ກອງປະຊຸມຮັບຮອງເນື້ອໃນ ຜົນຂອງການຄົ້ນຄວ້າໂຄງການລະດັບຊາດ “ການສ້າງລັດທີ່ປົກຄອງດ້ວຍກົດໝາຍຢູ່”

ໃນວັນທີ 15 ທັນວານີ້ສະພາທິດສະດີສູນກາງພັກໄດ້ຈັດກອງປະຊຸມພິຈາລະນາຮັບຮອງເນື້ອໃນຜົນຂອງການຄົ້ນຄວ້າໂຄງການລະດັບຊາດຫົວຂໍ້: “ການສ້າງລັດທີ່ປົກຄອງດ້ວຍກົດໝາຍຢູ່ ສປປ ລາວ” ຂຶ້ນທີ່ຫ້ອງປະຊຸມສະພາທິດສະດີສູນກາງພັກ, ໂດຍພາຍໃຕ້ການເປັນປະທານຂອງສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກປະທານສະພາທິດສະດີສູນກາງພັກ,ມີບັນດາສະຫາຍຄະນະປະຈໍາ,ສະມາຊິກສະພາທິດສະດີສູນກາງພັກ,ຄະນະກຳມະການສັງເກດຕີລາຄາຈາກພາກສ່ວນກ່ຽວຂ້ອງ ແລະຄະນະຮັບຜິດຊອບໂຄງການເຂົ້າຮ່ວມ.

ໂຄງການຄົ້ນຄວ້າຫົວຂໍ້: “ການສ້າງລັດທີ່ປົກຄອງດ້ວຍກົດໝາຍຢູ່ ສປປ ລາວ” ເປັນໜຶ່ງໃນ 9 ໂຄງການຄົ້ນຄວ້າລະດັບຊາດທີ່ໄດ້ຖືກຮັບຮອງເອົາຕາມມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 108/ຄລສພ, ລົງວັນທີ 5 ກັນຍາ 2012 ຊຶ່ງແມ່ນສະພາທິດສະດີສູນກາງພັກຮັບຜິດຊອບໃນການດຳເນີນການຄົ້ນຄວ້າ.
ໃນກອງປະຊຸມ, ທ່ານ ອຸ່ນແກ້ວ ວຸທິລາດ ສະມາຊິກສະພາທິດສະດີສູນກາງພັກຫົວໜ້າຄະນະຮັບຜິດຊອບໂຄງການໄດ້ສະເໜີເນື້ອໃນສໍາຄັນຂອງການຄົ້ນຄວ້າດັ່ງກ່າວຊຶ່ງໄດ້ຍົກໃຫ້ເຫັນຄວາມໝາຍຄວາມສໍາຄັນຂອງການສຸມໃສ່ຄົ້ນຄວ້າທິດສະດີ ແລະພຶດຕິກໍາແຫ່ງການສ້າງລັດທີ່ປົກຄອງດ້ວຍກົດໝາຍຢູ່ປະເທດເຮົາເພື່ອຜັນຂະຫຍາຍມະຕິກອງປະຊຸມໃຫຍ່ຂອງພັກໃນຂົງເຂດອໍານາດລັດ ແລະກົດໝາຍໃຫ້ລະອຽດ, ຈະແຈ້ງແນໃສ່ສ້າງຄວາມເຂົ້າໃຈງ່າຍ, ເປັນເອກະພາບ ແລະ ສາມາດຈັດຕັ້ງປະຕິບັດໃຫ້ເກີດຜົນເປັນຈິງ. ພ້ອມດຽວກັນນັ້ນ, ເພື່ອເປັນແຫຼ່ງຂໍ້ມູນໃຫ້ແກ່ການປັບປຸງບູລະນະ ແລະກໍານົດແນວທາງຂອງພັກຂົງເຂດສ້າງລັດທີ່ປົກຄອງດ້ວຍກົດໝາຍຢູ່ປະເທດເຮົາໃຫ້ມີປະສິດທິພາບກວ່າເກົ່າ. ກອງປະຊຸມໄດ້ມີການຕັ້ງຄໍາຖາມ ແລະແລກປ່ຽນຄໍາຄິດຄໍາເຫັນຢ່າງກົງໄປກົງມາ ແລະໄດ້ຕົກລົງຮັບຮອງເອົາໂຄງການຄົ້ນຄວ້າດັ່ງກ່າວ.
ຂ່າວ: ສະພາທິດສະດີສູນກາງພັກ, ພາບ: ພູວຽງຄຳ

แชร์