ບານສົ່ງຫາດຊາຍ ແຂວງບໍ່ແກ້ວມາແຮງຊະນະຄູ່ແຂ່ງຂາດລອຍ ຫວັງຕິດ 1 ໃນ 3 ກິລາ ຊຽງຂວາງເກມ

ການແຂ່ງຂັນກິລາບານສົ່ງຫາດຊາຍ ງານມະຫາກຳກິລາແຫ່ງຊາດ ຄັ້ງທີ XI ຊຽງຂວາງເກມ ໄດ້ເປີດຂຶ້ນຢ່າງເປັນທາງການໃນວັນທີ 12 ທັນວາທີ່ຜ່ານມາ ເຊິ່ງທັບນັກກິລາ ຫາດຊາຍ ແຂວງບໍ່ແກ້ວ ໄດ້ເຝິກຊ້ອມມາຢ່າງໜັກ ແລະມາແຮງລົງສະໜາມໃນນັດທຳອິດໃນຕອນເຊົ້າວັນທີ 14 ທັນວາ 2022 ສາມາດເອົາຊະນະ ແຂວງ ເຊກອງ ໄປແບບລອຍ 2-0 ເຊັດ ດ້ວຍຄະແນນ 21-13 ແລະ 21-10.

ການແຂ່ງຂັນກິລາບານສົ່ງຫາດຊາຍຊຽງຂວາງເກມ ປະກອບມີສອງສາຍຄື: ສາຍ (ກ) ແຂວງເຊກອງ, ແຂວງຄຳມ່ວນ, ແຂວງອັດຕະປື, ແຂວງບໍ່ແກ້ວ ແລະ ກະຊວງປ້ອງກັນປະເທດ. ສາຍ (ຂ )ປະກອບມີ ກະຊວງສາທາລະນະສຸກ, ນະຄອນຫຼວງວຽງຈັນ, ແຂວງໄຊຍະບູລີ, ແຂວງຈຳປາສັກ ແລະເຈົ້າພາບແຂວງຊຽງຂວາງ ເຊິ່ງ ທັບນັກກິລາຫາດຊາຍແຂວງບໍ່ແກ້ວລົງນັດທຳອິດມີຄວາມພ້ອມເຕັມຮ້ອຍຫລັງຈາກເຝິກຊ້ອມມາຢ່າງໜັກທັກສະການຫລີ້ນມາແຮງເອົາຊະນະຄູ່ແຂ່ງແບບຂາດລອຍເຊິ່ງໃນເຊັດທຳອິດຂອງການແຂ່ງຂັນ ແຂວງບໍ່ແກ້ວໃຊ້ໂຕຫລີ້ນຫລັກທີ່ມີປະສົບການສາມາດເກັບຄະແນນໜີຫ່າງແຂວງເຊກອງໄປຫລາຍສົມຄວນຈົນສາມາດເອົາຊະນະໄປໃນເຊັດທຳອິດ ດ້ວຍຄະນະ 21-13 ມາໃນເຊັດທີສອງແຂວງບໍ່ແກ້ວຍັງຮັກສາທັກສະການຫລີ້ນໄດ້ດີຜູ້ຫລີ້ນສອງຕົວຫລັກປະສານງານກັນແບບລົງຕົວ ເກັບຄະແນນໜີຫ່າງຄູ່ແຂ່ງຂັນໄປໄດ້ຫລາຍຄະແນນຈົນສາມາດເອົາຊະນະໄປດ້ວຍຄະແນນ 21-10 ເຮັດໃຫ້ ທັບນັກກິລາຫາດຊາຍ ແຂວງບໍ່ແກ້ວ ເອົາຊະນະໄປແບບຂາດລອຍ 2-0 ເຊັດ. ສ່ວນນັດທີສອງແຂວງບໍ່ແກ້ວຈະພົບກັບ ທີມ ຈາກກະຊວງປ້ອງກັນປະເທດ ໃນຕອນແລງຂອງມື້ນີ້ ຖ້າຊະນະ ຈະມີໂອກາດສູງໃນການເຂົ້າຮອບຕໍ່ໄປ.

ທ່ານ ບຸນລ້ອມ ຫັດສະຄອນ ຜູ້ຈັດການທີມແຂວງບໍ່ແກ້ວ ໄດ້ໃຫ້ສຳພາດຕໍ່ນັກຂ່າວໜັງສືພິມກອງທັບວ່າ:ທັບນັກກິລາບານສົ່ງຫາດຊາຍແຂວງບໍ່ແກ້ວ ໄດ້ສົ່ງນັກກິລາເຂົ້າຮ່ວມເປັນຄັ້ງທຳອິດໃນງານກິລາຊຽງຂວາງເກມຄັ້ງນີ້ທັບນັກກິລາຂອງພວກເຮົາໄດ້ມີການກະກຽມນັກກິລາແລະເຝິກຊ້ອມມາໃນໄລຍະໜຶ່ງໄດ້ທຸ່ມເທທັງຮ່າງກາຍແລະຈິດໃຈເຂົ້າໃນການເຝິກຊ້ອມໃຫ້ຖືກຕາມລະບົບເພື່ອເປັນຕົວແທນໃຫ້ແກ່ແຂວງບໍ່ແກ້ວຂອງພວກເຮົາເຂົ້າຮ່ວມງານກິລາແຫ່ງຊາດຄັ້ງນີ້ ແລະຫວັງຍາດເອົາຫລຽນໃດຫລຽນໜຶ່ງເປັນຂອງຂັວນມອບໃຫ້ຊາວແຂວງບໍ່ແກ້ວເຖິງຢ່າງໃດກໍຕາມພວກເຮົາກໍຈະສູ້ຊົນຈົນສຸດຄວາມສາມາດຕາມການມອບໝາຍຂອງຄະນະນຳ ແຂວງບໍແກ້ວ ກໍຄືປະຊາຊົນ ແຂວງບໍ່ແກ້ວມອບໝາຍໃຫ້. ໂອກາດດັ່ງກ່າວກໍຂໍເຊີນຊວນພໍ່ແມ່ປະຊົນຊາວແຂວງບໍ່ແກ້ວກໍຄືມວນຊົນທີ່ມາຮັບຊົມງານກິລາແຫ່ງຊາດຄັ້ງນີ້ມາຮ່ວມຊົມຮ່ວມເຊຍ ກິລາບານສົ່ງຫາດຊາຍແຂວງບໍ່ແກ້ວຂອງພວກເຮົາຮັບຮອງວ່າຈະມີຄວາມຟົດຟື້ນມ່ວນຊື່ນຢ່າງແນ່ນອນ.

แชร์