ເຊັນສັນຍາສຳປະທານທີ່ດິນລັດສ້າງໂຮງງານປຸງແຕ່ງຫີນນອ່ອນມາໂບ

ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ພິທີເຊັນສັນຍາສຳປະທານທີ່ດິນລັດຄຸ້ມຄອງເພື່ອສ້າງໂຮງງານປຸງແຕ່ງຫີນອ່ອນມາໂບ (Marble) ລະຫວ່າງບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດຜູ້ດຽວ ກັບອົງການປົກຄອງແຂວງຫລວງພະບາງ ຈັດຂຶ້ນໃນເມື່ອບໍ່ດົນຜ່ານມາໂດຍການຮ່ວມລົງນາມລະຫວ່າງ ທ່ານ ຈີນດາວົງ ໂພສີຄຳ ຫົວໜ້າພະແນກແຜນການ ແລະການລົງທຶນ ແລະທ່ານ ເພັດຈະເລີນ ໂມະນີ ຜູ້ອຳນວຍການບໍລິສັດທີ່ປຶກສາດ້ານການລົງທຶນ ແລະກໍ່ສ້າງເຂື່ອນໄຟຟ້າ ຈຳກັດຜູ້ດຽວ ໂດຍມີທ່ານ ຄໍາຂັນ ຈັນທະວີສຸກ ເຈົ້າແຂວງຫລວງພະບາງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.


ໂຮງງານປຸງແຕ່ງຫີນນອ່ອນມາໂບ (Marble) ຕັ້ງຢູ່ເຂດບ້ານນູນສະຫວາດ, ນະຄອນຫລວງພະບາງ, ມີເນື້ອທີ່ສຳປະທານ ທັງໝົດ 30 ກວ່າເຮັກຕາ, ມີອາຍຸສຳປະທານ 30 ປີ, ເລີ່ມແຕ່ວັນທີ 15 ທັນວາ 2022 ເຖິງ 15 ທັນວາ 2052. ຈາກນັ້ນ, ໂຄງການຈະຕົກເປັນຂອງພາກລັດ, ອາຍຸສັນຍາສາມາດຕໍ່ໄດ້ ຕາມກົດໝາຍວ່າດ້ວຍການສົ່ງເສີມການລົງທຶນທີ່ມີຜົນບັງຄັບໃຊ້ໃນແຕ່ລະໄລຍະບົນພື້ນຖານເຈລະຈາເນື້ອໃນສັນຍາຄືນໃໝ່, ເປັນການລົງທຶນເອກະຊົນພາຍໃນ 100% ໃນມູນຄ່າທັງໝົດ 3 ລ້ານໂດລາສະຫະລັດ, ທຶນຈົດທະບຽນ 1.000.000 ໂດລາສະຫະລັດ, ໂດຍຈະສຸມໃສ່ຜະລິດ ແລະ ແປຮູບແຜ່ນຫີນອ່ອນມາໂບ, ຜະລິດແຜ່ນຫີນອ່ອນທຽມ (ຜະລິດຈາກຫີນອ່ອນມາໂບ), ສາງເກັບມ້ຽນຫີນອ່ອນມາໂບ, ຜະລິດຜົງແຄວຊ່ຽມຄາໂບແນັດ (Calcium Carbonate) ແລະ ສາງເກັບມ້ຽນສະເພາະ, ມີຫ້ອງວາງສະແດງຫີນອ່ອນມາໂບ, ສໍານັກງານ-ຫ້ອງການ, ທີ່ພັກພະນັກງານ ແລະຫ້ອງອາຫານ, ເດີ່ນຈອດລົດ, ສະຖານທີ່ຄ່ຽນຖ່າຍສິນຄ້າ, ເດີ່ນສໍາລັບກິດຈະກຳຕ່າງໆ ແລະ ສິ່ງອຳນວຍຄວາມສະດວກອື່ນໆ.

ໄລຍະການສຳປະທານ, ບໍລິສັດຜູ້ລົງທືນເຫັນດີມອບພັນທະເຂົ້າງົບປະມານຂອງລັດຕາມລະບຽບ ແລະມອບເງິນຊຸກຍູ້ການພັດທະນາສັງຄົມຕາມການຕົກລົງ ແລະລະບຸໃນສັນຍາສຳປະທານ.
ຂ່າວ: ຫລານອ້າຍຄຳຫລ້າ

แชร์