ຄັງແຮເຂົ້າສຸກເສີນອາຊຽນ+3 ມອບເຂົ້າສານ 1.000 ໂຕນ ໃຫ້ແກ່ ສປປ ລາວ

ພິທີມອບ-ຮັບເຂົ້າສານ ຈາກຄັງແຮເຂົ້າສຸກເສີນອາຊຽນ+3 ຊຶ່ງປະກອບມີປະເທດຢີ່ປຸ່ນ ແລະ ສ ເກົາຫຼີ ເພື່ອແຈກຢາຍໃຫ້ແກ່ຜູ້ປະສົບໄພພິບັດ ຢູ່ ສປປ ລາວ ໂດຍການຈັດຕັ້ງປະຕິບັດຂອງກະຊວງແຮງງານ ແລະສະຫວັດດີການສັງຄົມ (ຮສສ), ກະຊວງກະສິກຳ ແລະປ່າໄມ້ ແລະອົງການອາຫານໂລກ ປະຈຳ ສປປ ລາວ ໄດ້ຈັດຂຶ້ນໃນວັນທີ 21 ທັນວານີ້ ທີ່ສາງຫຼັກ 17 ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ, ຕາງໜ້າກອງເລຂາຄັງແຮເຂົ້າອາຊຽນ+3 ກ່າວມອບໂດຍ ທ່ານ ຈູມເຈັດ ກັນຈະນາເກສອນ ຫົວໜ້າກອງເລຂາຄັງແຮເຂົ້າອາຊຽນ+3 ແລະ ກ່າວຮັບໂດຍ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະປ່າໄມ້, ທ່ານ ລີປາວ ຢ່າງ ຮອງລັດຖະມົນຕີກະຊວງ ຮສສ, ມີທ່ານ ຈູງຢະ ນະກະໂນະ ອັກຄະຣາຊະທູດຜູ້ມີອຳນາດເຕັມແຫ່ງ ຍີ່ປຸ່ນ ປະຈໍາ ສປປ ລາວ, ທ່ານ ນາງ ຈ່ອງ ຈີ່ຢ້າງ ເລຂາເອກອັກຄະລັດຖະທູດ ສ ເກົາຫຼີ ປະຈໍາ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ເຂົ້າສານທີ່ນຳມາມອບໃນຄັ້ງນີ້, ມີຈໍານວນ 1.000 ໂຕນ. ໃນນີ້, ລັດຖະບານຍີ່ປຸ່ນ ໃຫ້ການສະໜັບສະໜູນ 300 ໂຕນ ແລະລັດຖະບານ ສ ເກົາຫຼີ 700 ໂຕນ ເພື່ອນໍາໄປແຈກຢາຍໃຫ້ປະຊາຊົນທີ່ປະສົບໄພພິບັດນໍ້າຖ້ວມຢູ່ບັນດາແຂວງໃນຂອບເຂດທົ່ວປະເທດຂອງ ສປປ ລາວ ໃນປີ 2022.

ທ່ານ ລີປາວ ຢ່າງ ໄດ້ກ່າວວ່າ: ສຳລັບ ສປປ ລາວ ໃນລະຫວ່າງເດືອນກໍລະກົດ ຫາ ຕຸລາ 2022 ໄດ້ເກີດເຫດການໄພພິບັດນໍ້າຖ້ວມ-ນໍ້າໄຫຼຊຸ ຢູ່ 13 ແຂວງຄື: ຜົ້ງສາລີ, ອຸດົມໄຊ, ຫຼວງພະບາງ, ໄຊຍະບູລີ, ຊຽງຂວາງ, ຫົວພັນ, ວຽງຈັນ, ສະຫວັນນະເຂດ, ສາລະວັນ, ຈຳປາສັກ, ເຊກອງ, ອັດຕະປື ແລະນະຄອນຫຼວງວຽງຈັນ ຊຶ່ງເຮັດໃຫ້ພື້ນຖານການຜະລິດ ແລະ ຊີວິດການເປັນຢູ່ຂອງປະຊາຊົນ ຈຳນວນ 70.523 ຄອບຄົວ, ມີ 322.954 ຄົນ ຍິງ 163.383 ຄົນ ທີ່ໄດ້ຮັບຜົນກະທົບ, ຄິດເປັນມູນຄ່າເສຍຫາຍທັງໝົດປະມານ 552 ກວ່າຕື້ກີບ. ຕໍ່ກັບໄພພິບັດທີ່ກ່າວມານີ້ ລັດຖະບານ ສປປ ລາວ ກໍໄດ້ໃຫ້ການຊ່ວຍເຫຼືອເບື້ອງຕົ້ນແກ່ຜູ້ປະສົບໄພພິບັດ, ຄ່ຽງຄູ່ກັບບັນດາຄູ່ຮ່ວມງານອົງການສາກົນກໍໃຫ້ການຊ່ວຍເຫຼືອ, ເວົ້າລວມ, ເວົ້າສະເພາະ ລັດຖະບານ ຍີ່ປຸ່ນ ແລະລັດຖະບານ ສ ເກົາຫຼີ ໄດ້ໃຫ້ການຊ່ວຍເຫຼືອເຂົ້າກິນ ແກ່ລັດຖະບານ ສປປ ລາວ ກໍຄືກະຊວງ ຮສສ ຕະຫຼອດມາ, ບໍ່ວ່າຈະເປັນທາງດ້ານວັດຖຸ, ເຕັກນິກວິຊາການ ແລະ ການສ້າງບຸກຄະລາກອນດ້ານສີມືແຮງງານ.

ທ່ານ ກ່າວຕື່ມວ່າ: ໃນນາມກະຊວງ ຮສສ ໃຫ້ຄໍາໝັ້ນສັນຍາວ່າຈະນໍາໃຊ້ເຂົ້າຈໍານວນດັ່ງກ່າວນີ້, ໄປແຈກຢາຍໃຫ້ເກີດປະໂຫຍດສູງສຸດຕໍ່ກັບປະຊາຊົນລາວບັນດາເຜົ່າທີ່ປະສົບເຄາະຮ້າຍ, ຕາງໜ້າໃຫ້ລັດຖະບານ ສປປ ລາວ ຂໍສະແດງຄວາມຂອບໃຈ ແລະຮູ້ບຸນຄຸນເປັນຢ່າງສູງມາຍັງລັດຖະບານຍີ່ປຸ່ນ ແລະ ສ ເກົາຫຼີ ທີ່ໄດ້ໃຫ້ການຊ່ວຍເຫຼືອ ແລະຕາງໜ້າໃຫ້ລັດຖະບານ ສປປ ລາວ ຂໍຖືໂອກາດປີໃໝ່ສາກົນທີ່ຈະໝູນວຽນມາເຖິງອີກບໍ່ພໍເທົ່າໃດມື້ນີ້ໃນຂ້າງໜ້າ, ຂໍອວຍພອນໄຊ ໃຫ້ບັນດາທ່ານຈົ່ງມີສຸຂະພາບເຂັ້ມແຂງ, ປະສົບສຳເລັດທຸກວຽກງານ.
(ຂ່າວ-ພາບ: ວັນເພັງ)

แชร์