ເປັນເຈົ້າການປ້ອງກັນເວນຍາມ ຮັບປະກັນຄວາມສະຫງົບໃຫ້ແກ່ຊຽງຊວງເກມ

ທະຫານເມືອງພູກູດ ໄດ້ເປັນເຈົ້າການປ້ອງກັນເວນຍາມໃຫ້ແກ່ງານກິລາ ຊຽງຂວາງເກມ ໂດຍໄດ້ການເຄື່ອນໄຫວຕາມພາລະບົດບາດ ແລະໜ້າທີ່ທີ່ໄດ້ຮັບມອບໝາຍຈາກ ພັກ-ລັດ ຊຶ່ງໄດ້ປັບປຸງລະບົບປະຈຳການຢ່າງເປັນລະບົບຄົບຊຸດ, ໄດ້ສ້າງແຜນຄາດກະກໍລະນີທີ່ຈະເກີດຂຶ້ນ ແລະ ໄດ້ຈັດຕັ້ງນຳໃຊ້ກຳລັງແບ່ງອອກເປັນຫຼາຍພາກສ່ວນເຮັດໃຫ້ງານກິລາຊຽງຂວາງເກມທີ່ດໍາເນີນມາຮອດປັດຈຸບັນມີຄວາມສະຫງົບສຸກໂດຍພື້ນຖານ.

ສະຫາຍ ພັນໂທ ບຸນຍໍ້ ພົມມະຈັນ ຫົວໜ້າການທະຫານ ກອງບັນຊາການທະຫານເມືອງພູກູດ ທັງເປັນຄະນະອະນຸກຳມະການປ້ອງກັນງານ ຊຽງຂວາງເກມ ໃຫ້ຮູ້ວ່າ: ກ່ອນພິທີເປີດງານມະຫະກຳກິລາແຫ່ງຊາດ ຄັ້ງທີ XI ຫຼື ຊຽງຂວາງເກມ 2022 ກໍຄືມາຮອດປັດຈຸບັນ ມວນຊົນໄດ້ຫຼັ່ງໄຫຼກັນເຂົ້າມາແຂວງຊຽງຂວາງ ເພື່ອຮັບຊົມງານກິລາ ແລະທ່ອງທ່ຽວແຂວງຊຽງຂວາງ ເປັນຈຳນວນຫຼາຍຢ່າງເປັນຂະບວນຟົດຟື້ນກວ້າງຂວາງ ຊຶ່ງກອງບັນຊາການທະຫານເມືອງພູກູດ ພວກເຮົາໄດ້ສ້າງແຜນງານສະເພາະໃນການຮັກສາຄວາມສະຫງົບຢູ່ແຕ່ລະຈຸດທີ່ສໍາຄັນໃນຂອບເຂດຮັບຜິດຊອບ ພ້ອມທັງໄດ້ມີການປະສານງານກັບຄະນະຮັບຜິດຊອບລວມ ແລະ ອໍານາດການປົກຄອງຂັ້ນຕ່າງໆ ໃນການກະກຽມຄວາມພ້ອມແຕ່ຫົວທີເພື່ອຮັບໃຊ້ວຽກງານປ້ອງກັນຄວາມສະຫງົບທັງກ່ອນ ແລະ ໃນໄລຍະດໍາເນີນການແຂ່ງຂັນກໍໄດ້ມີການກຽມຄວາມພ້ອມທາງກຳລັງ, ເຄື່ອງມືຮັບໃຊ້ວິຊາສະເພາະ ແລະອື່ນໆ ໃນພາວະຄົບຖ້ວນ.


ສະຫາຍ ພັນໂທ ບຸນຍໍ້ ພົມມະຈັນ ກ່າວຕື່ມວ່າ: ຜ່ານການເຄື່ອນໄຫວຕາມພາລະບົດບາດ ແລະໜ້າທີ່ທີ່ໄດ້ຮັບມອບໝາຍຈາກ ພັກ-ລັດ ຂັ້ນເທິງ; ກົມກອງພວກເຮົາໄດ້ປັບປຸງລະບົບປະຈໍາການຢ່າງເປັນລະບົບຄົບຊຸດໂດຍໄດ້ສ້າງແຜນຄາດກະ ກໍລະນີທີ່ຈະເກີດຂຶ້ນ ແລະໄດ້ຈັດຕັ້ງນໍາໃຊ້ກຳລັງແບ່ງອອກເປັນ 3 ພາກສ່ວນຄື: ພາກສ່ວນບັນຊາ, ພາກສ່ວນປ້ອງກັນຢູ່ແຕ່ລະຈຸດ ແລະພາກສ່ວນກອງຫຼອນເຄື່ອນໄຫວປ້ອງກັນເວນຍາມຕາມສາຍທາງເລກ 7 ແລະພູກູດຈອມເຫຼັກ. ພ້ອມນັ້ນ, ຍັງປ້ອງກັນໃຫ້ແກ່ສະຖານທີ່ທ່ອງທ່ຽວ ແລະ ບັນດາເຂດເຊື່ອມຕໍ່ລະຫວ່າງເມືອງຕໍ່ເມືອງ, ເມືອງຕໍ່ແຂວງ ແລະ ນໍາໃຊ້ບັນດາກໍາລັງປ້ອງກັນສໍາຮອງເຄື່ອນໄຫວເວນຍາມທາງເຂົ້າ-ອອກບ້ານ ແລະສຳນັກງານອົງການຕ່າງໆ ຊຶ່ງຕະຫຼອດໄລຍະການຈັດຕັ້ງປະຕິບັດປ້ອງກັນເວນຍາມຈົນມາຮອດປັດຈຸບັນບັນດາພື້ນທີ່ໃນຂອບເຂດຮັບຜິດຊອບ ທະຫານເມືອງພູກູດ ແມ່ນສາມາດຮັກສາໄດ້ຄວາມສະຫງົບໂດຍພື້ນຖານ, ທັງນີ້ກໍຍ້ອນມີຂັ້ນເທິງທີ່ກ່ຽວຂ້ອງຫຼາຍພາກສ່ວນໄດ້ເອົາໃຈໃສ່ໃກ້ຊິດຕິດແທດ ແລະຊີ້ນໍາບັນຊາບັນດາກຳລັງປ້ອງກັນຊາດ-ປ້ອງກັນຄວາມສະຫງົບເມືອງເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບສູງ ແລະພໍ່ແມ່ປະຊາຊົນຊັ້ນຄົນຕ່າງໆ ກໍລ້ວນແຕ່ໄດ້ເປັນຫູເປັນຕາ ຊ່ວຍກັນຕິດຕາມທຸກການເຄື່ອນໄຫວຂອງອິດທິກຳລັງປໍລະປັກ ແລະພວກກຸ່ມຄົນບໍ່ຫວັງດີຢ່າງເຂັ້ມແຂງ.

ທັງໝົດນີ້ແມ່ນໝາກຜົນແຫ່ງການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ຂັ້ນສູນກາງລົງຮອດທ້ອງຖິ່ນ ເວົ້າລວມ; ເວົ້າສະເພາະຢູ່ເມືອງພູກູດ ຍ້ອນເປັນເຈົ້າການເຮັດວຽກງານປ້ອງກັນຄວາມສະຫງົບມີຄວາມຮຽບຮ້ອຍຂອງກຳລັງປ້ອງກັນຊາດ-ປ້ອງກັນຄວາມສະຫງົບ, ກໍາລັງກອງຫຼອນ ແລະການປະກອບສ່ວນຊຸກຍູ້ວັດຖຸ, ກໍາລັງໃຈຈາກປະຊາຊົນຊັ້ນຄົນຕ່າງໆ ຈຶ່ງເຮັດໃຫ້ງານກິລາຊຽງຂວາງເກມດຳເນີນມາຮອດປັດຈຸບັນມີຄວາມສະຫງົບສຸກໂດຍພື້ນຖານ.
(ຮຽບຮຽງໂດຍ: ທີມຂ່າວໜັງສືພິມປະຊາຊົນ)

แชร์