ຫຼາຍພາກສ່ວນ ສືບຕໍ່ມອບເງິນອຸປະຖຳງານມະຫະກຳກິລາແຫ່ງຊາດ ຄັ້ງທີ 11

ບັນດາບໍລິສັດຫ້າງຮ້ານຫຼາຍພາກສ່ວນເປັນຕົ້ນແມ່ນ ບໍລິສັດ ລາວສຳພັນ ພັດທະນາ ຈໍາກັດ ມອບເງິນ 100 ລ້ານກີບ, ສາຂາທະນາຄານແຫ່ງ ສປປ ລາວ ພາກເໜືອແຂວງຊຽງຂວາງ ມອບ 50 ລ້ານກີບ, ບໍລິສັດ ສະຫວັນໄຊກຣຸບ ມອບ 50 ລ້ານກີບ ແລະບໍລິສັດ ອຸດົມສຸກ ຄອນກຣີດ ມອບ 5 ລ້ານກີບ ລວມທັງໝົດ 205 ລ້ານກີບ ເພື່ອອຸປະຖໍາງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບລະຫວ່າງວັນທີ 13-22 ທັນວາ 2022.

ພິທີມອບ-ຮັບເງິນສະໜັບສະໜູນຄັ້ງນີ້ ໄດ້ມີຂຶ້ນເມື່ອວັນທີ 12 ທັນວາ 2022 ທີ່ຫ້ອງວ່າການປົກຄອງແຂວງຊຽງຂວາງ, ໂດຍເປັນກຽດກ່າວມອບຂອງ ທ່ານ ສາຍສຳພັນ ຈັນມະວົງ ປະທານບໍລິສັດ ລາວສຳພັນ ຈຳກັດ, ທ່ານ ດອນສະຖຽນ ບຸນມີອາໄພ ວ່າການຫົວໜ້າສາຂາທະນາຄານແຫ່ງ ສປປ ລາວ ພາກເໜືອແຂວງຊຽງຂວາງ, ທ່ານ ດວງຈັນ ດວງປະເສີດ ບໍລິສັດ ສະຫວັນໄຊກຣຸບ ແລະ ທ່ານ ສົມພອນ ອຸດົມສຸກ ບໍລິສັດ ອຸດົມສຸກ ຄອນກຣີດ ແລະ ກ່າວຮັບແມ່ນ ທ່ານ ບຸນຈັນ ສີວົງພັນເຈົ້າແຂວງຊຽງຂວາງ, ມີທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກິລາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີຍານ.

ສຳລັບພາກສ່ວນທີ່ນຳເງິນມາມອບໃນຄັ້ງນີ້ປະກອບມີ ບໍລິສັດ ລາວສຳພັນ ຈຳກັດ ໄດ້ມອບເງິນ 100.000.000 ກີບ, ສາຂາທະນາຄານແຫ່ງ ສປປ ລາວ ພາກເໜືອແຂວງຊຽງຂວາງ ມອບ 50.000.000 ກີບ, ບໍລິສັດ ສະຫວັນໄຊ ກຣຸບ ມອບ 50.000.000 ກີບ ແລະບໍລິສັດ ອຸດົມສຸກ ຄອນກຣີດ ມອບ 5.000.000 ກີບ ເພື່ອມອບໃຫ້ກັບແຂວງຊຽງຂວາງນຳໃຊ້ເຂົ້າໃນການຈັດງານມະຫະກຳກິລາແຫ່ງຊາດ ຄັ້ງທີ 11 ໃຫ້ດຳເນີນໄປດ້ວຍຜົນສຳເລັດຕາມລະດັບຄາດໝາຍ. ຊຶ່ງງານກິລາດັ່ງກ່າວແມ່ນໄດ້ດຳເນີນການແຂ່ງຂັນຕົວຈິງມາຕັ້ງແຕ່ວັນທີ 14 ພະຈິກ ແລະຈະໃຫ້ສຳເລັດໃນວັນທີ 22 ທັນວາ 2022.

ໂອກາດນີ້, ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງໄດ້ກ່າວສະແດງຄວາມຊົມເຊີຍ ແລະຂອບໃຈບໍລິລັດ ລາວສຳພັນ ພັດທະນາ ຈຳກັດ, ສາຂາທະນາຄານແຫ່ງ ສປປ ລາວ ພາກເໜືອແຂວງຊຽງຂວາງ,ບໍລິສັດ ສະຫວັນໄຊ ກຣຸບ ແລະບໍລິສັດ ອຸດົມສຸກ ຄອນກຣີດ ທີ່ອຸປະຖຳ ແລະໃນຕໍ່ໜ້າຫວັງວ່າຈະໄດ້ຮັບການຮ່ວມມືຊ່ວຍເຫຼືອຕື່ມອີກຈາກບັນດາທ່ານ. ພ້ອມທັງຂໍອວຍພອນໄຊໃຫ້ບັນດາທ່ານປະສົບຜົນສຳເລັດໃນການດຳເນີນທຸລະກິດ ແລະຈະເລີນເຕີບໂຕຂຶ້ນຢ່າງບໍ່ຢຸດຢັ້ງ.

ຂ່າວໂດຍ: ລູກນໍ້າເຊ ອິນທະດາລິນ

แชร์