ເທດສະການຮູບເງົາດີເດັ່ນລາວ-ຈີນ 2022 ເປີດສາຍຮອບປະຖົມມະເລີກ

ໃນວັນທີ 7 ທັນວານີ້, ເທດສະການເດີນສາຍຮູບເງົາດີເດັ່ນລາວ-ຈີນປະຈຳປີ 2022 ຮອບປະຖົມມະເລີກທີ່ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ແລະສະຖານທູດສປຈີນປະຈຳ ສປປ ລາວ, ກົມຮູບເງົາແລະວິທະຍຸໂທລະພາບສູນກາງຈີນ(CMG) ປະຈໍາລາວຮ່ວມກັນເປີດເທດສະການຮູບເງົາດີເດັ່ນລາວ-ຈີນ 2022 ຮອບປະຖົມມະເລີກທີ່ຫໍວັດທະນະທໍາແຫ່ງຊາດໃຫ້ກຽດເຂົ້າຮ່ວມມີ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ, ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ), ທ່ານ ແສງອາລຸນ ທີ່ປຶກສາສະຖານທູດ ສປ ຈີນ ປະຈໍາ ສປປ ລາວ, ທ່ານ ພົນຕີ ຄໍາຫຼ້າ ພັນໄຊຍະສຸກ ຜູ້ອໍານວຍການວິທະຍາຄານປ້ອງກັນຊາດໄກສອນພົມວິຫານ, ທ່ານ ພົນຈັດຕະວາ ພູມີ ດາລາເພັດ ຮອງຫົວໜ້າກົມໃຫຍ່ການເມືອງກອງທັບກະຊວງປ້ອງກັນປະເທດ, ບັນດານາຍທະຫານ-ຕໍາຫຼວດ ພ້ອມດ້ວຍພາກສ່ວນທີ່ກ່ຽວຂ້ອງລາວ-ຈີນ ເຂົ້າຮ່ວມ.

ໂອກາດນີ້ ທ່ານ ໂພສີ ແກ້ວມະນີວົງ ໄດ້ຕີລາຄາຕໍ່ກິດຈະກໍາການເດີນສາຍຮູບເງົາວ່າ: ເທດສະການສາຍຮູບເງົາດີເດັ່ນລາວ-ຈີນກໍເປັນກິດຈະກຳທີ່ດີນີ້ກໍເປັນຄັ້ງທີ 5 ທີ່ຂ້າພະເຈົ້າໄດ້ເຂົ້າຮ່ວມ, ຄັ້ງນີ້ກໍຖືວ່າເປັນຄັ້ງທີ່ມີຄວາມໝາຍທີ່ສຸດທີ່ຈະສືບຕໍ່ສາຍຮູບເງົາໃຫ້ປະຊາຊົນໃນແຂວງຕ່າງໆຂອງປະເທດລາວໄດ້ຊົມໄດ້ເບິ່ງກ່ຽວກັບຮີດຄອງປະເພນີ, ວັດທະນະທຳຂອງລາວ ແລະຈີນ, ທັງໄດ້ສະແດງໃຫ້ເຫັນເຖິງຊີວິດການເປັນຢູ່ຂອງປະຊາຊົນສອງຊາດລາວ-ຈີນ, ສ້າງຄວາມສໍານຶກ ແລະຄວາມຮູ້ສຶກໃຫ້ແກ່ປະຊາຊົນທີ່ຢູ່ໃນຮູບເງົາບໍ່ວ່າຈະເປັນເລື່ອງກ່ຽວກັບການໃຊ້ຊີວິດ, ການຕໍ່ສູ້ເຊິ່ງມັນຈະສະແດງໃຫ້ເຫັນເຖິງຊີວິດການເປັນຢູ່ຂອງປະຊາຊົນ ແລະປະຊາຊົນຈະໄດ້ປ່ຽນແປງວິຖີຊີວິດຂອງເຂົາເຈົ້າໃຫ້ດີຂຶ້ນໄປເລື້ອຍໆ.

ທ່ານ ພົນຈັດຕະວາ ຄໍາແພງ ພູມມາແກ້ວຫົວໜ້າກົມເສນາຮັກກະຊວງປ້ອງກັນປະເທດກໍ່ໄດ້ເຂົ້າຮ່ວມຮັບຊົມຮູບເງົາຄັ້ງນີ້ ແລະ ສະແດງຄວາມຮູ້ສຶກຂອງຕົນວ່າ: ຮູບເງົາເລື່ອງນີ້ມັນສະທ້ອນເຖິງເລືອດນັກຮົບປະຕິວັດກອງທັບປະຊາຊົນຈີນກໍຄືກອງທັບປະຊາຊົນລາວຜ່ານການຕໍ່ສູ້ກູ້ຊາດເພື່ອປົກປັກຮັກສາປະເທດຊາດກໍຄືປົກປັກຮັກສາດ້ວຍກຽດສັກສີຂອງປະເທດຊາດເຫັນໄດ້ວ່າເລືອດນັກຮົບປະຕິວັດຈີນກໍຄືນັກຮົບປະຕິວັດລາວລ້ວນແລ້ວແຕ່ເປັນນັກຮົບປະຕິວັດທີ່ຍອມເສຍສະຫຼະຊີວິດ, ເສຍສະຫຼະເລືອດເນື້ອເພື່ອປະເທດຊາດເພື່ອປະຊາຊົນແລະຜືນແຜ່ນດິນອັນແສນຮັກຂອງຄົນເພື່ອລູກຫຼານ.

ເທດສະການເດີນສາຍຮູບເງົາດີເດ່ນລາວ-ຈີນປີ 2022 ນີ້ ນອກຈາກສາຍຢູ່ນະຄອນຫຼວງວຽງຈັນແລ້ວ, ເລີ່ມແຕ່ວັນທີ 13 ທັນວາ ຫາວັນທີ 2 ມັງກອນປີ 2023 ຍັງຈະໄປເດີນສາຍຢູ່ແຂວງຊຽງຂວາງ, ອຸດົມໄຊ, ຫຼວງນໍ້າທາ, ບໍ່ແກ້ວ, ໄຊຍະບູລີ, ຫຼວງພະບາງ, ຫົວພັນ ແລະຈຳປາສັກ.ຮູບເງົາທີ່ຈະສາຍໃນປີນີ້ປະກອບມີ4ເລື່ອງຄື “ຂ້າມແມ່ນໍ້າຢ່າລູ້ໄປ” “ໃຜວ່າເງິນເປັນພະເຈົ້າ”, “ທິມສັດກູ້ໄພ” ແລະ“ຊີວິດທີ່ສວຍງາມ” ເຊິ່ງມີທັງຟິມສົງຄາມ, ມີກະຕູນ, ມີທັງເລົ່າເຖິງເລື່ອງພະນັກງານລົງຊ່ວຍຮາກຖານຫຼຸດພົ້ນຄວາມທຸກຍາກ, ທັງມີເລື່ອງທີ່ສາມາດຮັບຮູ້ເຖິງວິທີການດຳລົງຊີວິດ ແລະຮີດຄອງປະເພນີໃນເຂດຊີ່ນຈ່ຽງ.

แชร์