ກອງທັບ ຊະນະ ຄໍາມ່ວນ 2-0 ເຊັດ ຄວ້າແຊ໋ມບານສົ່ງຫາດຊາຍ ທີມຊາຍ ຊຽງຂວາງເກມ

ກະຊວງປ້ອງກັນປະເທດ (ກອງທັບ) ສ້າງຜົນງານຢ່າງໂດດເດັ່ນຫຼັງໃນຮອບຊີງຊະນະເລີດ ສາມາດເອົາຊະນະ ແຂວງຄໍາມ່ວນ 2-0 ເຊັດ ຄວ້າແຊ໋ມ ຫຼື ຫຼຽນຄຳ ໄປຄອງໄດ້ສຳເລັດ ໃນການແຂ່ງຂັນກິລາບານສົ່ງຫາດຊາຍປະເພດທີມຊາຍໃນງານມະຫະກໍາກິລາແຫ່ງຊາດ ຄັ້ງທີ 11 (ຊຽງຂວາງເກມ) ໃນວັນທີ 18 ທັນວາ 2022 ທີ່ສະໜາມບານສົ່ງຫາດຊາຍ ບໍລິເວນແຄມນໍ້າຫງໍາ ແຂວງຊຽງຂວາງ, ສ່ວນອັນດັບ 3 ເປັນຂອງເຈົ້າພາບ ແຂວງຊຽງຂວາງ.

ສາລັບການແຂ່ງຂັນບານສົ່ງຫາດຊາຍ ປະເພດທີມຊາຍ ປະກອບມີ 10 ພາກສ່ວນ ຄື: 2 ກະຊວງ, 1 ນະຄອນຫຼວງວຽງຈັນ ແລະ 7 ແຂວງ, ແບ່ງອອກເປັນ 2 ກຸ່ມ, ກຸ່ມ ກ ປະກອບມີ ແຂວງເຊກອງ, ຄຳມ່ວນ, ອັດຕະປື, ແຂວງບໍ່ແກ້ວ ແລະກະຊວງປ້ອງກັນປະເທດ. ສ່ວນກຸ່ມ ຂ ປະກອບມີ ກະຊວງສາທາລະນະສຸກ, ນະຄອນຫຼວງວຽງຈັນ, ແຂວງໄຊຍະບູລີ, ຈຳປາສັກ ແລະ ເຈົ້າພາບ ແຂວງຊຽງຂວາງ. ຜ່ານການແຂ່ງຂັນຮອບຊີງຊະນະເລີດ ປະເພດທີມຊາຍ ຜົນປະກົດ ທັບນັກກິລາບານສົ່ງກະຊວງປ້ອງກັນປະເທດ ຍັງສ້າງຜົນງານໄດ້ຢ່າງໂດດເດັ່ນສົມລາຄາ ດ້ວຍການໄລ່ເອົາຊະນະ ແຂວງຄຳມ່ວນ ໄປໄດ້ແບບສະບາຍ 2-0 ເຊັດ ຄວ້າຫຼຽນຄຳ ໄປຄອງໄດ້ສຳເລັດສ່ວນຫຼຽນເງິນຕົກເປັນຂອງ ແຂວງຄຳມ່ວນ ແລະຫຼຽນທອງ ແຂວງຊຽງຂວາງ ເຈົ້າພາບ.

ສ່ວນການແຂ່ງຂັນບານສົ່ງຫາດຊາຍ ທີມຍິງ ມີ 2 ກະຊວງ ແລະ 5 ແຂວງ ແບ່ງເປັນ 2 ກຸ່ມ, ກຸ່ມ ກ ກະຊວງປ້ອງກັນປະເທດ, ແຂວງຈຳປາສັກ, ຄຳມ່ວນ ແລະ ແຂວງຫຼວງພະບາງ; ກຸ່ມ ຂ ເຈົ້າພາບ ແຂວງຊຽງຂວາງ, ກະຊວງສາທາລະນະສຸກ ແລະ ແຂວງອັດຕະປື. ຜ່ານການແຂ່ງຂັນໃນຮອບຊີງຊະນະເລີດ ຜົນປະກົດວ່າ ແຂວງຈໍາປາສັກ ສາມາດເອົາຊະນະກະຊວງປ້ອງກັນປະເທດ 2-0 ເຊັດ ຄວ້າຫຼຽນຄຳໄປຄອງ, ສ່ວນຫຼຽນເງິນ ກະຊວງປ້ອງກັນປະເທດ ແລະຫຼຽນທອງ ແຂວງອັດຕະປື.

ຂ່າວໂດຍ: ບຸນນິກ

แชร์