ສະມາຄົມກ໊ອຟພີ່ນ້ອງເຊື້ອຊາດລາວຈາກ ອາເມລິກາ ເຄື່ອນໄຫວຢ້ຽມຢາມ ສປປ ລາວ

ສະມາຄົມກ໊ອຟ ພີ່ນ້ອງເຊື້ອຊາດລາວຈາກລັດມິນນິໂຊຕ້າ ແລະລັດວິສຄອນຊິນ, ສ ອາເມລິກາ ເດີນທາງມາເຄື່ອນໄຫວຢ້ຽມຢາມ ແລະແຂ່ງຂັນກິລາກ໊ອຟມິດຕະພາບຢູ່ ສປປ ລາວ ໃນລະຫວ່າງວັນທີ 5-15 ທັນວາ 2022 ນີ້.

ພິທີເປີດການແຂ່ງຂັນກິລາກ໊ອຟມິດຕະພາບລະຫວ່າງ ກະຊວງການຕ່າງປະເທດ, ນັກກິລາກ໊ອຟລາວ ແລະສະມາຄົມກ໊ອຟພີ່ນ້ອງເຊື້ອຊາດລາວຈາກ ລັດມິນນິໂຊຕ້າ ແລະ ລັດວິສຄອນຊິນ ສ ອາເມລິກາ ໄດ້ຈັດຂຶ້ນໃນວັນທີ 7 ທັນວາ 2022, ທີ່ສະໜາມກ໊ອຟເລກວີວ, ນະຄອນຫລວງວຽຈັນ ເຊິ່ງເປີດພິທີການແຂ່ງຂັນໂດຍທ່ານ ຕິ່ງ ສຸກສັນ ຮອງລັດຖະມົນຕີກະຊວງການຕ່າງປະເທດ ແລະມີຮອງລັດຖະມົນຕີ, ຫົວໜ້າກົມ, ຮອງຫົວໜ້າກົມພ້ອມດ້ວຍພະນັກງານພາຍໃນກະຊວງການຕ່າງປະເທດ, ນັກກິລາກ໊ອຟລາວ ແລະສະມາຄົມກ໊ອຟດັ່ງກ່າວເຂົ້າຮ່ວມ, ເຊິ່ງການແຂ່ງຂັນດັ່ງກ່າວໄດ້ໃຊ້ເວລາ2 ວັນຄື: ວັນທີ 7 ແລະ 9 ທັນວາ 2022.

ໃນພິທີ, ທ່ານ ບຸນທະວີ ວິລະວົງ ຫົວໜ້າກົມພົວພັນຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ໄດ້ໃຫ້ຮູ້ວ່າ: ການຈັດງານແຂ່ງຂັນກ໊ອຟມິດຕະພາບໃນຄັ້ງນີ້ ແນໃສ່ເພື່ອສ້າງຄວາມສາມັກຄີຮັກແພງ ລະຫວ່າງ ກະຊວງການຕ່າງປະເທດ, ນັກກິລາກ໊ອຟລາວ ແລະ ສະມາຄົມກ໊ອຟພີ່ນ້ອງເຊື້ອຊາດລາວຈາກ ລັດມິນນິໂຊຕ້າ ແລະ ລັດວິສຄອນຊິນ, ສ ອາເມຣິກາ, ລວມທັງເປັນການຕ້ອນຮັບພີ່ນ້ອງເຊື້ອຊາດລາວຢູ່ຕ່າງປະເທດ ທີ່ກັບມາຢ້ຽມຢາມບ້ານເກີດເມືອງນອນ, ຍາດຕິພີ່ນ້ອງ ແລະ ທ່ອງທ່ຽວ ພາຍຫລັປິດປະເທດມາໄດ້ສອງປີ ຍ້ອນການລະບາດຂອງພະຍາດໂຄວິດ-19. ພ້ອມກັນນີ້, ກໍເພື່ອເປັນການສ້າງຄວາມສາມັກຄີຮັກແພງ ແລະ ໄມຕີຈິດມິດຕະພາບອັນດີງາມ ລະຫວ່າງ ພີ່ນ້ອງຊາວລາວຢູ່ພາຍໃນ ແລະ ຕ່າງປະເທດ.

ນອກຈາກການແຂ່ງຂັນກິລາກ໊ອຟມິດຕະພາບແລ້ວ, ສະມາຄົມດັ່ງກ່າວຍັງໄດ້ເຂົ້າຢ້ຽມຂໍ່ານັບບັນດາການນໍາຂັ້ນສູງຂອງ ສປປ ລາວ ເຊັ່ນ: ທ່ານຮອງລັດຖະມົນຕີກະຊວງການຕ່າງປະເທດ, ທ່ານຮອງປະທານສູນກາງແນວລາວສ້າງຊາດ, ທ່ານຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານຮອງປະທານກໍາມາທິການບັນດາເຜົ່າ ສະພາແຫ່ງຊາດ. ໃນໂອກາດເຂົ້າຢ້ຽມຂໍ່ານັບຄັ້ງນີ້, ບັນດາການນໍາຂອງ ສປປ ລາວ ກໍໄດ້ສະແດງຄວາມຍິນດີຕ້ອນຮັບ ແລະ ໄດ້ແຈ້ງໃຫ້ສະມາຄົມກ໊ອຟດັ່ງກ່າວຊາບ ກ່ຽວກັບທັດສະນະຂອງພັກ-ລັດເຮົາ ທີ່ມີຕໍ່ຄົນເຊື້ອຊາດລາວຢູ່ຕ່າງປະເທດ ໂດຍສະເພາະການປະຕິບັດນະໂຍບາຍ ແລະ ນິຕິກໍາຕ່າງໆ ເຊັ່ນ: ນະໂຍບາຍ ກ່ຽວກັບການໃຫ້ວີຊາ, ການຂໍຢູ່ ສປປ ລາວ ຖາວອນ, ການແຕ່ງດອງ, ກົດໝາຍວ່າດ້ວຍການສົ່ງເສີມການລົງທຶນ ແລະ ແຈ້ງໃຫ້ຊາບສະພາບຂອງການສ້າງສາພັດທະນາປະເທດຊາດຂອງພວກເຮົາ. ພ້ອມກັນນັ້ນ, ຍັງໄດ້ສະເໜີໃຫ້ພີ່ນ້ອງເຊື້ອຊາດລາວຢູ່ຕ່າງປະເທດ ຈົ່ງເພີ່ມທະວີຄວາມສາມັກຄີຮັກແພງກັນໃຫ້ເປັນປຶກແຜ່ນ, ເປັນກ້ອນກໍາລັງໜຶ່ງທີ່ສໍາຄັນໃນວົງຄະນະຍາດແຫ່ງຊາດ ແລະ ສືບຕໍ່ສ້າງຄວາມສາມັກຄີຮັກແພງກັບພີ່ນ້ອງຊາວລາວຢູ່ພາຍໃນປະເທດ ໂດຍຜ່ານກິດຈະກໍາຕ່າງໆເຊັ່ນ: ການມາທ່ອງທ່ຽວ,ມາຮ່ວມບຸນປະເພນີ,ຈັດກິດຈະກໍາກິລາ,ດໍາເນີນທຸລະກິດ ຫລືດ້ານອື່ນໆແນໃສ່ປະກອບສ່ວນເຂົ້າໃນການສ້າງສາພັດທະນາປະເທດຊາດຕາມເງື່ອນໄຂຕົວຈິງ, ຊຸກຍູ້ສົ່ງເສີມໃຫ້ຄົນເຊື້ອຊາດລາວຢູ່ຕ່າງປະເທດ ດໍາລົງຊີວິດຢ່າງຖືກຕ້ອງຕາມລະບຽບກົດໝາຍຂອງປະເທດທີ່ຕົນອາໄສຢູ່, ຮັກສາເອກະລັກຮີດຄອງປະເພນີອັນດີງາມຂອງຊາດລາວໄວ້ເພື່ອຖ່າຍທອດໃຫ້ລູກຫລານຜູ້ເກີດໃໝ່ໃຫຍ່ລຸນໄດ້ສືບທອດລວມທັງເຜີຍແຜ່ໃຫ້ຊາວຕ່າງປະເທດໄດ້ຮັບຮູ້.

ໃນໂອກາດຢ້ຽມຢາມ ສປປ ລາວ ໃນຄັ້ງນີ້, ສະມາຄົມກ໊ອຟດັ່ງກ່າວ ຍັງໄດ້ເດີນທາງໄປມອບເງິນຈໍານວນໜຶ່ງໃຫ້ແກ່ສູນຢ້ຽມຢາມຂໍ້ມູນ-ຂ່າວສານຄົນພິການ (COPE) ແລະມອບເຄື່ອງອຸປະກອນການສຶກສາຈໍານວນໜຶ່ງໃຫ້ແກ່ນ້ອງນັກຮຽນ, ທີ່ໂຮງຮຽນປະຖົມສົມບູນ ບ້ານໂພນງາມ 2, ເມືອງໄຊທານີ, ນະຄອນຫຼວງວຽງຈັນ.
ຂ່າວ. ຂປລ ພາບ: ກົມການຂ່າວ,ກະຊວງການຕ່າງປະເທດ

แชร์