ສປ ຈີນ-ອາຣັບບີ ຊາອຸດິດ ເພີ່ມການພົວພັນຄູ່ຮ່ວມຍຸດທະສາດຮອບດ້ານ

ຕາມຂ່າວຈາກ ວິທະຍຸ ສາກົນ ແຫ່ງ ສປ ຈີນ,ໃນວັນທີ 8 ທັນວານີ້, ທ່ານ ສີ ຈິ້ນຜິງ, ປະທານ ປະເທດ ສປ ຈີນ ໄດ້ພົບປະກັບ ກະສັດ ຊາມານ ບິນ ອັບດຸນ ອາຊິສ ອັນຊາດ ແຫ່ງ ອາຣັບບີ ຊາອຸດິດ ຢູ່ຜາສາດ ຣີຢັດ. ໃນໂອກາດນີ້ ທ່ານ ສີ ຈິ້ນຜິງ ໄດ້ກ່າວວ່າ: ການຮ່ວມມື ລະຫວ່າງ ສປ ຈີນ ກັບ ອາຣັບບີ ຊາອຸດິດ ມີອະນາຄົດທີ່ກວ້າງຂວາງ. ສປ ຈີນ ຖືອາຣັບບີ ຊາອຸດິດ ເປັນກຳລັງສຳຄັນໃນໂລກທີ່ກ້າວໄປສູ່ຫລາຍຂົ້ວ, ໃຫ້ຄວາມສຳຄັນ ເປັນຢ່າງສູງ ໃນການຂະຫຍາຍການພົວພັນຄູ່ຮ່ວມ ຍຸດທະສາດຮອບດ້ານກັບ ອາຣັບບີ ຊາອຸດິດ. ຂະນະທີ່ ສປ ຈີນ ຍິນດີຮ່ວມກັບ ອາຣັບບີ ຊາອຸດິດ ສືບຕໍ່ເພີ່ມທະວີການແລກປ່ຽນດ້ານຍຸດທະສາດ,ລົງເລິກການ ຮ່ວມມື ໃນຂົງເຂດຕ່າງໆ, ຮັບໃຊ້ຜົນປະໂຫຍດ ແຫ່ງການພັດທະນາຂອງສອງປະເທດ, ປົກປັກຮັກສາ ສັນຕິພາບ ແລະ ສະຖຽນ ລະພາບ ຂອງໂລກ.ກະສັດຊາມານ ກ່າວວ່າ: ໃນຊຸມປີ ມໍ່ໆມານີ້, ອາຣັບບີ ຊາອຸດິດ ກັບ ສປ ຈີນ ມີຄວາມຄືບໜ້າທີ່ດີງາມໃນການເຊື່ອມຕໍ່ຍຸດທະສາດຂອງສອງປະເທດ ແລະການຮ່ວມມືໃນຂົງເຂດຕ່າງໆ, ສອງຝ່າຍ ມີຄວາມເຫັນ ທີ່ ເປັນເອກະພາບກັນ ທີ່ສຳຄັນ ໃນຫລາຍບັນຫາ ແລະ ໃຫ້ຄວາມສຳຄັນ ໃນ ລະດັບສູງ ຕໍ່ການພັດທະນາ ການພົວ ພັນກັບ ສປ ຈີນ, ຍິນດີ ຮ່ວມກັບ ທ່ານ ສີ ຈິ້ນຜິງ, ສຸມຄວາມ ພະຍາຍາມ ເຂົ້າໃນການຊຸກຍູ້ ໃຫ້ການພົວພັນ ຄູ່ຮ່ວມ ຍຸດທະສາດ ຮອບດ້ານ ອາຣັບບີ ຊາອຸດິດ - ສປ ຈີນ ພັດທະນາ ກ້າວໄປ ຂ້າງໜ້າ ຢ່າງບໍ່ຢຸດຢັ້ງ, ສ້າງຄວາມສຸກ ໃຫ້ແກ່ ປະຊາຊົນ ທີ່ມີໄມ ຕີຈິດ ມິດຕະພາບ ຂອງສອງຊາດ, ສິ່ງເຫລົ່ານີ້ ຈະມີຜົນດີ ຕໍ່ການບັນລຸ ສັນຕິພາບ, ສະຖຽນ ລະພາບ ແລະ ຄວາມສະຫງົບ ຂອງພາກພື້ນ ກໍຄືຂອງໂລກ. ປະມຸກລັດ ທັງສອງປະເທດໄດ້ລົງລາມໃນ “ສັນຍາການພົວພັນຄູ່ຮ່ວມ ຍຸດທະສາດ ຮອບດ້ານ ລະຫວ່າງ ສປ ຈີນ ກັບ ລາຊະອານາຈັກ ອາຣັບບີ ຊາອຸດິດ” ແລະ ເຫັນດີວ່າ: ສອງປີໃດ ຈະຜັດປ່ຽນກັນ ຈັດການ ພົບປະກັນ ລະຫວ່າງ ປະມຸກລັດ ເທື່ອໜຶ່ງຢູ່ສອງປະເທດ.

ສຳນັກ ຂ່າວສານ ແຫ່ງຊາດຂອງ ອາຣັບບີ ຊາອຸດິດ(SPA) ລາຍງານຕື່ມວ່າ: ສປ ຈີນ ແລະອາຣັບບີຊາອຸດິດໄດ້ລົງນາມໃນບົດບັນທຶກຊ່ວຍຈຳທັງໝົດ 34 ສະບັບກ່ຽວຂ້ອງກັບພະລັງງານສີຂຽວ,ເຕັກໂນໂລຊີ ຂໍ້ມູນຂ່າວສານ, ການຄົມມະນາຄົມ, ການກໍ່ສ້າງ, ແລະ ອີກຫລາຍຂໍ້ຕົກລົງຮ່ວມກັນຄິດເປັນມູນຄ່າ ທັງໝົດ 30 ຕື້ໂດລາສະຫະລັດ.
ຮຽບຮຽງ ຂ່າວໂດຍ: ຂປລ. ສະໄຫວ ລາດປາກດີ

แชร์