ຮໍ່າຮຽນເອົາຄຸນງາມຄວາມດີຂອງປະທານ ໄກສອນ ພົມວິຫານ ຜູ້ອຸທິດຕົນເພື່ອພາລະກິດ ປະຕິວັດ ປົດປ່ອຍຊາດ

ວັນທີ 13 ທັນວາ ແມ່ນວັນເກີດປະທານ ໄກສອນ ພົມວິຫານ ເຊີ່ງປີນີ້ຄົບຮອບ 102 ປີພໍດີ. ເມື່ອເວົ້າເຖີງປະທານ ໄກສອນ ພົມວິຫານ, ປະຊາຊົນລາວບັນດາເຜົ່າຄົງບໍ່ ມີໃຜປະຕິເສດວ່າບໍ່ຮູ້ຈັກ ເພາະປະຫວັດ, ຜົນງານ ແລະ ຄຸນງາມຄວາມດີ ກໍຄື ພາລະກໍາຂອງເພີ່ນທີ່ມີຕໍ່ປະເທດ ຊາດແມ່ນລໍ້າເລີດ ແລະ ໃຫຍ່ຫລວງຈົນເກີນກວ່າທີ່ທຸກຄົນຈະຫລົງລືມໄດ້ເພາະນັບແຕ່ບາດກ້າວທໍາອິດຂອງການກ້າວເຂົ້າສູ່ກະແສຟອງແຫ່ງການປະຕິວັດໃນປີ 1944 ເປັນຕົ້ນມາຊີວິດຂອງເພີ່ນໄດ້ຕິດພັນກັບພາລະກິດປະຕິວັດປົດປ່ອຍຊາດ, ອຸທິດຊີວິດໃຫ້ແກ່ປະເທດຊາດ ແລະປະຊາຊົນລາວບັນດາເຜົ່າ, ເພິ່ນໄດ້ສຸມທຸກສະຕິປັນຍາຄວາມຮູ້-ຄວາມສາມາດ ແລະຄວາມສະຫລຽວສະຫລາດຂອງຕົນຢ່າງບໍ່ຮູ້ອິດເມື່ອຍໃນພາລະກິດກອບກູ້ເອກະລາດຕ້ານການຮຸກຮານຂອງພວກລ່າເມືອງຂຶ້ນທັງແບບເກົ່າ ແລະ ແບບໃໝ່ທີ່ຍືດເຍື້ອຍາວນານ, ທັງເປັນຜູ້ກໍ່ຕັ້ງກອງລາດຊະວົງ ຊຶ່ງເປັນຕົ້ນກໍາເນີດກອງທັບປະຊາຊົນລາວ ແລະເປັນຜູ້ປະກາດສ້າງຕັ້ງພັກປະຊາຊົນລາວ ຫລືພັກປະຊາຊົນ ປະຕິວັດລາວ ໃນປັດຈຸບັນ.

ປະທານໄກສອນ ພົມວິຫານ ໄດ້ປະກອບສ່ວນສໍາຄັນທີ່ສຸດເຂົ້າໃນການຕັດສິນຊີ້ຂາດທຸກບັນຫາພ້ອມກັບຜູ້ນໍາທ່ານອື່ນໆ ນຳພາການປະຕິວັດຈາກໄຊຊະນະນີ້ໄປສູ່ໄຊຊະນະໃໝ່ໃຫຍ່ຫຼວງກ່ວາເກົ່າ ຈົນສາມາດປົດປ່ອຍປະເທດຊາດ, ນຳເອົາຄວາມເປັນເອກະລາດ, ອິດສະຫລະພາບ ແລະຜືນແຜ່ນດິນອັນຄົບຖ້ວນມາໃຫ້ແກ່ປວງຊົນລາວບັນດາເຜົ່າໄດ້ຢ່າງມີໄຊ ແລ້ວສະຖາປະນາ ສປປ ລາວ ຢ່າງສະຫງ່າຜ່າເຜີຍໃນວັນທີ 2 ທັນວາປີ 1975, ຈາກນັ້ນ ໄດ້ສືບຕໍ່ນຳພາປວງຊົນລາວທັງຊາດປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະສ້າງສາປະເທດຊາດ ເພື່ອກ້າວສູ່ຈຸດໝາຍສັງຄົມນິຍົມດ້ວຍທ່າກ້າວທີ່ໜັກແໜ້ນ ແລະ ມີຜົນສຳເລັດຢ່າງຕໍ່ເນື່ອງ.
ມູນເຊື້ອປະຕິວັດ, ຄຸນທາດການເມືອງ, ຄຸນສົມບັດສິນທໍາ, ແບບແຜນວິທີເຮັດວຽກ ແລະການດໍາລົງຊີວິດຂອງປະທານ ໄກສອນ ພົມວິຫານ ໄດ້ເປັນແວ່ນແຍງອັນໃສແຈ້ງໃຫ້ແກ່ພະນັກງານ, ສະມາຊິກພັກ, ນັກຮົບ ແລະ ພົນລະເມືອງລາວທຸກໆຄົນ.

ດັ່ງນັ້ນ, ເພື່ອສືບຕໍ່ຮັກສາໝາກຜົນຂອງການປະຕິວັດກໍຄືການປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະສ້າງສາພັດທະນາປະເທດຊາດໃນປັດຈຸບັນນີ້ທີ່ພວມປະສົບກັບຄວາມຫຍຸ້ງຍາກຫລາຍຢ່າງໂດຍສະເພາະຄວາມຫຍຸ້ງຍາກທາງດ້ານເສດຖະກິດ-ການເງິນຂອງປະເທດ, ບວກກັບປະກົດການຫຍໍ້ທໍ້ທີ່ເກີດຂຶ້ນຍ້ອນບັນຫາຢາເສບຕິດ, ການລະບາດຂອງພະຍາດໂຄວິດ-19 ແລະອື່ນໆ.

ຍິ່ງກວ່າເວລາໃດໝົດບັນດາການນໍາກໍຄືພະນັກງານ ແລະສະມາຊິກພັກຮຸ່ນໃໝ່ຕ້ອງໄດ້ສຶກສາຮໍ່າຮຽນເອົາແບບຢ່າງຄຸນສົມບັດ, ທາດແທ້ປະຕິວັດ, ຄວາມຈົງຮັກພັກດີຕໍ່ປະເທດຊາດ, ແບແຜນການເຄື່ອນໄຫວນໍາພາ ແລະການດໍາລົງຊີວິດຂອງເພີ່ນນໍາໄປປະຕິບັດ, ຖືອັນນັ້ນເປັນໄມ້ຫຼາວັດແທກດ້ານຄຸນສົມບັດ, ທັດສະນະທ່າທີຂອງພະນັກງານທັງເປັນການເພີ່ມພູນຄູນສ້າງມູນເຊື້ອອັນຈົບງາມຂອງບັນພະບູລຸດກໍຄືປະທານ ໄກສອນ ພົມວິຫານຜູ້ນໍາທີ່ແສນເຄົາລົບຮັກຂອງປະຊາຊົນລາວບັນດາເຜົ່າ ເພື່ອໃຫ້ຕົນເອງກາຍເປັນຜູ້ທີ່ມີຄວາມຮູ້ຄວາມສາມາດ ແລະ ມີທັດສະນາຫລັກໜັ້ນທີ່ໜັກແໜ້ນ, ພ້ອມເສຍສະຫລະເພື່ອປະເທດຊາດ ແລະ ບໍ່ສວຍໃຊ້ໜ້າທີ່ຕໍາແໜ່ງຂອງຕົນເພື່ອຫາຜົນປະໂຫຍດສ່ວນຕົວໃນທຸກຮູບແບບ. ທັ້ງໝົດນີ້ເພື່ອສ້າງໃຫ້ຕົນເອງກາຍເປັນຜູ້ສືບທອດພາລະກິດສ້າງສາ ແລະພັດທະນາປະເທດຊາດທີ່ດີ, ເປັນທີ່ໄວ້ເນື້ອເຊື້ອໃຈຂອງພັກ-ລັດ ແລະປະຊາຊົນລາວບັນດາເຜົ່າເພື່ອພັດທະນາປະເທດລາວໃຫ້ນັບມື້ຈະເລີນກ້າວໜ້າຂຶ້ນໄປຢ່າງບໍ່ຢຸດຢັ້ງ.
“ປະທານ ໄກສອນ ພົມວິຫານ ຍືນຍົງໃນພາລະກິດປະຕິວັດ ຂອງປະຊາຊົນລາວ ຕະຫຼອດໄປ”.
ໂດຍ: Lao National radio. ບຸນຕຽງ ຈັນທະວົງ

แชร์