ທ່ານ ນາງ ຈັນທະຈອນ ວົງໄຊ ເຂົ້າຮ່ວມກອງປະຊຸມສະມັດຊາໃຫຍ່ໂລກເພື່ອແມ່ຍິງ ປີ 2022

ເມື່ອບໍ່ດົນຜ່ານມານີ້ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງໄດ້ເຂົ້າຮ່ວມກອງປະຊຸມສະມັດຊາໃຫຍ່ໂລກເພື່ອແມ່ຍິງ ປີ 2022 (World Assembly for Women 2022) ທີ່ໂຕກຽວ ປະເທດຍີ່ປຸ່ນ, ຊຶ່ງກອງປະຊຸມດັ່ງກ່າວນີ້ໃຫ້ກຽດເຂົ້າຮ່ວມເປັນປະທານກ່າວເປີດໂດຍທ່ານ Kishida Fumio ນາຍົກລັດຖະມົນຕີຂອງປະເທດຍີ່ປຸ່ນ, ມີແມ່ຍິງຈາກພາກລັດ ແລະພາກທຸລະກິດຂອງຫຼາຍປະເທດໃນໂລກເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ໃນນາມປະທານສະມາຄົມນັກທຸລະກິດແມ່ຍິງລາວ ແລະຕາງໜ້າພາກທຸລະກິດຂອງ ສປປ ລາວ ໄດ້ຂຶ້ນເປັນຜູ້ສົນທະນາໃນວາລະຫົວຂໍ້: Gender Wag Gap ຊຶ່ງໃນນັ້ນທ່ານໄດ້ກ່າວເຖິງທີ່ຕັ້ງ ແລະສະພາບທົ່ວໄປກ່ຽວກັບເສດຖະກິດຂອງປະເທດລາວ, ເຊິ່ງແຕ່ກ່ອນເປັນປະເທດໜຶ່ງທີ່ບໍ່ມີທາງອອກສູ່ທະເລ ແລະປັດຈຸບັນ ສປປ ລາວ ໄດ້ເປີດນຳໃຊ້ທາງລົດໄຟຄວາມໄວສູງລາວ-ຈີນ ຢ່າງເປັນທາງການ,ທັງໄດ້ມີທ່າເຮືອຫວຸງອ່າງທີ່ແຂວງຮ່າຕິ໊ງຢູ່ ສສ ຫວຽດນາມ ເຊິ່ງເປັນທ່າເຮືອທາງທະເລຂອງ ສປປ ລາວ. ດັ່ງນັ້ນ ສປປ ລາວ ຈາກປະເທດທີ່ບໍ່ມີທາງອອກສູ່ທະເລໄດ້ກາຍເປັນປະເທດເຊື່ອມຈອດ ແລະມີທາງອອກສູ່ທະເລເພື່ອອຳນວຍຄວາມສະດວກໃນການຂົນສົ່ງສິນຄ້າ ແລະດຶງດູດນັກລົງທຶນຈາກພາກພື້ນນັບມື້ຫຼາຍຂຶ້ນ.

ຄຽງຄູ່ກັນນັ້ນໃນໄລຍະຜ່ານມາ ສປປ ລາວ ກໍ່ໄດ້ຮັບຜົນກະທົບຈາກການລະບາດຂອງພະຍາດ Covid-19 ແລະ ໄດ້ພົບບັນຫາຫຍູ້ງຍາກຫຼາຍດ້ານແຕ່ປັດຈຸບັນກໍ່ຄ່ອຍໆຟື້ນຟູເສດຖະກິດຄືນ. ບັນຫາທີ່ກຳລັງປະເຊີນຢູ່ກໍ່ຄືອັດຕາເງິນເຟີ້ສູງຂຶ້ນເຊິ່ງລັດຖະບານລາວກໍ່ກຳລັງປັບປຸງ ແລະແກ້ໄຂຢູ່.



ໃນເວທີສົນທະນາດັ່ງກ່າວນີ້ ທ່ານ ນາງ ຈັນທະຈອນ ວົງໄຊ ຍັງໄດ້ເນັ້ນໜັກກ່ຽວກັບບົດບາດຍິງ-ຊາຍຢູ່ ສປປ ລາວ. ອີງຕາມລັດຖະທຳມະນູນຂອງ ສປປ ລາວ ໄດ້ລະບຸວ່າ: ‘‘ພົນລະເມືອງລາວຍິງແລະຊາຍມີສິດສະເໜີພາບກັນທາງດ້ານການເມືອງ, ເສດຖະກິດ, ວັດທະນະທຳ,ສັງຄົມ ແລະຄອບຄົວ,’’ ໝາຍຄວາມວ່າລັດຖະບານໄດ້ເອົາໃຈໃສເຖິງຄວາມສະເໝີພາບດ້ານບົດບາດຍິງ-ຊາຍ ແລະສ້າງຄວາມເຂັ້ມແຂງໃຫ້ແກ່ແມ່ຍິງ. ໃນນັ້ນລັດຖະບານກໍ່ໄດ້ແກ້ໄຂຊ່ອງຫວ່າງການຈ້າງງານຂອງຍິງ ແລະຊາຍທັງໄດ້ສົ່ງເສີມໃຫ້ມີຄວາມເທົ່າທຽມກັນໃນສັງຄົມ, ຜູ້ປະກອບການກໍ່ຕ້ອງໄດ້ສົ່ງເສີມສິດທິມະນຸດເພື່ອບົດບາດຍິງ-ຊາຍ ເຊັ່ນກັນ.

แชร์