ຫຼາຍພາກສ່ວນຊຸກຍູ້ທັບນັກກິລາ ນວ ເຂົ້າຮ່ວມຊຽງຂວາງເກມ

ພິທີມອບ-ຮັບການສະໜັບສະໜູນ ໃຫ້ແກ່ທັບນັກກິລານະຄອນຫຼວງວຽງຈັນ (ນວ) ເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ 11 ຫຼື "ຊຽງຂວາງ ເກມ" ໄດ້ຈັດຂຶ້ນວັນທີ 9 ທັນວາ 2022 ຢູ່ຫ້ອງວ່າການນະຄອນຫຼວງວຽງຈັນ, ໂດຍກ່າວມອບຂອງທ່ານ ທອງພັດ ລາດຊະວົງ ຕາງໜ້າຄະນະຄຸ້ມຄອງດ່ານສາກົນມິດຕະພາບ ລາວ-ໄທ 1, ທ່ານ ສີສຸພົນ ສີຫາລາດ ຜູ້ອໍານວຍການກຸ່ມບໍລິສັດ ດາວເຮືອງ ຈໍາກັດ, ທ່ານ ຈັນທິດາ ອຸ່ນມີໄຊ ຮອງຜູ້ອໍານວຍການບໍລິສັດ ກຣິດຕິພົງ ກຣຸບ ຈໍາກັດ ແລະ ກ່າວຮັບແມ່ນ ທ່ານ ພູວົງ ວົງຄໍາຊາວ ຮອງເຈົ້າຄອງ ນວ ທັງເປັນຫົວໜ້າຄະນະຮັບຜິດຊອບຄະນະທັບນັກກີລາ ນວ ເຂົ້າຮ່ວມ ຊຽງຂວາງ ເກມ, ມີຄະນະຮັບຜິດຊອບ ພາກສ່ວນກ່ຽວຂ້ອງເຂົ້າຮ່ວມ.

ສໍາລັບເງິນທີ່ນໍາມາມອບຄັ້ງນີ້ປະກອບມີ: ຄະນະຄຸ້ມຄອງດ່ານສາກົນມິດຕະພາບ ລາວ-ໄທ 1 (ທີ່ໄດ້ຮັບການລະດົມ ຈາກດ່ານສາກົນຂົວມິດຕະພາບ ລາວ-ໄທ 1 ດ່ານທ່າບົກທ່ານາແລ້ງ ແລະ ດ່ານພາສີ ປະຈໍາ ນວ) ຈໍານວນ 100 ລ້ານກີບ, ກຸ່ມບໍລິສັດ ດາວເຮືອງ ຈໍາກັດ ແລະ ຮ້ານອາຫານຟູຈິວາລະ ຈໍານວນ 60 ລ້ານກີບ ແລະ ບໍລິສັດ ກຣິດຕິພົງ ກຣຸບ ຈໍານວນ 50 ລ້ານກີບ ໃນນີ້ ສະເພາະຄະນະຄຸ້ມຄອງດ່ານສາກົນມິດຕະພາບ ລາວ-ໄທ 1 ແມ່ນໄດ້ມອບເງິນຈໍານວນດັ່ງກ່າວ ໃຫ້ສະຫະພັນກິລາລອຍນໍ້າ ນວ ທີ່ສ້າງຜົນງານໄດ້ຢ່າງໂດດເດັ່ນດ້ວຍການຍາດມາໄດ້ 4 ຫຼຽນຄໍາ, 8 ຫຼຽນເງິນ ແລະ 6 ຫຼຽນທອງ ໂດຍການມອບຂອງທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະກິລາ ນວ ຮອງຫົວໜ້າຄະນະຮັບຜິດຊອບຄະນະທັບນັກກີລາ ນວ ເຂົ້າຮ່ວມ ຊຽງຂວາງ ເກມ ແລະ ກ່າວຮັບແມ່ນທ່ານ ຊິນນະກອນ ພົມມະສິດ ປະທານສະຫະພັນກີລາລອຍນໍ້າ ນວ ພ້ອມດ້ວຍຄະນະ.

ໂອກາດນີ້, ທ່ານ ພູວົງ ວົງຄໍາຊາວ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ກັບຜູ້ປະກອບການທຸລະກິດທຸກພາກສ່ວນທີ່ຍາມໃດເພິ່ນກໍໄດ້ໃຫ້ການປະກອບສ່ວນສະໜັບສະໜູນອູ້ມຊູທັບນັກກິລາ ນວ ມາໂດຍຕະຫຼອດ ແລະໃຫ້ເຊື່ອໝັ້ນວ່າຈະນໍາໃຊ້ເງິນຈໍານວນດັ່ງກ່າວ ໃຫ້ເກີດປະໂຫຍດສູງສຸດເພື່ອສ້າງຜົນງານໃຫ້ກັບທັບນັກກິລາ ນວ ຍາດເອົາໄຊຊະນະມາສູ່ປະຊາຊົນຊາວ ນວ.
ຂ່າວ: ສີພອນ ຈັນທະດາລາ

แชร์