ສະເໜີປັບປຸງກົດໝາຍວ່າດ້ວຍທຸລະກຳທາງເອເລັກໂຕຣນິກ

ການປັບປຸງກົດໝາຍ ວ່າດ້ວຍທຸລະກຳທາງເອເລັກໂຕຣນິກ ມີເປົ້າໝາຍເພື່ອໃຫ້ກົດໝາຍສະບັບນີ້ເປັນເຄື່ອງມືຊຸກຍູ້ໃຫ້ການຄຸ້ມຄອງລັດດ້ານວຽກງານທຸລະກຳທາງເອເລັກໂຕຣນິກ ໃຫ້ມີປະສິດທິພາບ, ທັງເຮັດໃຫ້ເນື້ອໃນຂອງກົດໝາຍມີຄວາມຈະແຈ້ງ, ລະອຽດ, ຮັດກຸມ, ສອດຄ່ອງກັບສະພາບຄວາມເປັນຈິງຂອງການພັດທະນາເສດຖະກິດ-ສັງຄົມໃນປັດຈຸບັນ ແລະສາມາດເຊື່ອມໂຍງກັບພາກພື້ນ ແລະສາກົນ.

ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ (ຕສ) ໄດ້ສະເໜີກົດໝາຍ ວ່າດ້ວຍທຸລະກຳທາງເອເລັກໂຕຣນິກ (ປັບປຸງ) ຕໍ່ກອງປະຊຸມສະໄໝສາມັນ ເທື່ອທີ 4 ຂອງ ສະພາແຫ່ງຊາດ ຊຸດທີ IX ໃນຕອນບ່າຍຂອງວັນທີ 19 ທັນວາ ນີ້ ໂດຍການເປັນປະທານ ຂອງ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ.

ທ່ານລັດຖະມົນຕີ ກະຊວງ ຕສ ກ່າວວ່າ: ໃນໄລຍະຜ່ານມາ ກົດໝາຍ ວ່າດ້ວຍທຸລະກຳທາງເອເລັກໂຕຣນິກ ໄດ້ເປັນເຄື່ອງມືໃນການຊຸກຍູ້ ສົ່ງເສີມ ການນຳໃຊ້, ການຫັນເປັນທັນສະໄໝ, ການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ. ແຕ່ເພື່ອໃຫ້ວຽກງານທຸລະກຳທາງເອເລັກໂຕຣນິກມີປະສິດທິພາບຂຶ້ນກວ່າເກົ່າ, ມີຄວາມສອດຄ່ອງ ແລະ ສາມາດເຊື່ອມໂຍງເສດຖະກິດພາກພື້ນ ແລະ ສາກົນໄດ້ເຊັ່ນ: ສັນຍາຮ່ວມມືອາຊຽນ-ອົສຕຣາລີ-ນິວຊີແລນ (AANZITA), ສັນຍາຮ່ວມມືເສດຖະກິດຮອບດ້ານລະດັບພາກພື້ນ (RCEP), ສັນຍາຮ່ວມມືການຄ້າທາງເອເລັກໂຕຣນິກອາຊຽນ (ASEAN ECA), ອົງການການຄ້າໂລກ (WTO) ແລະ ກົດ ໝາຍຕົ້ນແບບຂອງສະຫະປະຊາຊາດ (UNCI TRAL Model Law). ອີກບັນຫາໜຶ່ງທີ່ສຳຄັນກໍຄື ກົດໝາຍວ່າດ້ວຍລາຍເຊັນເອເລັກໂຕຣນິກ ໄດ້ຜ່ານການຮັບຮອງຈາກສະພາ ແລະປະກາດນຳໃຊ້ ໃນປີ 2019 ຊຶ່ງກົດໝາຍສະບັບນີ້ ມີການກໍານົດບາງເນື້ອໃນຊໍ້າຊ້ອນ ແລະບໍ່ສອດຄ່ອງກັບກົດໝາຍທຸລະກໍາທາງເອເລັກໂຕຣນິກ ເຮັດໃຫ້ເກີດຄວາມສັບສົນໃນການຄຸ້ມຄອງນໍາໃຊ້ ລາຍເຊັນເອເລັກໂຕຣນິກ ໃນໄລຍະຜ່ານມາ.

ຕໍ່ກັບສາເຫດທີ່ກ່າວມາຂ້າງເທິງນັ້ນ ຄະນະຮັບຜິດຊອບປັບປຸງກົດໝາຍໄດ້ຄົ້ນຄວ້າມາປະເມີນເຫັນວ່າມີເຫດຜົນ ແລະຄວາມຈໍາເປັນທີ່ຈະຕ້ອງໄດ້ປັບປຸງເນື້ອໃນຂອງກົດໝາຍສະບັບນີ້ຄືນ ເພື່ອໃຫ້ມີຄວາມສອດຄ່ອງ, ຈະແຈ້ງ, ລະອຽດ, ຮັດກຸມ, ສາມາດຈັດຕັ້ງປະຕິບັດໃຫ້ມີປະສິດທິພາບກວ່າເກົ່າ ແລະສອດຄ່ອງກັບສະພາບການພັດທະນາເສດຖະກິດ-ສັງຄົມໃນປັດຈຸບັນ ພ້ອມທັງສອດຄ່ອງກັບພາກພື້ນ ແລະສາກົນ.

ກົດໝາຍວ່າດ້ວຍທຸລະກຳທາງເອເລັກໂຕຣນິກ ສະບັບປັບປຸງ ປະກອບມີ ທັງໝົດ 12 ພາກ, 5 ໝວດ ແລະ 75 ມາດຕາໃນນັ້ນໄດ້ຕັດອອກ ຈຳນວນ 22 ມາດຕາ, ປັບປຸງເນື້ອໃນຈຳນວນ 25 ມາດຕາ.

ພາຍຫຼັງທີ່ກົດໝາຍສະບັບນີ້ໄດ້ຜ່ານການຮັບຮອງຈາກສະພາແຫ່ງຊາດແລ້ວຈະກາຍເປັນນິຕິກຳພື້ນຖານໃຫ້ແກ່ການຄຸ້ມຄອງວຽກງານທຸລະກຳທາງເອເລັກໂຕຣນິກ ໃຫ້ມີປະສິດຕິຜົນກວ່າເກົ່າ ແນໃສ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ 11 ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ແລະ ວິໃສທັດ ແລະ ຍຸດທະສາດການພັດທະນາເຕັກໂນໂລຊີ ແລະ ການສື່ສານຂອງປະເທດເຮົາໃຫ້ປະກົດຜົນເປັນຈິງ.

ກົດໝາຍສະບັບປັບປຸງນີ້ຈະໄດ້ຮັບຜົນປະໂຫຍດຄື: ກົນໄກການຄຸ້ມຄອງການດຳເນີນທຸລະກິດເປັນຕົ້ນແມ່ນການອະນຸຍາດດຳເນີນທຸລະກິດ, ການປະຕິບັດເງື່ອນໄຂເພີ່ມເຕີມພາຍຫຼັງການໄດ້ຮັບອະນຸຍາດດຳເນີນທຸລະກິດ, ຄວາມໜ້າເຊື່ອຖືຂອງການເຮັດທຸລະກຳທາງເອເລັກໂຕຣນິກ, ການພິສູດ ແລະຢັ້ງຢືນຕົວຕົນທາງດີຈີຕອນ ຊຶ່ງຈະສ້າງຄວາມເຊື່ອໝັ້ນ, ຄວາມປອດໄພໃຫ້ແກ່ການເຮັດທຸລະກຳທາງເອເລັກໂຕຣນິກ, ກົດໝາຍສະບັບນີ້ຍັງເປັນພື້ນຖານອັນສຳຄັນໃຫ້ແກ່ຂະແໜງການເຕັກໂນໂລຊີ ແລະການສື່ສານ ແລະຂະແໜງການອື່ນເພື່ອນຳໃຊ້ເຂົ້າໃນການຄຸ້ມຄອງລັດ, ຄຸ້ມຄອງສັງຄົມ, ປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ເຮັດທຸລະກຳທາງເອເລັກໂຕຣນິກ, ເຊື່ອມໂຍງກັບພາກພື້ນ ແລະສາກົນ ທັງເປັນການຊຸກຍູ້ ແລະສົ່ງເສີມການລົງທຶນຂອງຫົວໜ່ວຍທຸລະກິດທັງພາຍໃນ ແລະຕ່າງປະເທດ.
(ຂ່າວ-ພາບ: ສຳນານ)

แชร์