ຈາກລູກຈ້າງກ້າວມາເປັນເຈົ້າຂອງຮ້ານແປງລົດ

  ຊີວິດຂອງຄົນເຮົາເກີດມາຈະຢູ່ໃນຄອບຄົວຈົນຫຼືລວຍມັນບໍ່ແມ່ນປະເດັນສຳຄັນພຽງແຕ່ຊີວິດໄດ້ກຳເນີດເກີດຂຶ້ນມາແລ້ວຈະເຮັດແນວໃດໃຫ້ຢູ່ດີມີສຸກໃຫ້ຫຼຸດພົ້ນຈາກຄວາມທຸກຍາກພຽງແຕ່ມີຄວາມດຸໝັ່ນຂະຫຍັນພຽນໃນການສ້າງຢູ່ທຳກິນກໍຈະສາມາດພິກປີ້ນຊີວິດໃຫ້ດີຂຶ້ນໄດ້ກໍເໝືອນກັບຊີວິດທ້າວ ບຸນເພັງ ໄຊຍະສິດ ທີ່ເມື່ອກ່ອນໄດ້ສູ້ຊົນເປັນກຳມະກອນຢູ່ຮ້ານແປງລົດມາຫຼາຍປີກໍສາມາດກ້າວມາເປີດຮ້ານຂອງຕົນເອງໄດ້.

 ທ້າວ ບຸນເພັງ ໄຊຍະສິດ ອາຍຸ 30 ປີ ປະຈຸບັນຢູ່ບ້ານດອນສະອາດ ເມືອງຫຼາ ແຂວງອຸດົມໄຊ ໜຶ່ງໃນຜູ້ໄດ້ຮັບທຶນບໍ່ມີດອກເບ້ຍຈາກໂຄງການ “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ເລົ່າສູ່ຟັງວ່າ: ຕົນເອງແມ່ນອີກບຸກຄົນໜຶ່ງທີ່ເກີດໃນຄອບຄົວທຸກຍາກຂາດເຂີນຫາເຊົ້າກິນຄໍ່າຈາກຄວາມຍາກລຳບາກດັ່ງກ່າວ ເມື່ອອາຍຸກ້າວເຂົ້າສູ່ໄວໜຸ່ມຈຶ່ງສະແຫວງຫາຄວາມຮູ້ ແລະປະສົບການດ້ານວິຊາຊີບໃສ່ຕົວເອງດ້ວຍການໄປເປັນກຳມະກອນຮັບຈ້າງສ້ອມແປງລົດຢູ່ແຂວງຫຼ ວງນ້ຳທາເປັນເວລາຫຼາຍປີຈາກນັ້ນຈຶ່ງເກີດມີແນວຄວາມຄິດຢາກເປີດຮ້ານເປັນຂອງຕົນເອງຈຶ່ງໄດ້ຕັດສິນໃຈໃຊ້ເງິນເດືອນທີ່ສະສົມມາຈຳນວນໜຶ່ງມາເປີດຮ້ານຢູ່ທີ່ບ້ານເກີດ.

  ເບື້ອງຕົ້ນເນື່ອງຈາກທຶນຮອນມີຂີດຈຳກັດບໍ່ພຽງພໍໃນການຊື້ອຸປະກອນສ້ອມແປງຕ່າງໆຈຶ່ງໄດ້ຮັບໂອກາດກູ້ຢືມທຶນບໍ່ມີດອກເບ້ຍຈຳນວນ 10 ລ້ານກີບ ກຳ ນົດ 3 ປີ ນຳໂຄງການ “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ໃນລະຫວ່າງກາງປີ 2018 ຜ່ານມາ ໄດ້ເຮັດໃຫ້ຮ້ານສ້ອມແປງລົດຈັກຂອງຕົນມີເຄື່ອງມືສ້ອມແປງເກືອບຄົບທຸກຢ່າງອັນເປັນຜົນເຮັດໃຫ້ການບໍລິການລູກຄ້າໄດ້ຄຸນນະພາບທີ່ຮ້ານຕົນໄດ້ເນັ້ນເລື່ອງນີ້ມາໂດຍຕະຫຼອດພ້ອມສາມາດດຶງລູກຄ້າພາຍ ໃນບ້ານ ແລະ ບ້ານໃກ້ຄຽງເຂົ້າມາໃຊ້ບໍລິການຢ່າງຕໍ່ເນື່ອງມື້ໜຶ່ງສະເລ່ຍບໍ່ຫຼຸດ 5 ຄັນ ເຖິງແມ່ນວ່າພາຍໃນບ້ານຈະມີຮ້ານສ້ອມແປງລົດຈັກ 3 ຮ້ານກໍຕາມ.

 ທ້າວ ບຸນເພັງ ໄຊຍະສິດ ກ່າວຕໍ່ວ່າ: ທຶນຂອງໂຄງການ “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ໄດ້ເຮັດໃຫ້ຊີວິດຕົນ ແລະ ຄອບຄົວເບິ່ງເຫັນອານາຄົດທີ່ສົດໃສໄດ້ຈາກສິ່ງຈຳເປັນໃຊ້ໃນຄອບຄົວທີ່ບໍ່ເຄີຍມີໃນຄາວກ່ອນຕອນນີ້ກໍມີຄົບເກືອບທຸກຢ່າງສາມາດລ້ຽງຈ່າຍເງິນເດືອນພະນັກງານທີ່ມີ 1 ຄົນໃນເວລານີ້ໄດ້ ຊື້ດິນ 2 ຕອນ ອັນສຳຄັນແມ່ນກຳລັງວາງແຜນຈະປຸກເຮືອນຫຼັງໃໝ່ງາມໆທັງນີ້ທ້າວ ບຸນເພັງ ໄຊຍະສິດ ມີຄວາມຕ້ອງການທຶນອີກ 10-20 ລ້ານກີບ ເພື່ອມາຂະຫຍາຍຮ້ານສ້ອມແປງລົດຕື່ມ.

  ແນວໃດກໍດີສຳລັບໂຄງການ “ກ້າໄມ້ແຕກໃບສົດໃສຢືນຕົ້ນໃຫຍ່ງາມ” ແມ່ນເປັນການຮ່ວມມືລະຫວ່າງບໍລິສັດຣາຊ-ລາວບໍລິ ການຈຳກັດກັບກົມພັດທະນາວິຊາຊີບສູນກາງຊາວໜຸ່ມປະຊາຊົນປະຕິວັດລາວໃນການຊ່ວຍເຫລືອຊາວໜຸ່ມລາວຊຶ່ງບໍລິສັດໄດ້ສະໜັບສະໜູນເງິນທຶນໝູນວຽນຈຳນວນໜຶ່ງໃຫ້ແກ່ສູນກາ ງຊາວໜຸ່ມເພື່ອສ້າງໂອກາດ ແລະມອບທຶນບໍ່ມີດອກເບ້ຍດ້ານການພັດທະນາຍົກລະດັບຄວາມຮູ້ດ້ານວິຊາການທັກສະສີມືແຮງງານສຳລັບປະກອບອາຊີບໃຫ້ ແກ່ນັກຮຽນທີ່ຈົບການສຶກສາຈາກສູນຝຶກອົບຮົມວິຊາຊີບໃຫ້ແກ່ຊາວໜຸ່ມຜູ້ທີ່ດ້ອຍໂອກາດບໍ່ມີວຽກເຮັດງານທຳໃຫ້ມີອາຊີບທີ່ໝັ້ນຄົງໂດຍໄດ້ເລີ່ມແຕ່ເດືອນເມສາ 2012 ເປັນຕົ້ນມາມາຮອດປະຈຸບັນມີໄວໜຸ່ມລາວໃນຂອບເຂດທົ່ວປະເທດໄດ້ຮັບທຶນແລ້ວ 30 ກວ່າທຶນ ເພື່ອປະກອບອາຊີບສ້ອມແປງລົດຈັກ, ເສີ ມສວຍ ແລະ ຕັດຫຍິບ.

 ຂ່າວ: ນສພ ເສດຖະກິດ-ສັງຄົມ

แชร์