ສໍາມະນາ ພາຍໃຕ້ຫົວຂໍ້ ປະສົບການພາຍຫຼັງການເກີດຄວາມຂັດແຍ່ງ, ການເຕົ້າໂຮມຄວາມສາມັກຄີພາຍໃນຂອງພາກພື້ນອາຊີຕາເວັນອອກສຽງໃຕ້

ສະຖາບັນການຕ່າງປະເທດ, ສໍານັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອາຊຽນ ແລະສະຖາບັນເພື່ອສັນຕິພາບ ແລະຄວາມປອງດອງຂອງອາຊຽນ ແລະ ໄດ້ຮັບການສະໜັບສະໜູນຈາກລັດຖະບານ ສ ເກົາຫຼີ ໄດ້ເປັນເຈົ້າພາບຮ່ວມກັນຈັດກອງປະຊຸມສຳມະນາພາຍໃຕ້ຫົວຂໍ້:“ ປະສົບການພາຍຫຼັງການເກິດຄວາມຂັດແຍ່ງ ແລະ ການເຕົ້າໂຮມຄວາມສາມັກຄີພາຍໃນ ຂອງພາກພື້ນອາຊີຕາເວັນອອກສຽງໃຕ້-ASEAN-IPR Training: Leg 3 Training-Post-Conflict and Reintegration Experience in Southeast Asia: Focus on Reconciliation Models ”, ຈັດຂຶ້ນໃນລະຫວ່າງວັນທີ 15-16 ທັນວາ 2022 ທີ່ນະຄອນຫຼວງວຽງຈັນ ໂດຍມີທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ມີພາກສ່ວນກ່ຽວຂ້ອງເຂົ້າຮ່ວມ.

ຊຶ່ງກອງປະຊຸມສໍາມະນາ “ປະສົບການພາຍຫຼັງການເກີດຄວາມຂັດແຍ່ງ ແລະ ການເຕົ້າໂຮມຄວາມສາມັກຄີພາຍໃນ ຂອງພາກພື້ນອາຊີຕາເວັນອອກສຽງໃຕ້” ແມ່ນໜຶ່ງໃນສາມກອງປະຊຸມທີ່ໄດ້ຮັບການສະໜັບສະໜູນຈາກກອງທຶນຮ່ວມອາຊຽນ-ເກົາຫຼີ ຊຶ່ງໃນເບື້ອງຕົ້ນແມ່ນມີແຜນຈະຈັດກອງປະຊຸມສໍາມະນາດັ່ງກ່າວໃນທ້າຍປີ 2021, ແຕ່ຍ້ອນສະພາບການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ໂຄງການດັ່ງກ່າວຖືກເລື່ອນມາຈັດໃນທ້າຍປີ 2022. ຈຸດປະສົງຂອງກອງປະຊຸມສຳມະນາຄັ້ງນີ້ແມ່ນເພື່ອສ້າງຄວາມເຂົ້າໃຈທົ່ວໄປກ່ຽວກັບບັນຫາຄວາມຂັດແຍ່ງໂດຍອີງໃສ່ຫຼັກທິດສະດີ, ການສ້າງສັນຕິພາບ ແລະ ການເຕົ້າໂຮມຄວາມສາມັກຄີພາຍໃນ, ສົ່ງເສີມຄວາມເຂົ້າໃຈໃຫ້ ເລິກຊຶ່ງ ກ່ຽວກັບ ບັນຫາສົງຄາມເຢັນທີ່ສົ່ງຜົນກະທົບຕໍ່ພາກພື້ນ ແລະ ສາກົນ ໃຫ້ແກ່ນັກການທູດໜຸ່ມນ້ອຍ ແລະ ນັກຄົ້ນຄວ້າຂອງບັນດາປະເທດສະມາຊິກອາຊຽນ. ຜູ້ເຂົ້າຮ່ວມກອງປະຊຸມສໍາມະນາດັ່ງກ່າວຈະໄດ້ຮັບຟັງການບັນຍາຍ ແລະແລກປ່ຽນປະສົບການ-ຄໍາຄິດຄໍາເຫັນ ກ່ຽວກັບ ບັນຫາຄວາມຂັດແຍ່ງ ແລະ ສະພາບການພາຍຫຼັງມີຄວາມຂັດແຍ້ງ, ສົງຄາມເຢັນໃນອາຊີຕາເວັນອອກສຽງໃຕ້, ປະສົບການ ແລະ ກໍລະນີສຶກສາຕ່າງໆ ໃນພາກພື້ນອາຊີຕາເວັນອອກສຽງໃຕ້ ຈາກຜູ້ບັນຍາຍທີ່ມີຄວາມຮູ້ ແລະ ມີປະສົບການ ຈາກຫຼາຍປະເທດໃນພາກພື້ນ ແລະ ສາກົນ. ພ້ອມດຽວກັນ, ຄະນະຜູ້ແທນທີ່ມາເຂົ້າຮ່ວມກອງປະຊຸມສຳມະນາຄັ້ງນີ້ ຍັງຈະໄດ້ເດີນທາງໄປຢ້ຽມຢາມ ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ເພື່ອບັນຍາຍ ກ່ຽວກັບ ພາລະບົດບາດຂອງ ສະຖາບັນ ສັນຕິພາບ ແລະ ຄວາມປອງດອງອາຊຽນ ໃຫ້ແກ່ບັນດາຄູ-ອາຈານ ແລະ ນັກສຶກສາ ຂອງຄະນະດັ່ງກ່າວອີກດ້ວຍ.

ກອງປະຊຸມສໍາມະນາດັ່ງກ່າວ ໄດ້ປະກອບສ່ວນສໍາຄັນ ໃນການສ້າງຂີດຄວາມສາມາດ ໃຫ້ແກ່ນັກການທູດ ແລະ ນັກຄົ້ນຄວ້າໜຸ່ມນ້ອຍຂອງບັນດາປະເທດສະມາຊິກອາຊຽນ ກໍຄື ສປປ ລາວ ໃຫ້ມີຄວາມຮູ້ຄວາມເຂົ້າໃຈຢ່າງເລິກເຊິ່ງ ກ່ຽວກັບ ສະພາບຄວາມຂັດແຍ່ງໃນພາກພື້ນ, ວິທີທາງ ແລະ ຄວາມພະຍາຍາມ ເພື່ອນໍາໄປສູ່ການສ້າງຄວາມປອງດອງຊາດ ແລະ ສ້າງສັນຕິພາບໃນປະເທດ, ການສ້າງສາ ແລະ ຮັກສາສັນຕິພາບ ໃນພາກພື້ນ ພ້ອມທັງຊ່ວຍສົ່ງເສີມບົດບາດຂອງ ສປປ ລາວ ໃນເວທີສາກົນໃນການຮັດແໜ້ນ ແລະ ເຊື່ອມໂຍງເຄື່ອຂ່າຍນັກຄົ້ນຄວ້າຂອງ ສປປ ລາວ ກັບ ບັນດາສະຖາບັນຄັງປັນສາກົນ.
ຂ່າວ: ກະຊວງການຕ່າງປະເທດ

แชร์