ສະຫຼຸບວຽກງານການເງິນ ທົ່ວປະເທດ ປະຈຳປີ 2022

ກອງປະຊຸມສະຫຼຸບວຽກງານການເງິນ ທົ່ວປະເທດ ປະຈຳປີ 2022 ແລະທິດທາງປີ 2023 ໄດ້ຈັດຂຶ້ນໃນວັນທີ 20 ທັນວານີ້ ທີ່ສູນຝຶກອົບຮົມ ແລະການຮ່ວມມືສາກົນ (ICTC) ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີບັນດາຮອງລັດຖະມົນຕີ, ຫົວໜ້າກົມ, ຮອງຫົວໜ້າກົມ, ພະນັກງານນໍາພາຫຼັກແຫຼ່ງຂອງກະຊວງການເງິນເຂົ້າຮ່ວມ.

ທ່ານ ບຸນໂຈມ ອຸບົນປະເສີດ ໄດ້ກ່າວວ່າ: ກອງປະຊຸມໄດ້ຕີລາຄາສະພາບການຈັດຕັ້ງປະຕິບັດແຜນງົບປະມານແຫ່ງລັດປີ 2022 ເປັນຕົ້ນແມ່ນການຂຸດຄົ້ນທ່າແຮງບົ່ມຊ້ອນທີ່ພວກເຮົາເກັບເຂົ້າງົບປະມານແຫ່ງລັດຢ່າງພາວະວິໃສ, ຕ້ອງຮັບຮູ້ ແລະ ກ້າຮັບຜິດຊອບຕໍ່ຜົນສຳເລັດ, ກ້າຕໍານິສິ່ງທີ່ພວກເຮົາເຮັດບໍ່ໄດ້ດີ ເຮັດໃຫ້ເກັບລາຍຮັບບໍ່ຄົບຖ້ວນ, ເກັບແລ້ວບໍ່ມອບ, ຮົ່ວໄຫຼໃນຫຼາຍຂອດຂັ້ນ, ຫຼາຍຂົງເຂດທີ່ຍັງສະສົມມາບໍ່ໄດ້ຖືກແກ້ໄຂ; ເກັບລາຍຮັບບໍ່ສົມຄູ່ກັບທ່າແຮງບົ່ມຊ້ອນເປັນຕົ້ນແມ່ນໃນຂົງເຂດຊັບພະຍາກອນທຳມະຊາດ, ແຮ່ທາດ, ພະລັງງານ, ການນຳເຂົ້ານໍ້າມັນເຊື້ອໄຟ, ອຸປະກອນກໍ່ສ້າງ, ເຄື່ອງໄຊ້ໄຟຟ້າ, ອຸປະໂພກ-ບໍລິໂພກ ແລະ ອື່ນໆ ແລະ ຕ້ອງໄດ້ຕີລາຄາຢ່າງມີຄວາມຮັບຜິດຊອບສູງ ເພື່ອເຫັນໄດ້ບັນຫາທີ່ເຮົາຕ້ອງຕັດສິນໃຈເດັດຂາດແກ້ໄຂ; ເພື່ອຂຸດຄົ້ນທຸກທ່າແຮງບົ່ມຊ້ອນຖານລາຍຮັບໃຫ້ໄດ້ເພີ່ມຂຶ້ນຢ່າງຈະແຈ້ງຊັດເຈນ; ຄວາມຈໍາເປັນໃນການຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ເປັນບັນຫາສະສົມມາຢ່າງຍາວນານບໍ່ທັນໄດ້ຮັບການແກ້ໄຂບັນຫາໜີ້ສິນສາທາລະນະພາຍໃນ ແລະ ຕ່າງປະເທດ ສູງເກີນຄວາມສາມາດທີ່ຈະແກ້ໄຂໄດ້ໃນໄລຍະສັ້ນ, ບັນຫາການລະເມີດວິໄນການເງິນ, ການອັດຊ່ອງວ່າງການຮົ່ວໄຫຼການຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນ; ເພື່ອສ້າງລາຍຮັບພາຍໃນໃຫ້ເພີ່ມຂຶ້ນຕາມທ່າແຮງທີ່ມີ ແລະ ສະພາບການຮົ່ວໄຫຼການເກັບລາຍຮັບຍັງເກີດຂຶ້ນຢ່າງແຜ່ລາມ, ການປະຕິບັດ ແລະ ຕ້ານການຟຸ່ມເຟືອຍເພື່ອຫຼຸດຜ່ອນການຂາດດຸນງົບປະມານ, ການລະດົມທຶນ ເພື່ອການພັດທະນາ ແລະ ດຸ່ນດ່ຽງງົບປະມານ ທັງໝົດນັ້ນ ເປັນບັນຫາພື້ນຖານທີ່ເຫັນວ່າ ໝົດທຸກພາກສ່ວນຂະແໜງການສູນກາງ, ທ້ອງຖິ່ນ ແລະ ທົ່ວສັງຄົມຕ້ອງໄດ້ເຂົ້າຮ່ວມຕາມພາລະບົດບາດ ເພື່ອໃຫ້ມີສ່ວນຮ່ວມຂອງທຸກພາກສ່ວນ ເສດຖະກິດ-ສັງຄົມໃນການແກ້ໄຂບັນຫາ.

ທ່ານ ບຸນໂຈມ ອຸບົນປະເສີດ ໄດ້ກ່າວຕື່ມວ່າ: ສໍາລັບທິດທາງແຜນການປະຈໍາປີ 2023 ແນໃສ່ສ້າງພື້ນຖານຫັນປ່ຽນທີ່ແຂງແຮງ, ເລິກເຊິ່ງ ແລະຮອບດ້ານ, ຕ້ອງສົມທົບຢ່າງແໜ້ນແຟ້ນ ລະຫວ່າງຂະແໜງສູນກາງ ແລະ ທ້ອງຖິ່ນໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ໜີ້ສິນສາທາລະນະ, ຈຳກັດຄວາມສ່ຽງບໍ່ໃຫ້ສູ່ສະພາວະວິກິດການທາງດ້ານເສດຖະກິດ-ການເງິນຮ້າຍແຮງ, ບໍ່ໃຫ້ຕົກຢູ່ໃນປະເທດທີ່ບໍ່ສາມາດຊໍາລະໜີ້ສິນໄດ້ ແລະ ຮັບປະກັນການສ້າງບັນດາປັດໄຈທີ່ຈຳເປັນໃຫ້ແກ່ການຂະຫຍາຍຕົວທາງດ້ານເສດຖະກິດ-ສັງຄົມຢ່າງຕໍ່ເນື່ອງ; ຍົກສູງຄວາມສາມາດ ແລະສ້າງຄວາມເຂັ້ມແຂງໃຫ້ແກ່ການຄຸ້ມຄອງການເງິນມະຫາພາກໃຫ້ມີຄວາມເຂັ້ມແຂງເທື່ອລະກ້າວ.

ກອງປະຊຸມຍັງຈະໄດ້ພ້ອມກັນຄົ້ນຄວ້າ, ຕີລາຄາບັນຫາທີ່ສໍາຄັນຂອງຂະແໜງການເງິນຕາມການແບ່ງຄວາມຮັບຜິດຊອບໃຫ້ສະມາຊິກລັດຖະບານ, ອົງການປົກຄອງທ້ອງຖິ່ນຕິດພັນກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ຕີລາຄາວຽກງານການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະອື່ນໆ.
(ຂ່າວ-ພາບ: ບຸນອູ້ມ)

แชร์