10 ປີ (2021-2030) ແລະ ແຜນພັດທະນາເສດຖະກິດດີຈີຕອນ ໄລຍະ 5 ປີ (2021-2025) ຊຶ່ງສະພາແຫ່ງຊາດໄດ້ຮັບຮອງເອົາແລ້ວໃຫ້ປະກົດຜົນເປັນຈິງ.

แชร์