ຄະນະພັກ-ຄະນະນຳ ນະຄອນຫຼວງວຽງຈັນ ຢ້ຽມຢາມໃຫ້ກຳລັງໃຈນັກກິລາ ໄລ່ລ່າຫຼຽນຄຳ ຊຽງຊວາງເກມ

ຄະນະພັກ-ຄະນະນຳ ນະຄອນຫຼວງວຽງຈັນ ນຳໂດຍ ທ່ານ ພົຈ ສີພອນ ຈັນສົມວົງ ຮອງເລຂາຄະນະພັກ ນະຄອນຫຼວງວຽງຈັນ ແລະທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ ຜູ້ຊີ້ນຳວຽກງານວັດທະນະທຳ-ສັງຄົມ ແລະການປົກຄອງຢ້ຽມຢາມນັກກີລານະຄອນຫຼວງວຽງຈັນ ທີ່ເຂົ້າຮ່ວມການແຂ່ງຂັນງານກີ ລາແຫ່ງຊາດ ຄັ້ງທີ XI ຊຽງຂວາງເກມ 2022.

ການຢ້ຽມຢາມຄັ້ງນີ້ກໍເພື່ອເປັນການສ້າງຂັນກຳລັງໃຈໃຫ້ກັບນັກກີລາເພື່ອກຽມຄວາມພ້ອມເຂົ້າຮ່ວມການແຂ່ງຂັນການຢ້ຽມຢາມຄັ້ງນີ້ໄດ້ຮັບຟັງການລາຍງານສະພາບການເຂົ້າຮ່ວມແຂ່ງຂັນຂອງນັກກີລາຄູເຝິກ ແລະຜົນສຳເລັດຂອງການເຂົ້າຮ່ວມຂອງກີລາບາງປະເພດທີ່ລວມເຖິງຄວາມສະດວກ ແລະ ຄວາມຫຍຸ້ງຍາກ ໃນການເຂົ້າຮ່ວມແຂ່ງຂັນຄັ້ງນີ້.

ໂອກາດດັ່ງກ່າວ ທ່ານ ພົຈ ສີພອນ ຈັນສົມວົງ ໄດ້ສະແດງຄວາມຊົມເຊີຍຕໍ່ ຄູຝຶກ ແລະນັກກິລາ ແຕ່ລະປະເພດທີ່ໄດ້ເອົາໃຈໃສ່ໃນການຝຶກຊ້ອມເພື່ອເຂົ້າຮ່ວມງານຄັ້ງນີ້ ໂດຍສະເພາະແມ່ນນັກກິລາທີ່ໄດ້ສຳເລັດການເຂົ້າຮ່ວມແຂ່ງຂັນ ທີ່ສາມາດຍາດຫຼຽນລາງວັນມາຄອງສຳລັບນັກກິລາທີ່ກຳລັງແຂ່ງຂັນ ແລະກະກຽມເຂົ້າຮ່ວມການແຂ່ງຂັນກໍຕ້ອງເອົາໃຈໃສ່ສືບຕໍ່ການຝຶກຊ້ອມໃຫ້ມີຄວາມພ້ອມທັງດ້ານກຳລັງກາຍກຳລັງໃຈ ແລະຕ້ອງເອົາໃຈໃສ່ປະຕິບັດຕາມກົດກະຕິກາກົດລະບຽບກິລາ ເພື່ອຮັກສາໄດ້ຄວາມສາມັກຄີມິດຕະພາບໃນການແຂ່ງຂັນສ້າງຜົນງານໃຫ້ອອກມາດີທີ່ສຸດ.

ໂອກາດດຽວກັນ, ທ່ານ ພູວົງ ວົງຄຳຊາວ ກໍໄດ້ເນັ້ນໜັກໃຫ້ນັກກິລາສູ້ຊົນຍາດໄດ້ຫຼຽນຄຳ ຕາມເປົ້າໝາຍທີ່ວາງໄວ້ ມາສູ່ຊາວນະຄອນຫຼວງວຽງຈັນ ຢ່າງພາກພູມໃຈ ເພື່ອຮັບປະກັນໃຫ້ໄດ້ຜົນງານຄືແນວນັ້ນ ທຸກຄົນຕ້ອງເພີ່ມທະວີເກັບກ່ຽວເອົາປະສົບການ ເພື່ອພັດທະນາຕົນເອງໃຫ້ກຽມພ້ອມເຂົ້າຮ່ວມການແຂ່ງຂັນໃນຄັ້ງນີ້​ ແລະ ເທື່ອໜ້າ ສ່ວນຄະນະຮັບຜິດຊອບ ແລະ ຄູຝຶກ ກໍຕ້ອງເອົາໃຈໃສ່ໃສ່ເບິ່ງແຍງດູແລນັກກິລາໃຫ້ມີຄວາມພ້ອມໃນການເຂົ້າຮ່ວມການແຂ່ງຂັນສ່ວນການສະໜັບສະໜູນ ແມ່ນບໍ່ໃຫ້ນັກກິລາ ແລະຄູເຝິກເປັນຫ່ວງເພາະການສະໜັບສະໜູນແມ່ນມີຢູ່ໃນແຜນແລ້ວຂໍພຽງແຕ່ນັກກິລາສູ້ດ້ວຍຈິດໃຈ ແລະພາລະກຳລັງເພື່ອນຳເອົາຜົນສຳເລັດມາຝາກຊາວນະຄອນຫຼວງວຽງຈັນ ຢ່າງມີໄຊ.

ສຳລັບການລົງຢ້ຽມຢາມໃຫ້ກຳລັງໃຈນັກກິລາຂອງການນຳນະຄອນຫຼວງວຽງຈັນ ໃນຄັ້ງນີ້ມີຂຶ້ນໃນວັນທີ 13 ທັນວາ 2022 ທີ່ຢູ່ສູນພັກນັກກິລາໂຮງຮຽນມັດທະຍົມສົມບູນສີບຸນເມືອງ ເມືອງແປກ ແຂວງຊຽງຂວາງ ໂດຍໄດ້ຮັບການຕ້ອນຮັບຈາກຄະນະຮັບຜິດຊອບ, ຄູຝຶກ ແລະນັກກິລາປະເພດຕ່າງໆຢ່າງອົບອຸ່ນ.

แชร์