ກອງທັບ ຄອງອັນດັບ 1 ການແຂ່ງຂັນກັອບ ຊຽງຂວາງເກມ

ທັບນັກກິລາກັອບກະຊວງປ້ອງກັນປະເທດສ້າງຜົນງານໄດ້ຢ່າງໂດດເດັ່ນຫຼັງຄວ້າມາໄດ້ເຖິງ 3 ຈາກ 4 ຫຼຽນຄຳ ຈາກປະເພດທີມຊາຍ 1 ຫຼຽນຄຳ, ປະເພດທີມ ມີແຕ້ມຕໍ່ 1 ຫຼຽນຄຳ ແລະ ປະເພດບຸກຄົນ 1 ຫຼຽນຄຳ ປິດສາກການແຂ່ງຂັນກິລາກັອບ ງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ.
ເມື່ອວັນທີ 17 ທັນວາ 2022 ຢູ່ສະໜາມກັອບ ພູກູດທອງຄຳ ເມືອງແປກ ແຂວງຊຽງຂວາງ ໄດ້ມີພິທີມອບຫຼຽນການແຂ່ງຂັນກິລາກັອບ ຢ່າງເປັນທາງການ, ໂດຍການເຂົ້າຮ່ວມຂອງ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ທ່ານ ຮສ.ປອ ກອງສີ ແສງມະນີ ປະທານສະຫະພັນກິລາກັອບແຫ່ງຊາດ, ມີຄະນະນຳ, ຄູຝຶກ ແລະ ນັກກິລາ ແຕ່ລະພາກສ່ວນຢ່າງພ້ອມພຽງ.

ຜ່ານການແຂ່ງຂັນປະເພດທີມ ຜົນປະກົດວ່າ: ກະຊວງປ້ອງກັນປະເທດ (ກອງທັບ) ຍາດໄດ້ຫຼຽນຄຳ ດ້ວຍຄະແນນລວມ 587 ຄະແນນ, ແຂວງຊຽງຂວາງ ໄດ້ຫຼຽນເງິນ ລວມ 597 ຄະແນນ ແລະ ນະຄອນຫລວງວຽງຈັນ ໄດ້ຫຼຽນທອງ ລວມ 601 ຄະແນນ ແລະ ປະເພດບຸກຄົນ: ທ່ານ ຈັນປະສິດ ອຸນາພົມ ໄດ້ຫຼຽນຄຳ ດ້ວຍຄະແນນລວມ 191 ຄະແນນ, ທ່ານ ສຸດທາດ ສີສະຫລາດ ໄດ້ຫຼຽນເງິນດ້ວຍຄະແນນລວມ 194 ຄະແນນ ແລະທ່ານ ສິນໄຊ ພິລາສຸກ ໄດ້ຫຼຽນທອງລວມ 197 ຄະແນນ, ຊຶ່ງທັງ 3 ທ່ານ ເປັນນັກກິລາຂອງກະຊວງປ້ອງກັນປະເທດ. ສໍາລັບປະເພດທີມ ມີແຕ້ມຕໍ່ ກະຊວງປ້ອງກັນປະເທດ ໄດ້ຫຼຽນຄຳ ດ້ວຍຄະແນນລວມ 215 ຄະແນນ, ແຂວງສະຫວັນນະເຂດ ໄດ້ຫຼຽນເງິນ ດ້ວຍ 202 ຄະແນນ ແລະ ແຂວງສາລະວັນໄດ້ຫຼຽນທອງ ດ້ວຍຄະແນນລວມ 198 ຄະແນນ ແລະປະເພດບຸກຄົນ ມີແຕ້ມຕໍ່: ທ່ານ ທຳມະລັກ ບົວຫອມ ຈາກແຂວງຊຽງຂວາງ ໄດ້ຫຼຽນຄຳ ດ້ວຍຄະແນນລວມ 76 ຄະແນນ, ທ່ານ ອູຟອງ ວັນທີແສງ ຈາກແຂວງອຸດົມໄຊ ໄດ້ຫຼຽນເງິນ ດ້ວຍຄະແນນລວມ 74 ຄະແນນ ແລະທ່ານ ຂາວພອນ ອິນທິລາດ ຈາກນະຄອນຫລວງວຽງຈັນ ໄດ້ຫຼຽນທອງ ດ້ວຍຄະແນນລວມ 74 ຄະແນນ.

ຂ່າວໂດຍ: ບຸນນິກ

แชร์