11 ເດືອນ ປກສ ທົ່ວປະເທດສາມາດມ້າງຄະດີຢາເສບຕິດ 4.707 ຄະດີ ຢຶດຢາບ້າໄດ້ 139.060 ເມັດ

ໃນໄລຍະ 11 ເດືອນ 2022 ຜ່ານມາ, ກະຊວງປ້ອງກັນຄວາມສະຫງົບ ສາມາດແກ້ໄຂຄະດີຢາເສບຕິດໃນຂອບເຂດທົ່ວປະເທດໄດ້ທັງໝົດ 4.707 ຄະດີ, ຈັບຜູ້ຖືກຫາໄດ້ 6.873 ຄົນ, ຍິງ 795 ຄົນ, ເປັນຄົນຕ່າງປະເທດ 135 ຄົນ, ຍິງ 11 ຄົນ.

ທ່ານ ພົອ ວິໄລ ຫລ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງ ປ້ອງກັນຄວາມສະຫງົບ ລາຍງານໃນກອງປະຊຸມ ໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 8 ທັນວາ 2022 ນີ້ ໂດຍມີບາງຕອນ ໃຫ້ຮູ້ວ່າ: ການແກ້ໄຂບັນຫາຢາເສບຕິດ ໃນ 11 ເດືອນຜ່ານມາ ບັນຫາຢາເສບຕິດ ເກີດຂຶ້ນມີລັກສະນະຕໍ່ເນື່ອງ-ຮຸນແຮງ, ພວກເຂົາເຄື່ອນໄຫວເປັນກຸ່ມແກ້ງ, ມີເຄືອຂ່າຍເຊື່ອມໂຍງກັບພາຍໃນ ແລະຕ່າງປະເທດ, ນໍາໃຊ້ອາວຸດເສິກ, ພາຫະນະ, ອຸປະກອນເຄື່ອງມືທີ່ທັນສະໄໝສາມາດຕອບໂຕ້ກັບເຈົ້າໜ້າທີ່, ແຕ່ເຖິງຢ່າງໃດກໍຕາມກຳລັງປ້ອງກັນຄວາມສະຫງົບຂັ້ນສູນກາງ ແລະທ້ອງຖິ່ນໄດ້ເປັນເຈົ້າການຍົກສູງຄວາມຮັບຜິດຊອບຂອງຕົນເຂົ້າໃນການເຄື່ອນໄຫວຕາມຫລັກການ ແລະ ວິທີການວິຊາສະເພາະ ເປັນຕົ້ນແມ່ນຕິດ ຕາມເປົ້າໝາຍທີ່ເຄື່ອນໄຫວຄ້າຂາຍ, ຂົນສົ່ງຢາເສບຕິດ ເຊິ່ງໃນໄລຍະເດືອນມັງກອນ ຫາ ເດືອນພະຈິກ 2022 ໃນຂອບເຂດທົ່ວປະເທດ ສາມາດແກ້ໄຂບັນຫາຢາເສບຕິ ພ້ອມທັງດຳເນີນຄະດີດັບຜູ້ກະທຳຜິດໄດ້ເປັນຢ່າງດີ.

ພ້ອມນັ້ນ, ຍັງສາມາດຢຶດຢາບ້າໄດ້ 139.587.060 ເມັດ, ຢາບ້າເປັນຝຸ່ນ 7,52 ກິໂລກຣາມ, ນໍ້າໜັກລວມ 13.966,22 ກິໂລຣາມ, ຢາໄອສ໌ 2.199,9 ກິໂລກຣາມ, ເຮໂຣອິນ 175,77 ກິໂລກຣາມ, ດັນຊາ 10.284,27 ກິໂລກຣາມ, ຢາຝິ່ນ 250,36 ກິໂລກຣາມ, ຢາອີ 2.605 ເມັດ, ໂຄເຄນ 3 ກິໂລກຣາມ, ແປ້ງຝຸ່ນປະສົມຢາເສບຕິດ 11.576,76 ກິໂລກຣາມ, ເຄຕາມິນ 1.930,28 ກິໂລກຣາມ, ຄາເຟອິນ 168 ກຣາມ, ນໍ້າຢາສານເຄມີ 849 ກຣາມ ແລະ ນໍ້າກົດ 9.400 ລິດ, ຢຶດລົດໃຫຍ່ໄດ້ 162 ຄັນ, ລົດ ຈັກ 734 ຄັນ, ເຮືອ 01 ລຳ.
ຂ່າວ: ຂປລ. ທະນູທອງ ພາບ: ອ່າຍຄຳ

แชร์