ເປີດກອງປະຊຸມວຽກງານໄອຍະການປະຊາຊົນທົ່ວປະເທດ

ກອງປະຊຸມສະຫຼຸບວຽກງານໄອຍະການປະຊາຊົນທົ່ວປະເທດ ປະຈໍາປີ 2022 ໄດ້ເປີດຂຶ້ນຢ່າງເປັນທາງການໃນວັນທີ 20 ທັນວານີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍພາຍໃຕ້ການເປັນປະທານ ແລະ ກ່າວເປີດຂອງທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ມີອົງການໄອຍະການປະຊາຊົນພາກ, ເຂດ, ແຂວງ, ນະຄອນຫຼວງວຽງຈັນ, ພ້ອມດ້ວຍພະນັກງານອົງການໄອຍະການທະຫານທົ່ວປະເທດ ເຂົ້າຮ່ວມ.

ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດໄດ້ຜ່ານບົດສະຫຼຸບການເຄື່ອນໄຫວວຽກງານໄອຍະການປະຊາຊົນທົ່ວປະເທດ ປະຈໍາປີ 2022 ແລະທິດທາງແຜນການປະຈໍາປີ 2023. ສໍາລັບວຽກງານກົງຈັກການຈັດຕັ້ງ ແລະກໍ່ສ້າງພັກ-ພະນັກງານໄດ້ເອົາໃຈໃສ່ປັບປຸງບູລະນະກົງຈັກການຈັດຕັ້ງ ແລະພັດທະນາບຸກຄະລາກອນ ແຕ່ສູນກາງລົງຮອດທ້ອງຖິ່ນໂດຍໄດ້ປັບປຸງ, ກໍານົດພາລະບົດບາດ, ສິດ ແລະໜ້າທີ່ຂອງບັນດາກົມ, ຫ້ອງການ, ສະຖາບັນຄົ້ນຄວ້າ ແລະຝຶກອົບຮົມໄອຍະການ, ອົງການໄອຍະການປະຊາຊົນພາກ, ເຂດ, ແຂວງ, ນະຄອນຫຼວງ. ໂດຍລວມແລ້ວຜ່ານມາກົງຈັກການຈັດຕັ້ງແຕ່ສູນກາງລົງຮອດທ້ອງຖິ່ນມີຄວາມໜັກແໜ້ນ ແລະເຂັ້ມແຂງເຮັດຫຼ້ອນໜ້າທີ່ໃນການຕິດຕາມກວດກາການເຄົາລົບ ແລະ ປະຕິບັດກົດໝາຍ ດີຂຶ້ນເທື່ອລະກ້າວ, ເຮັດໃຫ້ການຕິດຕາມກວດກາຂອງອົງການໄອຍະການປະຊາຊົນສາມາດເຂົ້າເຖິງບ່ອນຫ່າງໄກສອກຫຼີກຫຼາຍຂຶ້ນ. ໂດຍຊີ້ໃຫ້ເຫັນຜົນສໍາເລັດ, ຂໍ້ຄົງຄ້າງ, ບົດຮຽນທີ່ຖອດຖອນໄດ້. ພ້ອມນັ້ນ, ຜູ້ແທນກອງປະຊຸມຍັງໄດ້ພ້ອມກັນປະກອບຄໍາຄິດເຫັນຢ່າງກົງໄປກົງມາດ້ວຍຄວາມຮັບຜິດຊອບສູງ.

ໃນໂອກາດນີ້, ທ່ານ ໄຊຊະນະ ໂຄດພະທອນ ໄດ້ຮຽກຮ້ອງໃຫ້ຄະນະນຳອົງການໄອຍະການປະຊາຊົນ ແລະ ອົງການໄອຍະການທະຫານແຕ່ລະຂັ້ນຈົ່ງພ້ອມກັນເອົາໃຈໃສ່ການກໍ່ສ້າງພັກ-ພະນັກງານ, ການປັບປຸງກົງຈັກການຈັດຕັ້ງເປັນຕົ້ນ ອົງການໄອຍະການປະຊາຊົນເຂດປະຈຳເມືອງ, ຍົກລະດັບບຸກຄະລາກອນໃຫ້ມີຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຮູ້-ຄວາມສາມາດດ້ານວິຊາສະເພາະ, ການປະຕິບັດສິດ ແລະພາລະບົດບາດໃນການຕິດຕາມກວດກາການປະຕິບັດກົດໝາຍ ເປັນຕົ້ນ: ການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນຂອງເຈົ້າໜ້າທີ່ພາສີ, ປ່າໄມ້, ອົງການກວດກາລັດ ແລະການສັ່ງຟ້ອງຜູ້ຖືກຫາຂຶ້ນສານຕາມທີ່ກົດໝາຍກໍານົດໄວ້ຢ່າງມີຜົນສັກສິດ, ຕັ້ງໜ້າປະຕິບັດແນວທາງການຕ່າງປະເທດຂອງພັກ ແລະລັດ ຢ່າງເປັນເຈົ້າການ ແລະ ມີຜົນສໍາເລັດຕົວຈິງ, ສົມເປັນເຄື່ອງມືຜະເດັດການກຳມະຊີບຂອງພັກ.
(ຂ່າວ: ຈະເລີນສິນ, ພາບ: ຍຸພິນທອງ)

แชร์