ສ້າງຄວາມເຂັ້ມແຂງຖານຂໍ້ມູນໂພສະນາການແຫ່ງຊາດ

  ລັດຖະບານໄດ້ຈັດກອງປະຊຸມສ້າງຂີດຄວາມສາມາດແຫ່ງຊາດໃນການຈັດຕັ້ງປະຕິບັດວຽກງານການສ້າງຖານຂໍ້ມູນດ້ານໂພຊະນາການແຫ່ງຊາດ  (NPIN) ເພື່ອສ້າງຄວາມສາມາດໃຫ້ແກ່ວິຊາການໃນການນໍາໃຊ້ຫຼັກຖານ ແລະຂໍ້ມູນທີ່ດີໃນການອອກແບບວາງແຜນ ແລະປະຕິບັດນະໂຍບາຍຂອງໂຄງການກ່ຽວກັບໂພຊະນາການ.

 ກອງປະຊຸມຄັ້ງນີ້ໄດ້ຈັດຂຶ້ນໃນວັນທີ 3 ເມສາ 2019 ທີ່ນະຄອນຫຼວງວຽງຈັນ ຊຶ່ງໄດ້ມີການປຶກສາຫາລືກ່ຽວກັບຂະບວນການດຳເນີນງານຂອງໂຄງການຖານຂໍ້ມູນແຫ່ງຊາດດ້ານໂພສະນາການ ສປປ ລາວ ໂດຍສະເພາະແມ່ນການຮຽນຮູ້ໃນການຕັ້ງຄຳຖາມ, ຄົ້ນຄວ້າດ້ານນະໂຍບາຍ ແລະຄູ່ມືໃນການສ້າງ ແລະ ຄຸ້ມ ຄອງຖານຂໍ້ມູນຈາກທີມງານຊ່ຽວຊານ Global Support Facil ity (GSF) ຂອງອົງການ EU ຊຶ່ງແມ່ນທີມງານສະໜັບສະໜູນທາງດ້ານວິຊາການໃຫ້ແກ່ປະເທດທີ່ຈັດຕັ້ງປະຕິບັດໂຄງການ NIPN ໃນທົ່ວໂລກເພື່ອຖອດຖອນເອົາບົດຮຽນມານຳໃຊ້ເຂົ້າໃນວຽກງານຕົວຈິງຢ່າງມີປະສິດທິພາບ ແລະ ປະສິດຜົນສູງສຸດ.

 ທ່ານ ກິແກ້ວ ຈັນທະບູນລີ ຮອງລັດຖະມົນຕີກະຊວງແຜນການ ແລະການລົງທຶນກ່າວວ່າ: ບັນຫາການຂາດສານອາຫານຢູ່ໃນລາວແມ່ນວຽກງານໜຶ່ງທີ່ລັດ ຖະບານໄດ້ໃຫ້ບູລິມະສິດ ແລະ ພະຍາຍາມແກ້ໄຂສະພາບການຂາດສານອາຫານໃນລາວໂດຍອີງໃສ່ການສຳຫຼວດ LSIS II ໃນປີ 2017 ຊີ້ໃຫ້ເຫັນວ່າສະພາ ບການຂາດສານອາຫານທີ່ຊຳເຮື້ອແມ່ນຫຼຸດລົງຈາກ 44% ໃນປີ  2012 ມາເປັນ 33% ໃນປີ 2017 ແຕ່ຍັງຖືວ່າຢູ່ໃນລະດັບທີ່ສູງຖ້າສົມທຽບກັບປະເທດອື່ນໆທີ່ມີລະດັບການພັດທະນາຄ້າຍຄືກັນໂດຍສະເພາະແລ້ວຍັງມີຫຼາຍແຂວງທຸກຍາກທີ່ມີລະດັບການຂາດສານອາຫານຫຼາຍກວ່າ 40% ຂຶ້ນໄປໃນກຸ່ມເດັກ ນ້ອຍອາຍຸຕໍ່າກວ່າ 5 ປີ ຊຶ່ງເປັນປັດໄຈໜຶ່ງທີ່ຕັດສິນຕໍ່ການສ້າງທຶນດ້ານມະນຸດສົ່ງຜົນກະທົບຕໍ່ກຳລັງແຮງງານທີ່ເຂັ້ມແຂງ, ດັ່ງນັ້ນລັດຖະບານຕ້ອງໄດ້ເພີ່ມຄວາມພະຍາຍາມໃນການແກ້ໄຂບັນຫາດ້ານໂພຊະນາການໃນຕໍ່ໜ້າຢ່າງເອົາຈິງເອົາຈັງ.

  ນອກຈາກນີ້, ທ່ານ ກິແກ້ວ ຈັນທະບູນລີ ຍັງຍົກໃຫ້ເຫັນເຖິງຄວາມສຳຄັນຕໍ່ການສ້າງຖານຂໍ້ມູນດ້ານໂພຊະນາການເພື່ອນຳໃຊ້ເຂົ້າໃນການສ້າງນະໂຍບາຍ ແລະມາດຕະການເພື່ອຊ່ວຍແກ້ໄຂບັນຫາໂພຊະນາການຢູ່ໃນ ສປປ ລາວ ຖ້າປາສະຈາກຖານຂໍ້ມູນດ້ານໂພຊະນາການແລ້ວພວກເຮົາຈະບໍ່ສາມາດເຮັດການຄົ້ນຄວ້າ-ວິໄຈຫາບັນດາສາເຫດ ແລະນະໂຍບາຍແກ້ໄຂສະພາບການຂາດສານອາຫານໄດ້ຢ່າງຊັດເຈນ ແລະ ທັນເວລາ.

ຂ່າວ: ແປ   

แชร์