ຫາລືການສົ່ງເສີມພາກທຸລະກິດ ແລະການລົງທຶນ ລະຫວ່າງ ອາຊຽນ-ອີຢູ

ໃນວັນທີ 13 ທັນວາ 2022, ໂດຍການມອບໝາຍຂອງທ່ານ ພັນຄໍາ ວິພາວັນນາຍົກ ລັດຖະມົນຕີ ແຫ່ງ ສປປ ລາວ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມງານລ້ຽງອາຫານທ່ຽງພົບປະລະຫວ່າງຜູ້ນໍາອາຊຽນ ແລະພາກທຸລະກິດອາຊຽນ-ອີຢູ ໂດຍການເປັນເຈົ້າພາບຂອງສະພາທຸລະກິດອາຊຽນ-ອີຢູ ທີ່ບຣຸກແຊນ, ປະເທດແບນຊິກ.

ໂອກາດນີ້, ຜູ້ນໍາອາຊຽນ ແລະຕົວແທນພາກທຸລະກິດໄດ້ປຶກສາຫາລື ແລະແລກປ່ຽນຄໍາຄິດຄໍາເຫັນກ່ຽວກັບການສົ່ງເສີມພາກທຸລະກິດ ແລະການລົງທຶນລະຫວ່າງອາຊຽນ ແລະອີຢູ ໂດຍສະເພາະແມ່ນການຊອກຫາຊ່ອງທາງໃນການອໍານວຍຄວາມສະດວກໃຫ້ແກ່ການດໍາເນີນທຸລະກິດຮ່ວມກັນຢ່າງໂລ່ງລ່ຽນແນໃສ່ຟື້ນຟູເສດຖະກິດພາຍຫລັງການແພ່ລະບາດຂອງພະຍາດໂຄວິດ-19.

ບັນດາຜູ້ນໍາອາຊຽນໄດ້ຕີລາຄາສູງຕໍ່ບົດບາດຂອງພາກທຸລະກິດໃນການຂັບເຄື່ອນເສດຖະກິດ ແລະການຈ້າງງານໃນແຕ່ລະປະເທດພ້ອມທັງຊຸກຍູ້ໃຫ້ຫົວໜ່ວຍທຸລະກິດຂອງອີຢູ ເຂົ້າມາລົງທຶນຢູ່ພາກພື້ນອາຊຽນໃຫ້ຫລາຍຂຶ້ນ ໃນຂົງເຂດທີ່ພາກທຸລະກິດມີຄວາມສົນໃຈ ແລະ ອາຊຽນມີທ່າແຮງ. ພ້ອມນີ້, ບັນດາຜູ້ນໍາອາຊຽນ ແລະພາກທຸລະກິດຂອງອີຢູ ຍັງໄດ້ປຶກສາຫາລືກ່ຽວກັບການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການຄ້າ-ການລົງທຶນ ແລະໄດ້ແລກປ່ຽນຂໍ້ມູນ, ປະສົບການ, ສິ່ງທ້າທາຍ ແລະບົດຮຽນທີ່ດີໃນການດໍາເນີນທຸລະກິດໂດຍສຸມໃສ່ການຫັນເປັນເສດຖະກິດດີຈິຕອນທີ່ທັນສະໄໝໄປຄຽງຄູ່ກັບການຄໍານຶງເຖິງຜົນກະທົບຕໍ່ສິ່ງແວດລ້ອມ.

ໃນຕອນທ້າຍຂອງງານລ້ຽງອາຫານທ່ຽງ, ອີຢູໄດ້ແຈ້ງຂໍ້ລິເລີ່ມໃໝ່ໃນການເຊື່ອມໂຍງສາກົນ (Global Gateway) ຊຶ່ງເປັນຂໍ້ລິເລີ່ມໃນການຊຸກຍູ້ການຮ່ວມມືເພື່ອການຫັນປ່ຽນທາງດ້ານພະລັງງານ ແລະການເຊື່ອມຈອດດ້ານດີຈິຕອນທີ່ຈະຊ່ວຍໃຫ້ຄູ່ຮ່ວມມືສາມາດບັນລຸເປົ້າໝາຍການພັດທະນາທີ່ຍືນຍົງ.
ຂ່າວ: ຂປລ. ພາບ: ກົມການຂ່າວ, ກະຊວງການຕ່າງປະເທດ

แชร์