ກົດໝາຍ ວ່າດ້ວຍວິທະຍາສາດ-ເຕັກໂນໂລຊີ ສະເໜີປັບປຸງໃໝ່ໃຫ້ສອດຄ່ອງ ແຜນພັດທະນາເສດຖະກິດ-ສັງຄົມ

ກົດໝາຍວ່າດ້ວຍວິທະຍາສາດ ແລະເຕັກໂນໂລຊີ ໄດ້ມີການສະເໜີປັບປຸງໃໝ່ບາງມາດຕາເພື່ອໃຫ້ມີຄວາມສອດຄ່ອງກັບແຜນພັດທະນາເສດຖະກິດ-ສັງຄົມຕາມແຕ່ລະໄລຍະ ແລະເພື່ອເປັນບ່ອນອີງທາງດ້ານນິຕິກໍາແກ່ການຈັດຕັ້ງ ແລະເຄື່ອນໄຫວວຽກງານວິທະຍາສາດ ແລະເຕັກໂນໂລຊີ, ພາຍຫຼັງໄດ້ຜ່ານການຈັດຕັ້ງປະຕິບັດມາ 8 ປີ ນັບແຕ່ປີ 2013 ທີ່ຖືກຮັບຮອງ ແລະປະກາດໃຊ້.

ໃນວາລະການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ເມື່ອວັນທີ 13 ທັນວາ 2022, ທ່ານ ປອ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະ ກິລາ ກ່າວວ່າ: ການປັບປຸງກົດໝາຍ ວ່າດ້ວຍວິທະຍາສາດ ແລະ ເຕັກໂນໂລຊີ ໃນຄັ້ງນີ້ ແມ່ນແນໃສ່ເຮັດໃຫ້ກົດໝາຍມີຄວາມໃນໄລຍະໃໝ່, ພ້ອມທັງປັບປຸງກົນໄກການຄຸ້ມຄອງວຽກງານສອດຄ່ອງກັບແຜນພັດທະນາປະເທດຊາດ ວິທະຍາສາດ ແລະ ເຕັກໂນໂລຊີ ໃຫ້ສອດຄ່ອງກັບສະພາບການປັບປຸງກົງຈັກການຈັດຕັ້ງຕາມມະຕິຕົກລົງຂອງກົມການເມືອງສູນກາງພັກ ວ່າດ້ວຍການຍຸບເລີກ ກະຊວງວິທະຍາສາດ ແລະ ເຕັກໂນໂລຊີ ສະບັບເລກທີ 06/ກມສຄ,ລົງວັນທີ 25 ກຸມພາ 2021 ໂດຍສະເພາະການເຄື່ອນໄຫວວຽກງານວິທະຍາສາດ ຕາມ 4 ໜ້າວຽກຫຼັກ (ການຄົ້ນຄວ້າວິທະຍາສາດ, ການພັດທະນາເຕັກໂນໂລຊີ, ການພັດທະນານະວັດຕະກໍາ ແລະ ການບໍລິການດ້ານວິທະຍາສາດ ແລະ ເຕັກໂນໂລຊີ ໃຫ້ສາມາດຂັບເຄື່ອນໄດ້ຢ່າງຮັດກຸມ ແລະ ເຮັດໃຫ້ການຈັດຕັ້ງປະຕິບັດກົດໝາຍມີຄວາມສັກສິດ, ມີຄວາມໂປ່ງໃສ ແລະ ສາມາດດຶງດູດການລົງທຶນຈາກຕ່າງປະເທດໄດ້ໃນອະນາຄົດ.

ການປັບປຸງກົດໝາຍ ວ່າດ້ວຍວິທະຍາສາດ ແລະ ເຕັກໂນໂລຊີໃນຄັ້ງນີ້, ມີເປົ້າໝາຍ ເພື່ອຄຸ້ມຄອງ, ກວດກາການເຄື່ອນໄຫວວຽກງານວິທະຍາສາດ ແລະ ເຕັກໂນໂລຊີ ຢ່າງເປັນລະບົບ ແນໃສ່ຊຸກຍູ້ ສົ່ງເສີມການຄົ້ນຄວ້າ, ການນໍາໃຊ້ວິທະຍາສາດ, ການຖ່າຍທອດເຕັກໂນໂລຊີ, ການປະດິດສ້າງ, ນະວັດຕະກໍາ ແລະ ການບໍລິການດ້ານເຕັກໂນໂລຊີທີ່ກ້າວໜ້າປະກອບສ່ວນເຂົ້າໃນການຫັນເປັນອຸດສາຫະກຳ ແລະຫັນເປັນທັນສະໄໝ, ການພັດທະນາເສດຖະກິດ-ສັງຄົມ, ການປົກປັກຮັກສາປະເທດຊາດ ແລະ ສາມາດເຊື່ອມໂຍງກັບພາກພື້ນ ແລະ ສາກົນ.

ຮ່າງກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ ສະບັບເລກທີ 30/ສພຊ ລົງວັນທີ 19 ກໍລະກົດ 2013 ປະກອບມີ 12 ພາກ, 8 ໝວດ ແລະ 69 ມາດຕາ; ສໍາລັບຮ່າງກົດໝາຍ ວ່າດ້ວຍວິທະຍາສາດ ແລະ ເຕັກໂນໂລຊີ ສະບັບປັບປຸງໃໝ່ ທັງໝົດລວມມີ 10 ພາກ, 8 ໝວດ ແລະ 62 ມາດຕາ. ໃນນັ້ນ, ໄດ້ມີການປັບປຸງ ຄື: ຕັດອອກ 2 ພາກ, 9 ມາດຕາ, ປັບປຸງເນື້ອໃນ 33 ມາດຕາ ແລະ ສ້າງໃໝ່ 2 ມາດຕາ.

ທ່ານຮອງລັດຖະມົນຕີ ກະຊວງ ສສກ ກ່າວຕື່ມວ່າ: ເມື່ອກົດໝາຍສະບັບປັບປຸງໃໝ່ນີ້ ຖືກຮັບຮອງ ແລະ ປະກາດໃຊ້ແລ້ວ ສປປ ລາວ ຈະໄດ້ຮັບຜົນປະໂຫຍດຫຼາຍຢ່າງ. ໃນນັ້ນ, ອັນຕົ້ນຕໍ ແມ່ນການດຳເນີນວຽກງານການຄົ້ນຄວ້າ ແລະ ພັດທະນາວິທະຍາສາດ ແລະ ເຕັກໂນໂລຊີ ຈະຖືກຕ້ອງ ແລະ ສອດຄ່ອງກັບແນວທາງນະໂຍບາຍຂອງພັກ-ລັດ, ລັດຖະທຳມະນູນ ແລະ ກົດໝາຍຂອງ ສປປ ລາວ ພ້ອມທັງແທດເໝາະກັບສະພາບຄວາມເປັນຈິງໃນການພັດທະນາເສດຖະກິດ-ສັງຄົມ ຂອງຊາດ; ອົງການຈັດຕັ້ງຄຸ້ມຄອງ, ອົງການທີ່ກ່ຽວຂ້ອງ ແລະ ຜູ້ດໍາເນີນວຽກງານວິທະຍາສາດ ແລະ ເຕັກໂນໂລຊີຈະມີນິຕິກໍາເພື່ອເປັນບ່ອນອີງໃນການຈັດຕັ້ງປະຕິບັດວຽກງານຢ່າງເປັນລະບົບ ແລະ ມີປະສິດທິທິພາບສູງຂຶ້ນກວ່າເກົ່າ; ບັນດາຂະແໜງການທີ່ກ່ຽວຂ້ອງ, ບັນດາອົງການຈັດຕັ້ງ ແລະ ປະຊາຊົນລາວບັນດາເຜົ່າຈະໄດ້ຮັບຮູ້ ແລະ ຈະສາມາດເປັນເຈົ້າການປະກອບສ່ວນໃນການຈັດຕັ້ງປະຕິບັດວຽກງານວິທະຍາສາດ ແລະ ເຕັກໂນໂລຊີ; ສາມາດສ້າງຄວາມເຊື່ອໝັ້ນໃຫ້ແກ່ນັກພັດທະນາ, ນັກປະດິດສ້າງ ແລະ ນັກລົງທຶນທັງພາຍໃນ ແລະ ຕ່າງປະເທດ ໃນການປະກອບສ່ວນລົງທຶນເຂົ້າໃນການຊຸກຍູ້ສົ່ງເສີມການຄົ້ນຄວ້າ ແລະ ພັດທະນາວິທະຍາສາດ ແລະ ເຕັກໂນໂລຊີຂອງປະເທດເຮົາ, ພ້ອມທັງເປັນການປະກອບສ່ວນໃຫ້ ສປປ ລາວ ເປັນເຈົ້າການໃນການເຊື່ອມໂຍງກັບພາກພື້ນ ແລະສາກົນ.

ໂດຍ: ຄຳນ້ອຍ; ພາບ: ສຳນານ

แชร์