ເຈົ້າພາບຊະນະນະຄອນຫຼວງ ປະເດີມສັງວຽນມວຍສາກົນ ຮອບຄັດເລືອກ "ຊຽງຂວາງ ເກມ"

ເປີດສາກຢ່າງເປັນທາງການແລ້ວສໍາລັບການແຂ່ງຂັນກິລາມວຍສາກົນງານມະຫະກໍາກິລາແຫ່ງຊາດ ຄັງທີ 11 ຫຼື "ຊຽງຂວາງ ເກມ" ທີ່ແຂວງຊຽງຂວາງ ເປັນເຈົ້າພາບ ໃນວັນທີ 8 ທັນວາ 2022 ທີ່ສະໜາມກິລາສວນມອນ ບ້ານໂງຍ ເມືອງແປກ, ໂດຍມີ ທ່ານ ອໍາໄພວັນ ຈັນທະວົງສາ ປະທານສະຫາພັນມວຍສາກົນແຂວງຊຽງຂວາງ ພ້ອມດ້ວຍຄະນະນຳ, ຄູຝຶກ ແລະນັກກິລາມວຍແຕ່ລະພາກສ່ວນຕະຫຼອດຮອດກອງເຊຍຢ່າງຟົດຟື້ນ.

ການແຂ່ງຂັນກິລາມວຍສາກົນ ໃນງານມະຫະກໍາກິລາແຫ່ງຊາດຄັ້ງທີ 11 ມີນັກກິລາເຂົ້າຮ່ວມທັງໝົດ 11ພາກສ່ວນຄື 9 ແຂວງ ແລະ 2 ກະຊວງ ໃນນັ້ນມີແຂວງບໍ່ແກ້ວ, ຫຼວງພະບາງ, ຊຽງຂວາງ, ນະຄອນຫຼວງວຽງຈັນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ອັດຕະປື, ສາລະວັນ, ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ, ມີການແຂ່ງຂັນກັນ ທັງໝົດ 10 ຮຸ່ນ, ຍິງ 4 ຮຸ່ນ ໃນນັ້ນປະເພດຊາຍມີຮຸ່ນ 48 ກິໂລ, 51 ກິໂລ, 54 ກິໂລ, 57 ກິໂລ, 60 ກິໂລ ແລະ 64 ກິໂລ ສ່ວນມວຍຍິງ ມີຮຸ່ນ 48 ກິໂລ, 52 ກິໂລ, 57 ກິໂລ ແລະ 60 ກິໂລ.

ສໍາລັບນັດເປີດສັງວຽນມີການແຂ່ງຂັນຮອບຄັດເລືອກກັນທັງໝົດ 7 ຄູ່ ໃນນັ້ນຮຸ່ນ 48 ກິໂລຊາຍ 4 ຄູ່, ຮຸ່ນ 54 ກິໂລຊາຍ 2 ຄູ່ ແລະ ຮຸ່ນ 64 ກິໂລຊາຍ 1ຄູ່. ຜ່ານການແຂ່ງຂັນຜົນປະກົດວ່າ: ຮຸ່ນ 48 ກິໂລຊາຍ ສິດທະຈັກ ສຸກກະເສີມ ນັກມວຍເຈົ້າພາບ ສາມາດເອົາຊະນະ ນະແຟນທ້ອມ ແສງມະນີ ນັກກິລານະຄອນຫຼວງ ໄປໄດ້. ສ່ວນຜົນຄູ່ອື່ນໆ ຈັກທະວີ ສີສຸລາດ ຈາກກະຊວງປ້ອງກັນປະເທດ ຊະນະແສນ ອິນທະວົງ ຈາກບໍລິຄໍາໄຊ, ກອງມະນີ ໄຊຍະລິນ ຈາກສະຫວັນນະເຂດ ຊະນະ ສຸວັນນາ ປັນຍາພອນ ຈາກອັດຕະປື, ວັນສີ ເຮືອງທິສວນ ຈາກສາລະວັນ ຊະນະ ລຸ້ງຟ້າ ສູນໄຊສຸລິນ ຈາກຄໍາມ່ວນ. ສ່ວນຮຸ່ນ 54 ກິໂລ ຈໍາໂບ້ ຈາກບໍ່ແກ້ວ ຊະນະ ເສດຕະພົງ ວິໄລພອນ ຈາກນະຄອນຫຼວງ, ກິໂປ້ຍ ພູນວິໄລ ຈາກຫຼວງພະບາງ ຊະນະ ສົມໜຸກ ສີບຸນເຮືອງ ຈາກຄໍາມ່ວນ; ຮຸ່ນ 64 ກິໂລ ອານົງເຕີມຈະເລີນ ຈາກສາລະວັນ ຊະນະ ພານິນ ໄຊຍະແສງ ຈາກນະຄອນຫຼວງ.

ການແຂ່ງຂັນມວຍສາກົນ ຊຽງຂວາງ ເກມ ແມ່ນຈະແຂ່ງຂັນກັນ 5 ວັນ ລະຫວ່າງວັນທີ 8-12 ທັນວາ 2022.
ຂ່າວໂດຍ: ລູກນໍ້າເຊ ອິນທະດາລິນ

แชร์