ລາວຢູ່ອັນດັບ 154 ຂອງໂລກ ແລະທີ 9 ອາຊຽນເລື່ອງອຳນວຍສະດວກການຄ້າ

 ເຖິງແມ່ນວ່າຜ່ານມາໜ່ວຍງານທີ່ກ່ຽວຂ້ອງພາກລັດຈະມີຄວາມເອົາໃສ່ປັງປຸງຫຼາຍໜ້າວຽກທີ່ພົວພັນເຖິງການດຳເນີນການຄ້າເພື່ອເຮັດໃຫ້ຂັ້ນຂອດໃນການເຄື່ອນໄຫວວຽກງານສັ້ນເຂົ້າເພີ່ມຄວາມວອງໄວແຕ່ອັນດັບດ້ານການອຳນວຍຄວາມສະດວກຍັງຢູ່ລະດັບ 154 ຂອງໂລກ ແລະຢູ່ອັນດັບຂອງອາຊຽນຮອງພຽງປະເທດມຽນມາທີ່ຢູ່ອັນດັບ 10.

 ກອງປະຊຸມຄະນະກໍາມະການຊີ້ນໍາລວມອໍານວຍຄວາມສະດວກທາງດ້ານການຄ້າທົົ່ວປະເທດຄັ້ງທີ 1 ຈັດໂດຍກະຊວງອຸດສາຫະກໍາ ແລະ ການຄ້າໄດ້ໄຂຂຶ້ນໃນວັນທີ 3 ເມສາ ທີ່ນະຄອນຫຼວງວຽງຈັນພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຫົວໜ້າຄະນະກໍາມະການອໍານວຍຄວາມສະດວກທາງດ້ານການຄ້າ, ມີບັນດາທ່ານຮອງລັດຖະມົນຕີ, ຮອງເຈົ້າແຂວງ, ຮອງເຈົ້ານະຄອນ ແລະພາກສ່ວນກ່ຽວຂ້ອງເຂົ້າຮ່ວມ.

 ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະການຄ້າໄດ້ລາຍງານຄວາມຄືບໜ້າການຈັດຕັ້ງປະຕິບັດແຜນດໍາເນີນງານວຽກງານອໍານວຍຄວາມສະດວກທາງດ້ານການຄ້າຂອງ ສປປ ລາວ ປີ 2017-2022 ປະຈໍາປີ 2018 ວ່າ: ແຜນການປະຕິບັດວຽກງານອໍານວຍຄວາມສະດວກທາງ ດ້ານການຄ້າໃນປີຜ່ານມາມີທັງໝົດ 30 ກິດຈະກໍາທີ່ນອນໃນ 7 ແຜນຍຸດທະສາດໃນນັ້ນສາມາດຈັດຕັ້ງສໍາເລັດຈໍານວນ 5  ກິດຈະກໍາ, ກໍາລັງດໍາເນີນງານ  21 ກິດຈະກໍາ ແລະບໍ່ທັນລິເລີ່ມປະຕິບັດ 4 ກິດຈະກໍາຊຶ່ງປະກອບມີການປັບປຸງກົນໄກການຈັດຕັ້ງເພື່ອປະສານງານລະຫວ່າງຂະແໜງການທີ່ກ່ຽວຂ້ອງໃຫ້ມີ ປະສິດທິຜົນ 3 ກິດຈະກໍາ, ສ້າງຄວາມເຂັ້ມແຂງໃຫ້ແກ່ກົນໄກການຈັດຕັ້ງຂັ້ນທ້ອງຖິ່ນເພື່ອເພີ່ມທະວີການປະສານງານ, ການຕິດຕາມກວດກາ ແລະ ການ ຈັດຕັ້ງປະຕິບັດບັນດາມາດຕະການວຽກງານ ອຄ 2 ກິດຈະກໍາ ມາດຕະການບຸລິມະສິດເພື່ອປັບປຸງມາດຕະຖານບໍລິການສ້າງຄວາມງ່າຍດາຍຕໍ່ກັບຂັ້ນຕອນ ທີ່ດ່ານຊາຍແດນເຊັ່ນ: ການຂະຫຍາຍເວລາບໍລະການ, ກວດກາຈຸດດຽວ, ຊໍາລະເງິນບ່ອນດຽວ ແລະສ້າງລະບົບແຈ້ງພາສີປະຕູດຽວ 6 ກິດຈະກໍາ, ລົບລ້າງ ມາດຕະການທາງດ້ານການຄ້າທີ່ບໍ່ແມ່ນພາສີພາສີ (NTMs) ທີ່ບໍ່ຈໍາເປັນ 4 ກິດ ຈະກໍາ; ການເຊື່ອມໂຍງກັບພາກພື້ນ-ສາກົນ ແລະ ຮ່ວມມືກັບປະເທດທີ່ມີຊາຍແດນຕິດຈອດກັນ 3 ກິດຈະກໍາ; ການຮ່ວມມືປະສານງານກັບພາກທຸລະກິດ 3 ກິດຈະກໍາ; ການຈັດຕັ້ງປະຕິບັດສັນຍາອໍານວຍຄວາມສະດວກທາງດ້ານການຄ້າໃນຂອບອົງການການຄ້າໂລກຢ່າງເຕັມສ່ວນ 9 ກິດຈະກໍາ.

 ໃນໂອກາດດັ່ງກ່າວ ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍມາຍັງກະຊວງອຸດສາຫະກໍາ ແລະການຄ້າທີີ່ໄດ້ເອົາໃຈໃສ່ຢ່າງຕັ້ງໜ້າໃນການຈັດຕັ້ງປະຕິບັດຄໍາສັັ່ງເລກທີ 02/ນຍ ກໍຄືຕົວຊີີ້ວັດທີ 8 “ການຄ້າລະຫວ່າງປະເທດ” ທີີ່ກະຊວງເປັນຜູ້ຮັບຜິດຊອບໄດ້ເປັນຢ່າງດີ. ແຕ່ຖ້າທຽບໃສ່ການຈັດ ອັນດັບຄວາມສະດວກໃນການດໍາເນີນ ທຸລະກິດຂອງທະນາຄານໂລກໃນປີ 2019 ເຫັນວ່າ: ອັນດັບລວມຂອງ ສປປ ລາວ ຫຼຸດລົງຈາກອັນດັບ 141 ໃນປີ 2018 ມາເປັນອັນດັບທີ 154 ໃນປີ 2019 ໃນຈໍານວນ 190 ປະເທດໃນນີ້ລາວເປັນອັນດັບທີ 9 ຂອງອາຊຽນຮອງຈາກປະເທດມຽນມ້າທີ່ຢູ່ອັນດັບທີ 10. ແຕ່ຖ້າເບີ່ງສະເພາະການຈັດອັນດັບ ຕົວຊີ້ວັດ 8 “ການຄ້າລະຫວ່າງປະເທດ” ຢູ່ ສປປ ລາວ ແມ່ນໄດ້ຮັບການປັບປຸງດີ ຂຶ້ນ 48 ອັນດັບ ຈາກອັນດັບທີ 124 ໃນປີ 2018 ມາເປັນອັນດັບທີ 76 ໃນປີ 2019. ສະນັ້ນເພືີ່ອສືບຕໍໍ່ປັບປຸງ ແລະ ແກ້ໄຂບັນຫາດັ່ງກ່າວ, ທ່ານຮອງນາຍົກລັດຖະມົນຕີໄດ້ຮຽກຮ້ອງມາຍັງບັນດາທ່ານໃນຄະນະກໍາມະການຊີີ້ນໍາລວມອໍານວຍຄວາມສະດວກທາງດ້ານການຄ້າທັງສູນກາງ ແລະທ້ອງຖິ່ນຈົ່ງເອົາໃຈໃສ່ສືບຕໍໍ່ຍົກສູງຄວາມຮັບຜິດຊອບ ແລະນໍາເອົາຜົນຂອງກອງປະຊຸມໃນຄັ້ງນີີ້ໄປຈັດຕັ້ງປະຕິບັດໃຫ້ປະສົບຜົນສໍາເລັດຕາມເນືີ້ອໃນຈິດໃຈຂອງຄໍາສັ່ງເລກທີ 02/ນຍ ທີ່ກໍານົດໄວ້.

ຂ່າວ: ກິ່ງລັດຕະນາ    

แชร์