ສູນວິໄຈດິນ, ພືດ ແລະຝຸ່ນ ມີຄວາມສຳຄັນຕໍ່ການພັດທະນາວຽກງານກະສິກຳໃນ ສປປ ລາວ

ໃນປັດຈຸບັນ ການວິໄຈດິນ, ພືດ ແລະຝຸ່ນ ເປັນສິ່ງສຳຄັນທີ່ສຸດຕໍ່ກັບກະສິກອນ ທີ່ກຳລັງປູກພືດຜັກອິນຊີຈະເຮັດໃຫ້ກະສິກອນໄດ້ຮູ້ເຖິງຄວາມສົມບູນຂອງດິນແຕ່ລະຕອນ ແລະຄວນເພີ່ມຝຸ່ນ ຫລືສານອາຫານປະເພດໃດລົງໃນດິນເພື່ອເຮັດໃຫ້ດິນມີຄວາມສົມບູນເໝາະແກ່ການປູກພືດຜັກແຕ່ລະຊະນິດ, ເພາະເວລານຳເອົາພືດຜັກຕ່າງໆລົງໄປປູກຈະເຮັດໃຫ້ພືດພັນນັ້ນມີການເຕີບໃຫຍ່ ແລະອຸດົມສົມບູນ.

ທ່ານ ນີວົງ ສີປະເສີດ ຫົວໜ້າກົມຄຸ້ມຄອງ ແລະ ພັດທະນະທີ່ດິນກະສິກຳ, ກະຊວງກະສິກຳ ແລະປ່າໄມ້ໄດ້ໃຫ້ຕໍ່ສື່ມວນຊົນເມື່ອບໍ່ດົນນີ້ວ່າ: ກົມຄຸ້ມຄອງ ແລະພັດທະນະທີ່ດິນກະສິກຳ ເປັນອີກກົມໜຶ່ງທີ່ເປັນເສນາທິການໃຫ້ແກ່ກະຊວງກະສິກຳ ແລະ ປ່າໄມ້ ໃນການຈັດຕັ້ງປະຕິບັດວຽກງານ 4 ເສົ້າຄ້ຳຫລັກ: ການຜະລິດສະບ່ຽງອາຫານສຳລັບບໍລິໂພກພາຍໃນປະເທດ; ຜະລິດກະສິກຳສະບ່ຽງອາຫານເພື່ອສົ່ງອອກເປັນສິນຄ້າ; ການປົກປັກຮັກສາຄຸ້ມຄອງປ່າໄມ້ໃຫ້ໄດ້ 70%; ການແກ້ໄຂຄວາມທຸກຍາກ, ການກໍ່ສ້າງພື້ນຖານໂຄງລ່າງ ແລະ ພັດທະນາຊົນນະບົດເປັນວຽກທີ່ສຳຄັນ. ສູນວິໄຈດິນ, ພືດ ແລະ ຝຸ່ນ ກະຊວງກະສິກຳ ແລະ ປ່າໄມ້ ມີເຕັກໂນຊີທີ່ທັນສະໄໝເພື່ອວິໄຈດິນ, ພືດ ແລະຝຸ່ນ. ສະນັ້ນ, ກະສິກອນສາມາດນຳເອົາດິນຂອງຕົນເອງມາວິໄຈໄດ້ທີ່ສູນວິໄຈດິນ ບ້ານໜອງວຽງຄຳ, ນະຄອນຫລວງວຽງຈັນ.

ປັດຈຸບັນນີ້, ການວິໄຈດິນຖືໄດ້ວ່າເປັນວຽກທີ່ສຳຄັນທີ່ສຸດ ໂດຍສະເພາະ ກະສິກຳທີ່ຈະສົ່ງອອກພືດໄປຕ່າງປະເທດເປັນຕົ້ນ ສປ ຈີນ, ສສ ຫວຽດນາມ ແລະໄທ ຕ່າງກໍຕ້ອງການຜົນການຢັ້ງຢືນຜະລິດຕະພັນກະສິກຳ ທີ່ບໍ່ມີໂລຫະໜັກເຈື່ອປົ່ນ ແລະ ເປັນຜະລິດຕະພັນກະສິກຳທີ່ມີຄຸນນະພາບ. ໃນ 1 ປີທີ່ຜ່ານມາ ສູນວິໄຈດິນ, ພືດ ແລະ ຝຸ່ນ ສາມາດວິໄຈດິນ, ນໍ້າ ແລະຝຸ່ນທີ່ຊາວກະສິກອນສົ່ງມາວິໄຈໄດ້ຫລາຍກວ່າ 2.000 ຕົວຢ່າງ.

ທ່ານ ໄຊສະຖິດ ສຸລິຍະວົງສາ ຮັກສາການຫົວໜ້າສູນວິໄຈດິນ, ພືດ ແລະຝຸ່ນ ໄດ້ກ່າວວ່າ: ສູນວິໄຈດິນຂອງພວກເຮົາເປັນເສນາທິການໃຫ້ແກ່ກົມຄຸ້ມຄອງ ແລະ ພັດທະນະທີ່ດິນກະສິກຳ (ຄພດກ) ໃນການສະໜອງຂໍ້ມູນທາດອາຫານພືດ ພ້ອມດ້ວຍປັດໄຈທີ່ກ່ຽວຂ້ອງຕໍ່ຄວາມເປັນປະໂຫຍດຂອງທາດອາຫານພືດ, ສານຕົກຄ້າງທີ່ເປັນອັນຕະລາຍໃນດິນ, ຂໍ້ມູນທາງດ້ານຟິຊິກຂອງດິນເຊັ່ນ: ຄວາມໜາແໜ້ນຂອງດິນ, ຄວາມຜຸຜຸ່ຍ, ການກັກເກັບນ້ຳໃນດິນ ແລະ ປະເພດເນື້ອດິນ, ທັງນີ້ ກໍເພື່ອນຳໃຊ້ເຂົ້າໃນການປະເມີນຄວາມອຸດົມສົມບູນຂອງດິນ, ການປັບປຸງດິນ ແລະ ການວາງແຜນນຳໃຊ້ທີ່ດິນໃຫ້ມີຄວາມຍືນຍົງ. ພ້ອມດຽວກັນນີ້, ພວກເຮົາຍັງໃຫ້ບໍລິການວິໄຈດິນ, ພືດ, ຝຸ່ນ ແລະນໍ້າໃຫ້ກະສິກອນທົ່ວໄປ, ຜູ້ປະກອບການຜະລິດຝຸ່ນ, ຜູ້ປະກອບການປູກພືດ ແລະໂຄງການຕ່າງໆ. ນອກຈາກນີ້, ພວກເຮົາກຳລັງພັດທະນາການວິໄຈສິ່ງທີ່ມີຊີວິດໃນດິນ ແລະ ຝຸ່ນ ໂດຍສະເພາະແມ່ນຈຸລິນຊີ ເພື່ອສະໜັບສະໜູນໃຫ້ການຜະລິດກະສິກຳສະອາດ ແລະກະສິກຳອິນຊີໃຫ້ມີທ່າກ້າວຂະຫຍາຍຕົວ.
ໃນແຕ່ລະປີ ສູນວິໄຈດິນ ໄດ້ຈັດກິດຈະກຳພົບປະກັບກະສິກອນ, ລົງໄປວິໄຈດິນດ້ວຍລົດເຄື່ອນທີ່ ສາມາດວັດຄ່າຂອງດິນໄດ້ກັບທີ່ ແລະ ໄດ້ເຜີຍແຜ່ໃຫ້ກະສິກອນໄດ້ຮູ້ເຖິງຄວາມໝາຍຄວາມສຳຄັນຂອງການວິໄຈດິນ, ຮູ້ເຖິງຄຸນນະພາບຂອງດິນເພື່ອຈະໄດ້ເບິ່ງແຍງຮັກສາໃຫ້ສາມາດນຳໃຊ້ດິນໄດ້ຢ່າງຍາວນານ ແລະຍັງເປັນການສ້າງ ສາຍພົວພັນລະວ່າງວິຊາການ ແລະກະສິກອນໃຫ້ດີຂື້ນ.

ໂອກາດດຽວກັນ, ທ່ານ ຄຳພູ ຟັນທະບູນ ຫົວໜ້າກຸ່ມກະສິກຳອິນຊີບ້ານໂນນແຕ້ ເມືອງໄຊທານີ ນະຄອນຫລວງວຽງຈັນ ກໍໄດ້ໃຫ້ຮູ້ວ່າ: ຄວາມສຳຄັນຫລັກໆໃນການຜະລິດກະສິກຳອິນຊີແມ່ນການວິໄຈດິນຫາຄ່າຕ່າງໆທີ່ຢູ່ໃນດິນ. ໃນມື້ນີ້, ສູນວິໄຈດິນກະຊວງກະສິກຳ ແລະປ່າໄມ້ໄດ້ລົງມາສົມທົບກັບບ້ານ ແລະກຸ່ມພວກເຮົາເພື່ອມາວິໄຈດິນ ເພື່ອໃຫ້ເຮົາຮັບຮູ້ໄດ້ວ່າດິນຢູ່ແຕ່ລະສວນຂອງກຸ່ມກະສິກຳຂອງບ້ານໂນນແຕ້ມີທາດຫຍັງແດ່ທີ່ຍັງບໍ່ພຽງພໍ,ຄວນຕ້ອງຕື່ມຝຸ່ນຊະນິດໃດລົງໄປໃນດິນເພື່ອຈະສາມາດປູກພືດຜັກຕ່າງໆໃຫ້ໄດ້ຄຸນນະພາບ ແລະປະລິມານ.
ຂ່າວ: ຂປລ. ພາບ: ສຸກສະຫວັດ

แชร์