ສຳມະນາວິຊາການ ຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ

ໃນວັນທີ 12 ທັນວາ 2022, ທີ່ສະຖາບັນການຕ່າງປະເທດ ນະຄອນຫລວງວຽງຈັນ ໄດ້ຈັດສຳມະນາວິຊາການໃນຫົວຂໍ້: “ຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ແລະແນວທາງການຕ່າງປະເທດຂອງ ສປ ຈີນ ໃນຕໍ່ໜ້າກໍຄືກາລະໂອກາດ ແລະສິ່ງທ້າທາຍໃນການພົວພັນຮ່ວມມືຂອງພາກພື້ນ ແລະສາກົນ” ໂດຍການເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ແລະໃຫ້ກຽດບັນຍາຍໂດຍ ທ່ານ ສຽງ ຟ້າງ ຊຽງ (Xiang fang qiang) ອຸປະທູດ ສະຖານທູດ ສປ ຈີນ ປະຈໍາ ສປປ ລາວ.

ການຈັດສຳມະນາຄັ້ງນີ້ເພື່ອເປັນການຮັບຟັງການເຜີຍແຜ່ຜົນສໍາເລັດຂອງກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XX ຂອງພັກຄອມມູນິດຈີນ ທີ່ໄດ້ປິດສາກລົງຢ່າງຈົບງາມ ໃນກາງເດືອນຕຸລາ 2022 ຜ່ານມາ ໂດຍໄດ້ຍົກໃຫ້ເຫັນຜົນງານ ແລະ ຜົນສໍາເລັດອັນຍິ່ງໃຫຍ່ ພາຍໃຕ້ການຊີ້ນໍາ-ນໍາພາ ອັນສະຫລາດສ່ອງໄສຂອງພັກກອມມູນິດຈີນ ຕະຫລອດໄລຍະຜ່ານມາ, ທັງໄດ້ລົງເລິກແນວທາງການຕ່າງປະເທດຂອງ ສປ ຈີນ ທີ່ເປັນຕົວແທນໃຫ້ແກ່ລະບອບການເມືອງສັງຄົມນິຍົມໃນການຫັນເອົາໂອກາດ ເພື່ອສົ່ງເສີມການພົວພັນຮ່ວມມືພາກພື້ນແລະສາກົນກໍຄືການຮັບມືກັບສິ່ງທ້າທາຍນາໆປະການໃນຕໍ່ໜ້າ. ພ້ອມນີ້ຍັງເປັນເວທີແລກປ່ຽນທັດສະນະຮ່ວມກັນ ລະຫວ່າງ ສປປ ລາວ ແລະ ສປ ຈີນ, ຂະແໜງການພົວພັນຕ່າງປະເທດ, ອ້ອມຂ້າງສູນກາງ ແລະ ການສຶກສາຂອງລາວເຮັດໃຫ້ສາມາດຮັບຮູ້ເຖິງນະໂຍບາຍການຕ່າງປະເທດຂອງ ສປ ຈີນ ໃນອີກ 5 ປີຕໍ່ໜ້າ ແລະທ່າອ່ຽງການພົວພັນຮ່ວມມືຂອງຈີນຕໍ່ພາກພື້ນ ແລະສາກົນ ກໍຄື ສປປ ລາວ. ການສຳມະນາດັ່ງກ່າວເປັນກິດຈະກໍາໜຶ່ງຂອງ ສະໂມສອນນັກການທູດລາວ ເພື່ອຕ້ອງການສືບຕໍ່ຮັດແໜ້ນທັງເສີມຂະຫຍາຍການພົວພັນຮ່ວມມືສອງຝ່າຍ ແລະການພົວພັນທີ່ເປັນມູນເຊື້ອອັນດີງາມລະ ຫວ່າງ ສປປ ລາວ ແລະ ສປ ຈີນ ນຳອີກ.

ໃນໂອກາດນີ້, ທ່ານ ທອງຜ່ານ ສະຫວັນເພັດ ໄດ້ຍົກໃຫ້ເຫັນເຖິງການນໍາພາອັນມີພິບໄຫວຂອງຜູ້ນໍາຈີນ ໃນແຕ່ລະຮຸ່ນແຕ່ລະສະໄໝທີ່ຮັກສາໄດ້ແນວທາງຂອງພັກຄອມມູນິດຈີນ ທີ່ມີລັກສະນະພິເສດຂອງ ສປ ຈີນ ໂດຍສະເພາະ ໄດ້ຊົມເຊີຍຜົນສໍາເລັດຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX, ພາຍໃຕ້ການຊີ້ນໍາ-ນໍາພາຂອງ ທ່ານ ສີ ຈິ້ນຜິງ ເຊິ່ງເຮັດໃຫ້ປະເທດຈີນໄດ້ຮັບການພັດທະນາຢ່າງຮອບດ້ານ ທັງພາຍໃນ ແລະຕ່າງປະເທດ, ປະຊາຊົນມີຄວາມໄວ້ເນື້ອເຊື່ອໃຈປະທານ ສີ ຈິ້ນຜິງ ເຮັດໃຫ້ສາມາດສືບຕໍ່ດໍາລົງຕໍາແໜ່ງປະທານປະເທດ ເປັນສະໄໝທີ 3 ເພື່ອຈະໄດ້ນໍາພາ ສປ ຈີນ ບັນລຸເປົ້າໝາຍສະຫັດສະວັດອີກ 100 ປີ ທີ່ 2 ຂອງຕົນ. ພ້ອມດຽວກັນນີ້, ຕະຫລອດໄລຍະ 61 ປີ ສາຍພົວພັນການທູດ ລະຫວ່າງ ສປປ ລາວ ແລະ ສປ ຈີນ ທີ່ມີທັງການພົວພັນຮ່ວມມືທີ່ດີຮອບດ້ານ ແລະຊ່ວຍເຫລືອເຊິ່ງກັນ ແລະກັນ ຢ່າງສະໜິດແໜ້ນຕະຫລອດມາເຮັດໃຫ້ ສປປ ລາວ ແລະ ສປ ຈີນ ກາຍເປັນຄູ່ຮ່ວມຊະຕາກໍາ ລາວ-ຈີນ ເພື່ອພ້ອມກັນປົກປັກຮັກສາລະບອບການເມືອງສັງຄົມນິຍົມ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງຢ່າງບໍ່ຢູດຢັ້ງ. ນອກຈາກນີ້, ການເຕີບໃຫຍ່ຂະຫຍາຍຕົວຂອງ ສປ ຈີນ ຈະເປັນບົດຮຽນອັນລໍ້າຄ່າໃຫ້ແກ່ ສປປ ລາວ ໃນການນໍາພາເອົາປະເທດຊາດຂອງຕົນໃຫ້ມີການພັດທະນາພາຍໃນພາກພື້ນ ແລະສາກົນ ຢ່າງເປັນກ້າວໆໄປ.

ໂອກາດດຽວກັນ, ທ່ານ ໄມ ໄຊຍະວົງສ໌ ຫົວໜ້າສະຖາບັນການຕ່າງປະເທດກ່າວວ່າ: ການສຳມະນາໃນຄັ້ງນີ້ ມີຄວາມໝາຍສໍາຄັນໃນການພົວພັນຮ່ວມມືລະຫວ່າງ ລາວ-ຈີນ ໃນຕໍ່ໜ້າ ທີ່ຈະມີທັງການລະໂອກາດ ແລະ ສິ່ງທ້າທາຍນາໆປະການ ທ່າມກາງການຜັນແປຢ່າງໄວວາຂອງສະພາບການໂລກ ໃນປັດຈຸບັນ. ການເຜີຍແຜ່ຜົນສໍາເລັດຂອງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງ ສປ ຈີນ ໃນຄັ້ງນີ້, ຍັງເປັນການແລກປ່ຽນບົດຮຽນທີ່ສໍາຄັນ, ລົງເລິກວິເຄາະ-ວິໄຈແນວ ທາງການຕ່າງປະເທດຂອງ ສປ ຈີນ ຕໍ່ພາກພື້ນ ແລະສາກົນ ຢ່າງມີສີສັນ ແລະຫລາກຫລາຍຮູບແບບຈາກຂະແໜງການຕ່າງໆ ອ້ອມຂ້າງສູນກາງຂອງລາວ. ພ້ອມນີ້, ທ່ານຍັງສະແດງຄວາມຊົມເຊີຍ ແລະຂອບໃຈ ຕໍ່ຜູ້ບັນຍາຍຈາກສະຖານທູດຈີນ ປະຈໍາລາວ ແລະວິທະຍາກອນລາວ ແລະນັກສໍາມະນາກອນທຸກໆທ່ານທີ່ໄດ້ເອົາໃຈໃສ່ແລກປ່ຽນບົດຮຽນ ແລະປະສົບການທີ່ຫລາກຫລາຍອັນເປັນປະໂຫຍດ ເພື່ອເປັນບົດຮຽນ ແລະບ່ອນອີງອັນສໍາຄັນໃນການຄົ້ນຄວ້າດ້ານການພົວພັນຮ່ວມມື ລາວ-ຈີນ ຕໍ່ໄປໃນອະນາຄົດໃຫ້ເກີດດອກອອກຜົນ, ທັງຮັບປະກັນທາງດ້ານຄຸນນະພາບ ແລະຜົນປະໂຫຍດມາສູ່ປະເທດຊາດ.
ຂໍ້ມູນ-ພາບ: ກະຊວງການຕ່າງປະເທດ

แชร์