ນະຄອນຫຼວງ ກວາດ 4 ຫຼຽນຄຳ ປືນສັ້ນແກັບກາງ 15 ແມັດ ແລະ 25 ແມັດ ດ່ຽວຍິງ ແລະທີມຍິງ ໃນຊຽງຂວາງເກມ

ທັບນັກກິລາຍິງປືນ ນະຄອນຫຼວງວຽງຈັນ ກວາດ 4 ຫຼຽນຄຳ ປິດສາກການແຂ່ງຂັນປືນສັ້ນແກັບກາງ ໄລຍະ 15 ແມັດ ແລະ 25 ແມັດ ດ່ຽວຍິງ-ທີມຍິງ ໃນງານມະຫະກຳກິລາແຫ່ງຊາດ ຄັ້ງທີ 11 ຫຼື ຊຽງຂວາງເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ.

ການແຂ່ງຂັນກິລາຍິງປືນໄລຍະທີ 3 ຫຼື ໄລຍະສຸດທ້າຍ ຈັດຂຶ້ນ ໃນລະວຫ່າງວັນທີ 14-16 ທັນວາ 2022 ທີ່ໂຮງຮຽນ ປກສ ຊັ້ນຕົ້ນ ເລກ 03 ເມືອງແປກ ແຂວງຊຽງຂວາງ, ໂດຍມີນັກກິລາມາຈາກນະຄອນຫຼວງວຽງຈັນ, ກະຊວງປ້ອງກັນປະເທດ (ປກຊ), ກະຊວງປ້ອງກັນຄວາມສະຫງົບ ຫຼື ປກສ, ແຂວງສະຫວັນນະເຂດ ແລະ ແຂວງຊຽງຂວາງ ເຈົ້າພາບ ເຂົ້າຮ່ວມ ຊຶ່ງມີການຊີງໄຊທັງໝົດ 8 ຫຼຽນຄຳ, 8 ຫຼຽນເງິນ ແລະ 16 ຫຼຽນທອງ. ຜ່ານການແຂ່ງຂັນຍິງປືນສັ້ນແກັບກາງ ໄລຍະ 15 ແມັດ ປະເພດດ່ຽວຍິງ ຫຼຽນຄຳ ຕົກເປັນຂອງ ນາງ ກັນຕະນາ ໄຊຍະລາດ ນະຄອນຫຼວງວຽງຈັນ, ຫຼຽນເງິນ ນາງ ໄພວອນ ວົງພະຈັນ ປກສ ແລະ ຫຼຽນທອງຮ່ວມ ນາງ ວຽງສະຫວັນ ພົມມະກອງ ຈາກ ປກສ ແລະ ນາງ ມະນີບົດ ວົງໄຊ ຈາກນະຄອນຫຼວງວຽງຈັນ. ສ່ວນປະເພດທີມຍິງ ໄລຍະ 15 ແມັດ ຫຼຽນຄຳ ເປັນຂອງ ນະຄອນຫຼວງວໜງຈັນ, ຫຼຽນເງິນ ປກສ ແລະ ຫຼຽນທອງຮ່ວມ ປກຊ ແລະ ແຂວງຊຽງຂວາງ ເຈົ້າພາບ. ຂະນະທີ່ປະເພດດ່ຽວຊາຍ ໄລຍະ 15 ແມັດ ຫຼຽນຄຳເປັນຂອງ ທ້າວ ຫົງພະຈັນ ດາລາວົງ ປກສ, ຫຼຽນເງິນ ທ້າວ ນິກອນ ປັນຍາວົງ ປກສ ແລະ ຫຼຽນທອງຮ່ວມ ທ້າວ ຄຳຊະນະ ຈະເລີນໄຊ ປກສ ແລະ ທ້າວ ພອນ ສີອຳໄພ ປກຊ; ປະເພດທີມ ໄລຍະ 15 ແມັດ ຫຼຽນຄຳ ເປັນຂອງ ປກສ, ຫຼຽນເງິນ ປກຊ ແລະຫຼຽນທອງຮ່ວມເປັນຂອງ ແຂວງສະຫວັນນະເຂດ ແລະ ນະຄອນຫຼວງວຽງຈັນ.

ສຳລັບປະເພດປືນສັ້ນແກັບກາງ ໄລຍະ 25 ແມັດດ່ຽວຍິງ ຫຼຽນຄຳ ຕົກເປັນຂອງ ນາງ ກັນຕະນາ ໄຊຍະລາດ ຈາກນະຄອນຫຼວງວຽງຈັນ, ຫຼຽນເງິນ ນາງ ກົງຄຳ ບົວແສງພະຈັນ ນະຄອນຫຼວງວຽງຈັນ ແລະ ຫຼຽນທອງຮ່ວມ ນາງ ພຸດສະດີ ພົມມະຈັນ ຈາກ ປກຊ ແລະນາງ ວຽງສະຫວັນ ພົມມະກອງ ປກສ. ສ່ວນປະເພດບຸກຄົນຊາຍ ຫຼຽນຄຳ ເປັນຂອງ ທ້າວ ໄຊພອນ ບຸນທະພອນ ຈາກແຂວງຊຽງຂວາງ, ຫຼຽນເງິນ ທ້າວ ບຸນທະວີ ຄຳພາ ແຂວງຫຼວງພະບາງ ແລະ ຫຼຽນທອງຮ່ວມ ທ້າວ ອາລຸນຊະນະ ພິມພິສານ ແຂວງສະຫວັນນະເຂດ ແລະທ້າວ ສົມພາວັນ ສຸກອາລຸນ ນະຄອນຫຼວງວຽງຈັນ. ຂະນະທີ່ປະເພດທີມຊາຍ ຫຼຽນຄຳ ເປັນຂອງ ປກຊ, ຫຼຽນເງິນ ປກສ ແລະຫຼຽນທອງຮ່ວມ ແຂວງສະຫວັນນະເຂດ ແລະນະຄອນຫຼວງວຽງຈັນ.

แชร์