ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 9

ໃນວັນທີ 15 ທັນວາ 2022, ທີ່ຫໍສະພາແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ພົນໂທ ສຸວອນ ເລື່ອງບຸນມີ, ຮອງປະທານສະພາແຫ່ງຊາດ ສະມາຊິກສະພາແຫ່ງຊາດສຸມໃສ່ຄົ້ນຄ້ວາ, ພິຈາລະນາ ແລະປະກອບຄໍາເຫັນໃສ່ຮ່າງກົດໝາຍວ່າດ້ວຍອົງການໄອຍະການທະຫານສະບັບປຸງທີ່ສະເໜີໂດຍທ່ານ ພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ໂດຍທ່ານໄດ້ຍົກໃຫ້ເຫັນເຖິງເຫດຜົນ ແລະຄວາມຈໍາເປັນຂອງການປັບປຸງຮ່າງກົດໝາຍສະບັບນີ້ ພາຍຫລັງໄດ້ນໍາໃຊ້ນັບແຕ່ປີ 2013 ເປັນຕົ້ນມາ ຊື່ງເຫັນວ່າຍັງມີຂໍ້ຄົງຄ້າງບາງດ້ານທີ່ຈຳເປັນຕ້ອງໄດ້ປັບປຸງ, ແກ້ໄຂເປັນຕົ້ນຂອບເຂດໃນການດໍາເນີນຄະດີຂອງອົງການໄອຍະການທະຫານຍັງບໍ່ທັນສອດຄ່ອງກັບສະພາບຕົວຈິງ, ນອກຈາກນີ້ອົງການໄອຍະການທະຫານຍັງບໍ່ທັນມີຄະນະກໍາມະການໄອຍະການທະຫານ ເພື່ອຄົ້ນຄວ້າຕົກລົງບັນຫາທີ່ມີຄວາມສຳຄັນ ແລະ ມີລັກສະນະຍຸດທະສາດກ່ຽວກັບວຽກງານອົງການໄອຍະການທະຫານ. ຮ່າງກົດໝາຍວ່າດ້ວຍອົງການໄອຍະການທະຫານສະບັບປັບປຸງນີ້ ປະກອບມີ 9 ພາກ, 9 ໝວດ, 66 ມາດຕາ ໃນນີ້ຮັກສາໄວ້ມີ 22 ມາດຕາ, ຂຽນໃໝ່ 6 ມາດຕາ, ປັບປຸງ 38 ມາດຕາ.

ທ່ານ ອໍາໄພ ຈິດມານົນ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 15 ແຂວງຈໍາປາສັກປະກອບຄໍາເຫັນໃສ່ມາດຕາ 6 ກ່ຽວກັບຂອບເຂດການດໍາເນີນຄະດີຂອງອົງການໄອຍະການທະຫານ,ມາດຕາ 12 ຂໍ້7 ທີ່ເວົ້າເຖິງການຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ຄຸມຂັງ, ຄ້າຍຄຸມຂັງດັດສ້າງ ແລະສະຖານທີ່ປະຕິບັດມາດຕະການບັງຄັບອື່ນໆຂອງສານທະຫານ ໂດຍສະເໜີໃຫ້ອະນຸກຳມະການປັບປຸງຮ່າງກົດໝາຍເບີ່ງຄືນ ແລະຄວນກຳນົດເນື້ອໃນໃຫ້ລະອຽດຈະແຈ້ງກວ່າເກົ່າ.

ທ່ານ ຈັນທະສິລິ ໝັ້ນປະດິດ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ແຂວງຫລວງນໍ້າທາ ປະກອບຄໍາເຫັນໃສ່ມາດຕາ 21, 22, 24 ແລະ 26 ໂດຍທ່ານສະເໜີໃຫ້ຄະນະຮັບຜິດຊອບຈັດລຽງຄືນໃໝ່ ແລະກຳນົດລະອຽດລະຫວ່າງໄອຍະການຂັ້ນສູງ, ໄອຍະການພາກ ແລະໄອຍະການແຂວງ ຊື່ງບາງມາດຕາຍັງເຫັນວ່າຊໍ້າກັນ.

ພາຍຫລັງສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆສໍາເລັດການປະກອບຄໍາເຫັນຕໍ່ຮ່າງກົດໝາຍວ່າດ້ວຍອົງການໄອຍະການທະຫານສະບັບປຸງ ຕາງໜ້າອະນຸກຳມະການປັບປຸງຮ່າງກົດໝາຍໄດ້ຊີ້ແຈງອະທິບາຍບາງບັນຫາທີ່ສະມາຊິກສະພາແຫ່ງຊາດມີຄວາມສົນໃຈ ແລະປະກອບຄໍາເຫັນເຂົ້າໃສ່ຫລາຍ ຈາກນັ້ນປະທານກອງປະຊຸມໄດ້ສະຫລຸບສັງລວມພ້ອມທັງສະເໜີໃຫ້ຄະນະຮັບຜິດຊອບນໍາໄປປັບປຸງຄືນ ເພື່ອໃຫ້ຮ່າງກົດໝາຍສະບັບນີ້ມີເນື້ອໃນຄົບຖ້ວນ, ຮັດກຸມ ທັງສາມາດນໍາໄປຈັດຕັ້ງປະຕິບັດຢ່າງມີປະສິດທິຜົນ.

• 15/12/2022