ນະຄອນຫຼວງ ບຽດຊະນະ ເຈົ້າພາບ 2-1 ຜ່ານເຂົ້າຊີງຫຼຽນຄຳ ກັບ ແຂວງວຽງຈັນ ເຕະບານຊາຍ ຊຽງຂວາງເກມ ແລງມື້ອື່ນ

ທັບນັກເຕະບານນະຄອນຫຼວງວຽງຈັນ ຍັງສ້າງຜົນງານໄດ້ຢ່າງໂດດເດັ່ນສົມລາຄາແຊ໋ມເຕະບານ ແຫ່ງຊາດ ປີ 2022 ຫຼັງສາມາດເອົາຊະນະ ແຂວງຊຽງຂວາງ ເຈົ້າພາບ ໄປໄດ້ແບບຫວຸດຫວິດ 2-1 ປະຕູ ຜ່ານເຂົ້າສູ່ຮອບຊີງຊະນະເລີດ ຫຼືຮອບຊີງຫຼຽນຄຳ ພົບກັບ ແຂວງວຽງຈັນ ທີ່ເອົາຊະນະຈຸດໂທດ ແຂວງເຊກອງ ມ້າມືດໄປໄດ້ 3-2 ປະຕູ ໃນການແຂ່ງຂັນເຕະບານຊາຍງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງເປັນເຈົ້າພາບໃນຕອນແລງມື້ນີ້.

ການແຂ່ງຂັນເຕະບານຊາຍ ໃນງານມະຫະກໍາກິລາແຫ່ງຊາດ ຄັ້ງທີ 11 ຫຼື ຊຽງຂວາງເກມ ຮອບຮອງຊະນະເລີດ ຫຼື ຮອບ 4 ທີມສຸດທ້າຍ ໄດ້ມີຂຶ້ນໃນຕອນບ່າຍວັນທີ 19 ທັນວາ 2022 ທີ່ສະໜາມກິລາໄຫຫີນ ບ້ານຄັງໜອງຫຼວງ ເມືອງແປກ ແຂວງຊຽງຂວາງ, ໂດຍຄູ່ທໍາອິດ ເປັນການພົບກັນ ລະຫວ່າງ ແຂວງວຽງຈັນ ແລະ ແຂວງເຊກອງ ແລະຄູ່ທີ 2 ແຂວງຊຽງຂວາງເຈົ້າພາບ ແລະນະຄອນຫຼວງວຽງຈັນ.

ຊຶ່ງການແຂ່ງຂັນຄູ່ທຳອິດ ລະຫວ່າງ ແຂວງວຽງຈັນ ແລະ ແຂວງເຊກອງ ດຳເນີນໄປຢ່າງສູສີ ແລະດຸເດືອດ ກ່ອນໃນໄລຍະທ້າຍເຄິ່ງເວລາທີ 2 ນາທີ 82 ແຂວງວຽງຈັນ ຈະເຫຼືອຜູ້ຫຼິ້ນພຽງ 10 ຄົນ ເນື່ອງຈາກ ຄຳມະນີ ທອງດາວົງ ກອງຫຼັງ ໄປເຕະດ້ານຫຼັງ ເປບຊີ ທີ່ພວມຫຼຸດດ່ຽວເຂົ້າໄປ ເຮັດໃຫ້ກຳມະການຕັດສິນໃຈໃຫ້ໃບແດງທັນທີ. ແຕ່ຢ່າງໃດກໍຕາມ, ເຖິງວ່າແຂວງວຽງຈັນ ຈະເຫຼືອຜູ້ຫຼິ້ນພຽງ 10 ຄົນ ກໍຕາມແຕ່ກໍຍັງຕ້ານ ແຂວງເຊກອງ ໄວ້ໄດ້ເຮັດໃຫ້ຈົບ 90 ນາທີຍັງສະເໝີກັນ 0-0 ຕ້ອງໄດ້ຕໍ່ເວລາພິເສດອອກໄປອີກ 30 ນາທີ ແຕ່ຍັງສອງທີມກໍຍັງຍິງປະຕູກັນບໍ່ໄດ້ ເຮັດໃຫ້ຕ້ອງໄດ້ຕັດສິນ ເຂົ້າຮອບດ້ວຍການຍິງຈຸດໂທດ. ຜ່ານການຍິງຈຸດໂທດຜົນປະກົດວ່າກາຍເປັນແຂວງວຽງຈັນ ທີ່ຍິງໄດ້ແມ້ນກວ່າ ແລະມີຜູ້ຮັກສາປະຕູດີກຣີອະດີດທີມຊາດລາວຢ່າງ ແສງພະຈັນ ບຸນທິສານ ຊ່ວຍເຊັບຈຸດໂທດໄວ້ໄດ້ເຖິງ 3 ລູກໃນນັດດຽວ ຊ່ວຍພາທີມແຂວງວຽງຈັນ ຜ່ານເຂົ້າສູ່ຮອບຊີງຊະນະເລີດໄດ້ສຳເລັດ.

ສ່ວນຜົນການແຂ່ງຂັນອີກຄູ່ລະຫວ່າງ ແຂວງຊຽງຂວາງ ເຈົ້າພາບ ແລະນະຄອນຫຼວງວຽງຈັນ ເຈົ້າຂອງແຊ໋ມການແຂ່ງຂັນເຕະບານແຫ່ງຊາດ ປະຈຳປີ 2022 ຍັງສ້າງຜົນງານໄດ້ຢ່າງໂດດເດັ່ນ ໄລ່ບຽດເອົາຊະນະ ແຂວງຊຽງຂວາງ ເຈົ້າພາບ ໄປໄດ້ແບບຫວຸດຫວິດ 2-1 ປະຕູ ຜ່ານເຂົ້າສູ່ຮອບຊີງຊະນະເລີດ ຫຼື ຮອບຊີງຫຼຽນຄຳ ໄປພົບກັບ ແຂວງວຽງຈັນ ໄດ້ສຳເລັດ.

ສຳລັບການແຂ່ງຂັນເຕະບານຊາຍ ຊຽງຂວາງ ເກມ ຮອບຊີງຊະນະເລີດ ລະຫວ່າງ ນະຄອນຫຼວງວຽງຈັນ ພົບກັບ ແຂວງວຽງຈັນ ຈະມີຂຶ້ນໃນວັນທີ 21 ທັນວາ 2022 ເວລາ 15:45 ໂມງ ແລະນັດຊີງອັນດັບທີ 3 ລະຫວ່າງ ແຂວງຊຽງຂວາງ ເຈົ້າພາບ ກັບ ແຂວງເຊກອງ ຈະມີຂຶ້ນໃນວັນດຽວກັນ ເວລາ 13:30 ໂມງ ຊຶ່ງທັງ 2 ຄູ່ແມ່ນຈະແຂ່ງຂັນທີ່ສະໜາມກິລາໄຫຫີນ.

ຂ່າວ: ບຸນນິກ

แชร์