ລັດຖະບານກຳລັງທົດລອງຫັນ 5 ຫົວໜ່ວຍວິຊາການ ກຸ້ມຕົນເອງດ້ານງົບປະມານ

ປັດຈຸບັນລັດຖະບານກຳລັງເຮັດທົດລອງຫັນ 5 ຫົວໜ່ວຍວິຊາການປະກອບມີມະຫາວິທະຍາໄລແຫ່ງຊາດ, ວິທະຍາໄລປາກປາສັກ, ໂຮງໝໍມະໂຫສົດ, ໂຮງໝໍມິດຕະພາບ ແລະ ໂຮງໝໍເສດຖາທິລາດ ໄປກຸ້ມຕົນເອງດ້ານງົບປະມານ ແຕ່ເພື່ອເຮັດໃຫ້ມີປະສິດທິພາບນັ້ນ ຕ້ອງຫັນຢ່າງຮອບດ້ານ.

ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນໄດ້ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ວັນທີ 7 ທັນວາ 2022 ວ່າ: ພາຍຫຼັງທີ່ລັດຖະບານໄດ້ອອກມະຕິວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງຜັນຂະຫຍາຍມະຕິຂອງສະພາແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ສະບັບເລກທີ 07/ລບ, ລົງວັນທີ 4 ຕຸລາ 2021, ກະຊວງພາຍໃນ ໄດ້ຄົ້ນຄວ້າ ແລະປະສານສົມທົບກັບກະຊວງການເງິນ, ກະຊວງສຶກສາທິການ ແລະ ກິລາ ແລະ ກະຊວງສາທາລະນະສຸກ ເພື່ອເກັບກຳນິຕິກຳ ແລະ ຂໍ້ມູນຕ່າງໆກ່ຽວກັບການເຮັດທົດລອງຫັນຫົວໜ່ວຍບໍລິຫານວິຊາການໄປກຸ້ມຕົນເອງດ້ານງົບປະມານຈຳນວນ 5 ຫົວໜ່ວຍ ຂອງ 2 ກະຊວງຄື: ກະຊວງສຶກສາທິການ ແລະ ກິລາ ມີ 2 ຫົວໜ່ວຍ: (1) ມະຫາວິທະຍາໄລແຫ່ງຊາດ, (2) ວິທະຍາໄລເຕັກນິກປາກປາສັກ; ກະຊວງສາທາລະນະສຸກມີ 3 ຫົວໜ່ວຍ: (1) ໂຮງໝໍມະໂຫສົດ, (2) ໂຮງໝໍມິດຕະພາບ, (3) ໂຮງໝໍເສດຖາທິລາດ ທີ່ກະຊວງການເງິນ ໄດ້ນໍາສະເໜີຕໍ່ລັດຖະບານໃນການເຮັດທົດລອງ ແລະ ຈັດຕັ້ງປະຕິບັດໃນເດືອນພຶດສະພາ ປີ 2021 ຜ່ານມາ; ໄດ້ຄົ້ນຄວ້າ ແລະ ສະເໜີທ່ານນາຍົກລັດຖະມົນຕີ ແຕ່ງຕັ້ງຄະນະຮັບຜິດຊອບຫັນຫົວໜ່ວຍວິຊາການກຸ້ມຕົນເອງທາງດ້ານງົບປະມານ ເທື່ອລະກ້າວ ເພື່ອເຮັດໜ້າທີ່ໃນການຊີ້ນຳ, ປະສານງານ ແລະ ແນະນຳ ບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນ ດໍາເນີນການຄົ້ນຄວ້າຫັນຫົວໜ່ວຍວິຊາການທີ່ມີລາຍຮັບຂອງຕົນໄປກຸ້ມຕົນເອງດ້ານງົບປະມານເທື່ອລະກ້າວ; ໄດ້ຄົ້ນຄວ້າແຕ່ງຕັ້ງຄະນະຮັບຜິດຊອບ ສ້າງຮ່າງດຳລັດວ່າດ້ວຍການຫັນຫົວໜ່ວຍວິຊາການກຸ້ມຕົນເອງທາງດ້ານງົບປະມານ ແລະ ຮ່າງດຳລັດວ່າດ້ວຍການຄຸ້ມຄອງພາລະກອນຊຶ່ງປະກອບມີບັນດາກະຊວງ, ອົງການທີ່ກ່ຽວຂ້ອງປະກອບເຂົ້າໃນຄະນະ.

ທ່ານ ທອງຈັນ ມະນີໄຊ ກ່າວຕື່ມວ່າ: ເພື່ອຮັບປະກັນໃຫ້ການຫັນຫົວໜ່ວຍວິຊາການ ໄປສູ່ການຄຸ້ມຄອງເປັນເຈົ້າຕົນເອງ ມີປະສິດທິພາບ, ປະສິດທິຜົນນັ້ນ ຕ້ອງຫັນຮອບດ້ານ ບໍ່ຫັນສະເພາະແຕ່ດ້ານງົບປະມານ-ການເງິນ ແຕ່ຕ້ອງຫັນດ້ານການປະຕິບັດໜ້າທີ່ວຽກງານ, ດ້ານກົງຈັກການຈັດຕັ້ງ ແລະ ດ້ານບຸກຄະລາກອນ; ກະຊວງພາຍໃນ ຈຶ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງ ຄົ້ນຄວ້າຮ່າງຂໍ້ຕົກລົງຂອງທ່ານນາຍົກລັດຖະມົນຕີ ວ່າດ້ວຍການເຮັດທົດລອງຫັນຫົວໜ່ວຍວິຊາການ ທີ່ມີລາຍຮັບໄປສູ່ການຄຸ້ມຄອງເປັນເຈົ້າຕົນເອງ (ປັດຈຸບັນ, ກຳລັງຂໍຄຳເຫັນເປັນເອກະພາບຈາກກົມກ່ຽວຂ້ອງຂອງກະຊວງການເງິນ ກ່ອນນຳສະເໜີທ່ານນາຍົກລັດຖະມົນຕີພິຈາລະນາອະນຸມັດ). ເພື່ອໃຫ້ມີນິຕິກຳ.

ເປັນບ່ອນອີງໃນການປະຕິບັດ. ປັດຈຸບັນ, ກະຊວງພາຍໃນກໍຄືຄະນະຮັບຜິດຊອບໄດ້ຄົ້ນຄວ້າສ້າງຮ່າງດຳລັດວ່າດ້ວຍການຫັນຫົວໜ່ວຍວິຊາການກຸ້ມຕົນເອງທາງດ້ານງົບປະມານ ແລະ ດໍາລັດວ່າດ້ວຍການຄຸ້ມຄອງພະລາກອນໄດ້ສຳເລັດໂດຍພື້ນຖານດ້ານໂຄງຮ່າງ ແລະ ເນື້ອໃນຂອງຮ່າງດໍາລັດທັງສອງສະບັບດັ່ງກ່າວ ແລະກໍາລັງດຳເນີນການທາບທາມຄໍາຄິດເຫັນຕາມຂັ້ນຕອນຂອງການສ້າງນິຕິກຳຊຶ່ງຕາມແຜນການແມ່ນຈະໃຫ້ສຳເລັດແລະນຳສະເໜີລັດຖະບານພິຈາລະນາໃນຕົ້ນປີ 2023 ນີ້.
ຂ່າວ-ພາບ: ສຸກສະຫວັນ

แชร์