ສະຫາຍ ຄໍາພັນ ເຜີຍຍະວົງ ເດີນທາງຢ້ຽມຢາມ ແລະເຄື່ອນໄຫວວຽກຢູ່ ສສ ຫວຽດນາມ

ໂດຍຕອບສະໜອງຕາມຄໍາເຊີນຂອງ ສະຫາຍ ຫງວຽນ ຈ້ອງເຫງ້ຍ ເລຂາທິການສູນກາງພັກ ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ. ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກປະຊາຊົນ ປະຕິວັດລາວ ພ້ອມຄະນະໄດ້ເດີນທາງໄປຢ້ຽມຢາມ ແລະເຮັດວຽກຢູ່ ສສ ຫວຽດນາມ ໃນລະຫວ່າງ ວັນທີ 11 – 14 ທັນວາ 2022.

ການໄປຢ້ຽມຢາມ ສສ ຫວຽດນາມ ຂອງຄະນະຜູ້ແທນຄະນະໂຄສະນາອົບຮົມຄັ້ງນີ້ຈະມີການພົບປະປຶກສາຫາລືການຮ່ວມມືສອງຝ່າຍລະຫວ່າງຄະນະໂຄສະນາອົບສູນກາງພັກປະຊາຊົນ ປະຕິວັດລາວ ຊຶ່ງນໍາໂດຍສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກປະຊາຊົນ ປະຕິວັດລາວ ພ້ອມຄະນະ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ນໍາໂດຍສະຫາຍ ຫງວຽນຈ້ອງເຫງ້ຍ ເລຂາທິການສູນກາງພັກຫົວໜ້າຄະນະໂຄສະນາສຶກສາ ສູນກາງພັກກອມມູນິດຫວຽດນາມ. ສອງຝ່າຍຈະປຶກສາຫາລືບັນຫາສໍາຄັນຄື: 1. ການຫັນເປັນແຜນການລະອຽດການຮ່ວມມືລະຫວ່າງ ສອງຄະນະໂຄສະນາອົບຮົມໃນໄລຍະຕໍ່ໜ້າ, 2. ການຊ່ວຍເຫຼືອຂອງຄະນະໂຄສະນາສຶກສາສູນກາງພັກ ຕໍ່ກັບວຽກບັນນາທິການ ແລະ ພິມຈໍາໜ່າຍປຶ້ມປະຫວັດສາດສາຍພົວພັນລາວ-ຫວຽດນາມ, 3. ການປຶກສາຫາລືແລກປ່ຽນບົດຮຽນກ່ຽວກັບບັນຫາທີ່ຝ່າຍລາວໃຫ້ຄວາມສົນໃຈ.

ພາຍຫຼັງການພົບປະສອງຝ່າຍແລ້ວຄະນະຜູ້ແທນລາວ ຈະເຂົ້າຢຽມຂໍ່ານັບສະຫາຍ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ, ເຂົ້າຂໍ່ານັບສຸສານ ປະທານ ໂຮ່ຈິມິນ, ທັດສະນະສຶກສາພິພິທະພັນໂຮ່ຈິມິນ, ວັດເສົາດຽວ ແລະ ວັນໝຽວ, ເຂົ້າຮ່ວມພິທີສະຫຼຸບ ແລະ ມອບລາງວັນການແຂ່ງຂັນກວດສອບຊອກຮູ້ປະຫວັດສາດສາຍພົວພັນລາວ-ຫວຽດນາມ. ນອກຈາກນັ້ນ, ຈະໄປຢ້ຽມຢາມ ແລະ ເຮັດວຽກກັບສໍານັກພິມຈໍາໜ່າຍການເມືອງແຫ່ງຊາດຊຶເທິດ ເພຶ່ອແລກປ່ຽນບົດຮຽນກ່ຽວກັບວຽກພິມຈໍາໜ່າຍປຶ້ມ ແລະ ວາລະສານພັກ, ຢ້ຽມຢາມວາລະສານກົ້ງສ້ານ. ຮ່ວມເຮັດວຽກກັບກະຊວງວິທະຍາສາດ ແລະ ເຕັກໂນໂລຊີ, ຢ້ຽມຢາມ ແລະ ເຮັດວຽກກັບກຸ່ມບໍລິສັດອຸດສາຫະກໍາ ແລະການສື່ສານກອງທັບຫວຽດເທວ, ແລກປ່ຽນບົດຮຽນກັບ ໜັງສືພິມ ເຢິນເຢີນ ສຽງຂອງພັກ, ລັດ ແລະປະຊາຊົນຫວຽດນາມ.
ຂ່າວ: ສີວັນ, ພາບ: ແສງຈັນ

แชร์