ຄະນະຮັບຜິດຊອບຈັດງານຊຽງຂວາງເກມ ຫາລືກະກຽມພິທີປິດໃຫ້ດຳເນີນໄປດ້ວຍຜົນສຳເລັດ

ຄະນະຮັບຜິດຊອບຈັດງານມະຫະກຳກິລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ໄດ້ຈັດກອງປະຊຸມເພື່ອປຶກສາຫາລື, ແລກປ່ຽນຄຳຄິດຄຳເຫັນ, ແກ້ໄຂຂໍ້ຂາດຕົກບົກຜ່ອງ, ຂໍ້ຄົງຄ້າງຂອງແຕ່ລະອະນຸກຳມະການຮັບຜິດຊອບຈັດງານກິລາຊຽງຂວາງ ເກມ 2022 ເພື່ອໃຫ້ງານປິດລົງດ້ວຍຜົນສຳເລັດອັນຈົບງາມໃນວັນທີ 19 ທັນວາ 2022 ທີ່ຫ້ອງວ່າການປົກຄອງແຂວງຊຽງຂວາງ, ໂດຍມີທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ທັງເປັນປະທານຈັດງານມະຫະກຳກິລາແຫ່ງຊາດ ຄັ້ງທີ 11 ພ້ອມດ້ວຍບັນດາຫົວໜ້າອະນຸກຳມະການຕ່າງໆເຂົ້າຮ່ວມ.

ໃນກອງປະຊຸມ, ບັນດາຫົວໜ້າອະນຸກຳມະການໄດ້ລາຍງານສະພາບການຈັດຕັ້ງປະຕິບັດວຽກງານຂອງຕົນຈິງລວມທັງຈຸດດີ, ຂໍ້ຄົງຄ້າງທີ່ຈະຕ້ອງໄດ້ປັບປຸງນັບແຕ່ກ່ອນເປີດການແຂ່ງຂັນຢ່າງເປັນທາງການຈົນມາຮອດປັດຈຸບັນ. ໂອກາດດັ່ງກ່າວ, ທ່ານ ບຸນຈັນ ສີວົງພັນ ໄດ້ສະແດງຄວາມຍ້ອງຍໍ, ຊົມເຊີຍຕໍ່ການປະຕິບັດໜ້າທີ່ວຽກງານຂອງແຕ່ລະອະນຸກຳມະການໃນໄລຍະຜ່ານມາກໍຄືປັດຈຸບັນ ທີ່ເຮັດໃຫ້ການເປີດງານມະຫະກຳກິລາແຫ່ງຊາດຄັ້ງນີ້ດຳເນີນໄປດ້ວຍຜົນສຳເລັດອັນຈົບງາມ, ບາງປະເພດກິລາກໍໄດ້ສຳເລັດການແຂ່ງຂັນແລະມອບຫຼຽນເປັນທີ່ຮຽບຮ້ອຍແລ້ວ,ຊຶ່ງເປັນຜົນງານ ແລະໜ້າທີ່ຮັບຜິດຊອບຂອງແຕ່ລະອະນຸກຳມະການທີ່ກ່ຽວຂ້ອງທີ່ໄດ້ສຸມໃສ່ຈັດຕັ້ງປະຕິບັດຈົນປະສົບຜົນສຳເລັດຕາມຄາດໝາຍ, ພ້ອມດ້ວຍບັນດາສື່ມວນຊົນທັງສູນກາງ ແລະທ້ອງຖິ່ນທີ່ໄດ້ສຸມທຸກກຳລັງແຮງເພື່ອໂຄສະນາເຜີຍແຜ່ຂໍ້ມູນຂ່າວສານຕ່າງໆ ກໍຄືການແຂ່ງຂັນກິລາປະເພດຕ່າງໆດ້ວຍຄວາມຮັບຜິດຊອບສູງ, ມີຈັນຍາບັນ, ຈັນຍາທຳ ແລະສອດຄ່ອງຕາມແນວທາງ.

ພ້ອມນັ້ນ, ທ່ານເຈົ້າແຂວງຍັງໄດ້ເນັ້ນໃຫ້ບັນດາອະນຸກຳມະການສືບຕໍ່ຈັດຕັ້ງປະຕິບັດ, ປະສານສົມທົບເຊິ່ງກັນ ແລະກັນເປັນປົກກະຕິເພື່ອເຮັດໃຫ້ວຽກງານດຳເນີນໄປດ້ວຍຜົນສຳເລັດ, ປາສະຈາກຂໍ້ບົກຜ່ອງເພື່ອປະກອບສ່ວນເຮັດໃຫ້ພິທີປິດງານມະຫະກຳກິລາແຫ່ງຊາດ ຄັ້ງທີ 11 ຈົບລົງດ້ວຍຜົນສຳເລັດອັນຈົບງາມ.

ຂ່າວໂດຍ: ບຸນນິກ

แชร์