ທ່ານຮອງລັດຖະມົນຕີກະຊວງ ຖວທ ລົງຕິດຕາມສູນຂ່າວກິລາຊຽງຂວາງເກມ

ໃນວັນທີ 24 ທັນວາ 2022, ຢູ່ສູນຂ່າວກິລາ ແຂວງຊຽງຂວາງ, ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລ່ງຂ່າວ, ວັດທະນະທໍາ ແລະທ່ອງທ່ຽວ, ໄດ້ລົງຕິດຕາມຊຸກຍູ້ສູນຂ່າວໃນງານມະຫະກໍາກິລາ ຄັ້ງທີ 11, ທີ່ຊຽງຂວາງເປັນເຈົ້າພາບ, ໂດຍມີຫົວໜ້າກົມສື່ມວນຊົນ, ຮອງກົມ ແລະບັນດາສື່ມວນຊົນ ເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ, ທ່ານ ໂພສີ ແກ້ວມະນີວົງ ໄດ້ຊົມເຊີຍບັນດາສື່ມວນຊົນທີ່ພວມປະຕິບັດໜ້າທີ່ວຽກງານຕົວຈິງຈົນມີຄວາມສຳເລັດ. ພ້ອມດຽວກັນນັ້ນ, ກໍໄດ້ແນະນໍາໃຫ້ບັນດາສື່ມວນຊົນ ໃຫ້ມີຄວາມພະຍາຍາມອົດທົນເຮັດໜ້າທີ່ຂອງຕົນທາມກາງສະພາບທີ່ມີຄວາມຫຍຸ້ງຍາກບາງດ້ານ ແລະ ໃຫ້ສໍາເລັດໃນການຮັບໃຊ້ງານມະຫະກໍາກິລາແຫ່ງຊາດ ຄັ້ງທີ 11 ກໍຄື ແຂວງຊຽງຂວາງເປັນເຈົ້າພາບລຸລ່ວງໄປດ້ວຍດີມີໄຊ.

แชร์