ສສຊ ພິຈາລະນາປັບປຸງຮ່າງກົດໝາຍວ່າດ້ວຍໜັງສືຜ່ານແດນ ສະບັບສ້າງໃໝ່ໃຫ້ມີເນື້ອໃນຊັດເຈນ

ໃນວາລະກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ດຳເນີນໃນວັນທີ 16 ທັນວານີ້ ໂດຍການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ. ບັນດາສະມາຊິກສະພາແຫ່ງຊາດ (ສສຊ) ເຂດເລືອກຕັ້ງຕ່າງໆໄດ້ພິຈາລະນາຄົ້ນຄວ້າເນື້ອໃນບາງມາດຕາບາງຄໍາສັບຂອງຮ່າງກົດໝາຍວ່າດ້ວຍໜັງສືຜ່ານແດນຊຶ່ງເປັນກົດໝາຍສ້າງໃໝ່ເພື່ອໃຫ້ກົດໝາຍສະບັບນີ້ເປັນລະບົບຄົບຊຸດ, ສອດຄ່ອງຮັດກຸມເປັນບ່ອນອີງໃຫ້ແກ່ການຄຸ້ມຄອງ, ຕິດຕາມກວດກາວຽກງານໜັງສືຜ່ານແດນເພື່ອເຮັດໃຫ້ການປະຕິບັດວຽກງານດັ່ງກ່າວມີປະສິດທິພາບ, ປະສິດທິຜົນກວ່າເກົ່າ, ເປັນບ່ອນອີງທາງດ້ານກົດໝາຍທີ່ສຳຄັນໃຫ້ແກ່ກະຊວງການຕ່າງປະເທດ.

ທ່ານ ຄຳມ່ວນ ຊົມສີຫາປັນຍາ ສສຊ ເຂດເລືອກຕັ້ງທີ 2 ແຂວງຜົ້ງສາລີ ໄດ້ປະກອບຄຳເຫັນຕໍ່ກົດໝາຍດັ່ງກ່າວໂດຍສະເພາະໃນມາດຕາທີ 12,27,28,29 ທັງໝົດອັນສຳຄັນແມ່ນການຍື່ນຄຳຮ້ອງ ແລະ ພິຈາລະນາຄຳຮ້ອງຂອງໜັງສືຜ່ານແດນ ຊິເປັນຊົ່ວຄາວ, ທຳມະດາ ຫຼື ສຸກເສີນ ທັງໝົດເຫຼົ່ານີ້ຖ້າເຮົາຫັນເປັນທັນສະໄໝ (ອອນລາຍ) ມັນຈະສະດວກຫຼາຍ ຍ້ອນວ່າສັນຍານ 3 ຈີຂອງໂທລະສັບມືຖືກວມທົ່ວປະທດ 98% ເຮັດໃຫ້ປະຊາຊົນສາມາດໃຊ້ໂທລະສັບມືຖືຍື່ນຄຳຮ້ອງກໍໄດ້ແຕ່ທາງກະຊວງການຕ່າງປະເທດຕ້ອງມີລະບົບອອນລາຍນີ້ຂຶ້ນມາເພື່ອປະຢັດເວລາ, ປະຢັດລາຍຈ່າຍສຳລັບປະຊາຊົນທີ່ຈະໄປລຽນຄິວເຂົ້າໄປຍື່ນເອກະສານ ຊຶ່ງໃນໄລຍະຜ່ານມາປະຊາຊົນພົບຄວາມຫຍຸ້ງຍາກໃນການມາຍື່ນເອກະສານບາງຄົນມານອນລໍຖ້າເປັນທິດເຫັນວ່າມັນລໍາບາກໃຫ້ແກ່ປະຊາຊົນ, ຖ້າຫາກມີລະບົບດັ່ງກ່າວມັນຈະງ່າຍຂຶ້ນ, ເພາະ 47 ປີປະເທດຊາດໄດ້ຮັບການປົດປ່ອຍ ພວກເຮົາຄວນບໍຈະມີການບໍລິການຜ່ານລະບົບອອນລາຍເພື່ອມາຮັບໃຊ້ປະຊາຊົນໃຫ້ມີຄວາມສະດວກສະບາຍຍິ່ງຂຶ້ນ, ການພິຈາລະນາຮັບກໍເຊັ່ນກັນໃນເມື່ອເຮົາບໍລິການແບບອອນລາຍ ເຮົາກໍມີການກວດສອບເອກະສານຄົບຖ້ວນແລ້ວ ແລະ ມີການນັດໝາຍຜ່ານລະບົບອອນລາຍເພື່ອປະຢັດເວລາ ແລະ ນັດປະຊາຊົນຕາມຄວາມສາມາດຂອງພະນັກງານເຮົາຮັບໄດ້ ເຮົາກໍນັດມາທໍ່ນັ້ນຄົນເພື່ອປະຢັດເວລາ ແລະ ບໍ່ໃຫ້ປະຊາຊົນມາອັ່ງອໍແອອັດຢູ່ໜ້າກົມກົງສູນ ຊຶ່ງເປັນບັນຫາຊໍາເຮື້ອມາເຖິງປັດຈຸບັນ, ນີ້ເປັນວິທີທາງທີ່ດິທີ່ສຸດ ແລະ ເຮັດກໍບໍ່ຍາກລົງທຶນບໍ່ຫຼາຍ.

ທ່ານ ຫົງຄຳ ສຸວັນນະວົງ ສສຊ ເຂດເລືອກຕັ້ງທີ 10 ແຂວງວຽງຈັນ ໄດ້ມີຄຳເຫັນແລກປ່ຽນກ່ຽວກັບຊື່ຂອງກົດໝາຍສະບັບນີ້ເພື່ອບໍ່ໃຫ້ມີຄວາມສັບສົນລະຫວ່າງໜັງສືຜ່ານແດນ, ພາດສະປ໋ອດ, ບໍເດີພັດ ຖ້າເປັນໄປໄດ້ຢາກສະເໜີປ່ຽນໃຫ້ເປັນກົດໝາຍວ່າດ້ວຍໜັງສືເດີນທາງຈະເໝາະສົມກວ່າ, ເພາະເນື້ອໃນໜັງສືຜ່ານແດນກໍກວ້າງກວ່າ ແລະ ສາມາດເດີນທາງໄປໄດ້ຫຼາຍປະເທດ, ໃນມາດຕາ 2 ໜັງສືຜ່ານແດນແມ່ນເອກະສານເດີນທາງຢາກໃຫ້ເພີ່ມສັບທາງການ ເພາະວ່າໜັງສືຜ່ານແດນທຸກສະບັບອອກໂດຍລັດຖະບານ (ເປັນໜັງສືທາງການ), ສຳລັບມາດຕາ 3 ຂອບເຂດການນຳໃຊ້ກົດໝາຍ, ໃນກົດໝາຍສະບັບນີ້ນຳໃຊ້ສຳລັບບຸກຄົນ, ນິຕິບຸກຄົນ ແລະ ການຈັດຕັ້ງຂອງ ສປປ ລາວ ທັງຢູ່ພາຍໃນ ແລະ ຕ່າງປະເທດ ທີ່ເຄື່ອນໄຫວວຽກງານກ່ຽວກັບໜັງສືຜ່ານແດນເພາະຈະມີຄວາມໝາຍກວ້າງຂວາງກວ່າຢາກສະເໜີໃຫ້ເພີ່ມໃສ່ຕື່ມ, ສຳລັບມາດຕາທີ 12 ໜັງສືຜ່ານແດນການທູດ, ເອເລັກໂຕຣນິກນຳໃຊ້ອັກສອນຫຍໍ້ PD ຢາກສະເໜີໃຫ້ຄະນະກຳມະການມີຄຳອະທິບາຍລະອຽດຕື່ມ PD ແປວ່າຫຍັງ? ເພື່ອຄວາມສະດວກໃນການນຳໃຊ້.

ທ່ານ ໄຊນະຄອນ ອິນທະວົງ ສສຊ ເຂດເລືອກຕັ້ງທີ 12 ແຂວງຄຳມ່ວນ ໄດ້ມີຄຳເຫັນຕໍ່ມາດຕາ 8 ຮູບແບບໜັງສືຜ່ານແດນ ຊຶ່ງໜັງສືຜ່ານແດນມີ 2 ແບບຄື: ໜັງສືຜ່ານແດນເອເລັກໂຕຣນິກ ແລະ ໜັງສືຜ່ານແດນທີ່ບໍ່ແມ່ນເອເລັກໂຕຣນິກຢາກໃຫ້ເພີ່ມຕື່ມວ່າ: ສອງປະເພດນີ້ມີຄຸນຄ່າເທົ່າກັນ, ເທົ່າທຽມກັນເພື່ອໃຫ້ມີຄວາມຊັດເຈນ, ໃນນັ້ນມາດຕາ 11 ຊະນິດໜັງສືຜ່ານແດນ ຢາກມີຄຳເຫັນວ່າ: ຄຳວ່າໜັງສືຜ່ານແດນທຳມະດາ, ຢາກໃຫ້ປ່ຽນເປັນໜັງສືຜ່ານແດນທົ່ວໄປຈະມີຄວາມໝາຍເໝາະສົມກວ່າບໍ? ແລະ ມາດຕາ 45 ຂໍ້ 2 ນຳໃຊ້ໜັງສືຜ່ານແດນຂອງຕົນເພື່ອດຳເນີນທຸລະກຳຢູ່ຕ່າງປະເທດ ຄຳວ່າ: ທຸລະກຳປ່ຽນເປັນຄຳອື່ນໄດ້ບໍ? ຕົວຢ່າງວ່າ: ປ່ຽນໃສ່ວຽກງານອາດຈະເຂົ້າໃຈດີກວ່າ.
ຂ່າວ: ພູວັນ, ວັນເພັງ

แชร์