ເຈົ້າແຂວງໄຊສົມບູນ ພ້ອມດ້ວຍຄະນະຊິ້ນຳລວມ ເດີນທາງເຂົ້າຮ່ວມພິທີເປິດງານມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ

ໃນວັນທີ 12 ທັນວາ 2022 ນີ້ ທ່ານ ພອຍຄຳ ຮຸ່ງບຸນຍວງ, ເຈົ້າແຂວງໄຊສົມບູນ ພ້ອມດ້ວຍ ຄະນະຊິ້ນຳລວມກິລາ ແຂວງໄຊສົມບຸນ ໄດ້ເດີນທາງຮອດ ແຂວງຊຽງຂວາງ ເປັນທີຮຽບຮ້ອຍ ເພື່ອເຂົ້າຮ່ວມພິທີເປິດ ການແຂ່ງຂັນງານມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເຊິ່ງຈະໄດ້ເປິດຂື້ນໃນວັນທີ 13 ທັນວາ 2022.

ໂອກາດດັ່ງກ່າວ ທ່ານ ພອຍຄຳ ຮຸ່ງບຸນຍວງ, ເຈົ້າແຂວງໄຊສົມບູນ ແລະຄະນະຊິ້ນຳລວມ ໄດ້ໄປຢ້ຽມຢາມບັນດາຄະນະຮັບຜິດຊອບກິລາ, ຄູຝຶກ ແລະນັກກິລາ ແຂວງໄຊສົມບູນ ທີມາເຂົ້າສູນຢູ່ທີ່ໂຮງຮຽນສາມັນກິນນອນຊົນເຜົ່າ ແຂວງຊຽງຂວາງ ເຊິ່ງໄດ້ຮັບການລາຍງານຜົນການແຂ່ງຂັນໃນໄລຍະຜ່ານມາຈາກ ທ່ານ ພຸດລຳໄພ ທຽມພຣະສອນ ຫົວໜ້າ ຄະນະກອງເລຂາ ແລະກຳມະການເຕັກນິກ ແຂວງໄຊສົມບູນ ໃນການແຂ່ງຂັນຜ່ານມາແມ່ນໄດ້ສຳເລັດແລ້ວ 4 ປະເພດກິລາ ເຊັ່ນ: ກິລາແລ່ນ-ລານ, ກິລາຍິງທະນູ, ກິລາໜ້າເກັກ ແລະ ກິລາບານແຕະ (ຊາຍ) ເຊິ່ງແຂວງໄຊສົມບູນສາມາດຍາດໄດ້ 4 ຫຼຽນຄຳ, 3 ຫຼຽນເງີນ ແລະຢູ່ໃນອັນດັບທີ່ 11 ຈາກ 22 ພາກສ່ວນທີເຂົ້າຮ່ວມລື່ນຄາດໝາຍທີຕັ້ງໄວ້ໃນນັ້ນຍັງ 4 ປະເພດກິລາ ກຳລັງກະກຽມທີຈະແຂ່ງຂັນ ໃນວັນທີ 13 ທັນວາ ນີ້ ເຊັ່ນ: ກິລາໝາກຂ່າງ, ກິລາເປຕັງ,ກິລາກ໋ອຟ ແລະມວຍລາວ.

ຄະນະດຽວກັນທ່ານເຈົ້າແຂວງໄຊສົມບູນຍັງໄດ້ມີຄຳເຫັນໂອ້ລົມໃຫ້ບັນດາຄະນະຮັບຜິດຊອບກິລາ, ຄູຝຶກ ແລະນັກກິລາກ່ອນອື່ນທ່ານໄດ້ສະແດງຄວາມຍ້ອງຍໍ, ຊົມເຊີຍຕໍ່ກັບຜົນງານ ການແຂ່ງຂັນທີຍາດມາໄດ້ ແລະໄດ້ເນັ້ນໜັກໃຫ້ທຸກຄົນສືບຕໍ່ຮັກສາມູນເຊຶ້ອຜົນງານອັນພົ້ນເດັ່ນທີຍາດມາໄດ້ ແລະເອົາໃຈໃສ່ສູ້ຊົນດ້ວຍຄວາມຮັກຜິດຊອບສູງໃນການແຂ່ງຂັນເພື່ອຍາດໃຫ້ໄດ້ໄຊຊະນະອັນໃຫຍ່ມາສູ່ ແຂວງໄຊສົມບູນ.
----
ບກ: ທ່ານ ຄຳສາວ ເລືອງຄຳທິບ
ນັກຂ່າວ: ເຢັ້ງເຊີເຊ່ຍມົວ ຈົ່ງວ່າຊົວໂກ້

แชร์