ສະພາແຫ່ງຊາດ ພິຈາລະນາຮ່າງກົດໝາຍວ່າດ້ວຍອົງການໄອຍະການທະຫານ

ໃນວາລະດຳເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 15 ທັນວາ 2022 ໂດຍການເປັນປະທານຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະ ຊວງປ້ອງກັນປະເທດ ໄດ້ສະເໜີຮ່າງກົດໝາຍວ່າດ້ວຍ ອົງການໄອຍະການທະຫານ ສະບັບປັບປຸງ ຊຶ່ງປະກອບດ້ວຍ IX ພາກ, 9 ໝວດ, 66 ມາດຕາ; ໃນນີ້ໄດ້ຮັກສາໄວ້ 22 ມາດຕາ, ຂຽນໃໝ່ 6 ມາດຕາ, ປັບປຸງ 38 ມາດຕາ. ຈາກນັ້ນ, ບັນດາສະມາຊິກສະພາແຫ່ງຊາດ(ສສຊ) ໄດ້ສຸມໃສ່ປະກອບຄຳເຫັນໃສ່ຮ່າງກົດໝາຍດັ່ງກ່າວ ເພື່ອເຮັດໃຫ້ມີເນື້ອໃນຄົບຖ້ວນສົມບູນ ແລະ ສອດຄ່ອງກັບສະພາບໃນປັດຈຸບັນ.

ທ່ານ ພົນເອກ ຈັນສະໝອນ ຈັນຍາລາດ ໄດ້ໃຫ້ຮູ້ວ່າ: ກົດໝາຍ ວ່າດ້ວຍອົງການໄອຍະການທະຫານ ໄດ້ສ້າງ ແລະ ຖືກຮັບຮອງເອົາໃນກອງປະຊຸມສະໄຫມສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VII ໃນປີ 2013 ຊຶ່ງປະກອບມີ IX ພາກ, 9 ຫມວດ, 65 ມາດຕາ. ຜ່ານການຈັດຕັ້ງປະຕິບັດກົດໝາຍສະບັບນີ້ ໃນໄລຍະ 8 ປີຜ່ານມາ, ເຫັນວ່າໄດ້ເປັນເຄື່ອງມືອັນສໍາຄັນ ໃຫ້ແກ່ອົງການໄອຍະການທະຫານ ສາມາດປະຕິບັດ ພາລະບົດບາດ, ສິດ ແລະ ຫນ້າທີ່ ຕາມຂອບເຂດຄວາມຮັບຜິດຊອບຂອງຕົນ ໃນການຕິດຕາມກວດກາການເຄົາລົບ ແລະ ປະຕິບັດກົດໝາຍຂອງການຈັດຕັ້ງ, ກົມກອງ, ນາຍ ແລະ ພົນທະຫານ, ກໍາມະກອນ, ພາລະກອນປ້ອງກັນຊາດ ແລະ ຂອງບຸກຄົນນອກກອງທັບ ທີ່ກະທໍາຜິດໃນເຂດຍຸດທະສາດການທະຫານ, ເຂດຕັ້ງທັບຂອງທະຫານ ແລະ ສັ່ງຟ້ອງຜູ້ຖືກຫາ ຂຶ້ນສານທະຫານຕາມກົດໝາຍ, ປະກອບສ່ວນເຮັດໃຫ້ສັງຄົມມີຄວາມສະຫງົບໂດຍພື້ນຖານ. ຄຽງຄູ່ກັບດ້ານຕັ້ງໜ້າ ແຕ່ກໍຍັງມີຂໍ້ຄົງຄ້າງບາງດ້ານທີ່ຈໍາເປັນຕ້ອງໄດ້ສືບຕໍ່ຄົ້ນຄວ້າ, ແກ້ໄຂ ເປັນຕົ້ນ: ຂອບເຂດໃນການດໍາເນີນຄະດີ ຂອງອົງການໄອຍະການທະຫານ ຍັງບໍ່ທັນສອດຄ່ອງກັບສະພາບຕົວຈິງ, ພະແນກ, ຂະແໜງ ໄອຍະການທະຫານ ທີ່ຂຶ້ນກັບກອງພົນ, ກອງພັນໃຫຍ່, ກອງບັນຊາການທະຫານແຂວງ, ນະຄອນຫລວງ, ວິທະຍາ ຄານ, ໂຮງຮຽນ ແລະ ໂຮງຫມໍ. ເນື່ອງຈາກພາກສ່ວນດັ່ງກ່າວ ແມ່ນບໍ່ມີພາລະບົດບາດ, ສິດ ແລະ ໜ້າທີ່ສັ່ງຟ້ອງ, ຖະແຫລງຂຶ້ນສານທະຫານ ແລະ ການຕິດຕາມກວດກາການປະຕິບັດກົດໝາຍ ຍັງບໍ່ທັນມີປະສິດຕິພາບ-ປະສິດທິຜົນສູງ ເພາະວ່າຜ່ານຫລາຍຂັ້ນຕອນ ຂອງສາຍຕັ້ງ ແລະ ສາຍຂວາງ. ນອກຈາກນີ້ ອົງການໄອຍະການທະຫານ ຍັງບໍ່ທັນມີ ຄະນະກໍາມະການໄອຍະການທະຫານ ເພື່ອຄົ້ນຄວ້າຕົກລົງບັນຫາທີ່ມີຄວາມສໍາຄັນ ແລະ ມີລັກສະນະຍຸດທະສາດ ກ່ຽວກັບວຽກງານອົງການໄອຍະການທະຫານ.

ທ່ານ ພົນເອກ ຈັນສະໝອນ ຈັນຍາລາດ ຍັງໃຫ້ຮູ້ອີກວ່າ: ພາຍຫລັງກົດໝາຍສະບັບປັບປຸງ ຖືກຮັບຮອງ ແລະ ປະກາດໃຊ້ແລ້ວ ຈະເປັນບ່ອນອີງທີ່ສຳຄັນ ໃນການເຄື່ອນໄຫວວຽກງານ ໄອຍະການທະ ຫານ ເຮັດໃຫ້ການແກ້ໄຂອາຊະຍາກຳ ຢູ່ໃນກອງທັບ ມີຄວາມເປັນເອກະພາບ ສອດຄ່ອງກັບແນວທາງນະໂຍບາຍຂອງພັກໃນໄລຍະໃໝ່; ການສະກັດກັ້ນ ແລະ ຕ້ານອາຊະຍາກຳ, ການດຳເນີນຄະດີໃນກອງ ທັບ ຈະໄດ້ຮັບການຈັດຕັ້ງປະຕິບັດຢ່າງເຂັ້ມງວດ, ວ່ອງໄວ ແລະ ມີປະສິດທິຜົນດີກວ່າເກົ່າ.
ຂ່າວ: ຂປລ. ສົມຫວັງ, ພາບ:ເກດສະໜາ

แชร์