ຊຽງຂວາງ ຄອງເຈົ້າຫຼຽນຄຳ ກິລາຍິງທະນູ ງານກິລາແຫ່ງຊາດ ຄັ້ງທີ 11

ການແຂ່ງຂັນກິລາຍິງທະນູ ໃນງານມະຫະກໍາກິລາແຫ່ງຊາດ ຄັ້ງທີ 11 ຫຼືຊຽງຂວາງເກມ ໄດ້ດໍາເນີນການແຂ່ງຂັນເປັນທາງການໃນວັນທີ 2-6 ທັນວາ 2022 ທີ່ສະໜາມກິລາໄຊຊະນະ ບ້ານໂພນມີໄຊ ເມືອງແປກ, ໃນນັ້ນມີນັກກິລາຈາກ 7 ພາກສ່ວນເຂົ້າຮ່ວມແຂ່ງຂັນຄື: ແຂວງຊຽງຂວາງ ເຈົ້າພາບ, ແຂວງໄຊສົມບູນ, ແຂວງຄຳມ່ວນ, ແຂວງຫຼວງນໍ້າທາ, ແຂວງສະຫັວນນະເຂດ, ກະຊວງ ປ້ອງກັນຄວາມສະຫງົບ ແລະນະຄອນຫຼວງວຽງຈັນ, ຊຶ່ງມີການຊີງຫຼຽນລາງວັນທັງໝົດຈຳນວນ 30 ຫຼຽນຄື: 10 ຫຼຽນຄໍາ, 10 ຫຼຽນເງິນ ແລະ 10 ຫຼຽນທອງ, ໃນນັ້ນໄດ້ແບ່ງອອກເປັນ 2 ປະເພດລາຍການແຂ່ງຂັນຄື: ທະນູຄັນໂຄ້ງ ແລະທະນູທົດກໍລັງ ຊາຍ-ຍິງ, ຊຶ່ງຄັນທະນູໂຄ້ງ 30 ແມັດ ມີ: ຮອບຄະແນນລວມ ຍິງ-ຊາຍ 2 ຫຼຽນຄຳ; ດ່ຽວ ຍິງ-ຊາຍ 2 ຫຼຽນຄຳ ແລະ ຄູ່ປະສົມ 1 ຫຼຽນຄຳ, ສ່ວນຄັນທະນູທົດກຳລັງ 50 ແມັດ ມີ: ຮອບຄະແນນລວມ ຍິງ-ຊາຍ 2 ຫຼຽນຄໍາ, ດ່ຽວ ຍິງ-ຊາຍ 2 ຫຼຽນຄຳ ແລະ ຄູ່ປະສົມ 1 ຫຼຽນຄຳ.

ຜົນການແຂ່ງຂັນປາກົດວ່າ: ຊຽງຂວາງ ເຈົ້າພາບ ໄດ້ອັນດັບ 1 ຫຼຽນລາງວັນຄື: ໄດ້ 2 ຫຼຽນຄໍາ ແລະ 4 ຫຼຽນເງິນ ລວມທັງໝົດ 6 ຫຼຽນ, ອັນດັບທີ 2 ນະຄອນຫຼວງວຽງຈັນ ຍາດໄດ້ 2 ຫຼຽນຄໍາ, 2 ຫຼຽນເງິນ ແລະ 2 ຫຼຽນທອງ ລວມ 6 ຫຼຽນ, ອັນດັບທີ 3 ແຂວງສະຫວັນນະເຂດ ຍາດໄດ້ 2 ຫຼຽນຄໍາ ແລະ 3 ຫຼຽນທອງ ລວມ 5 ຫຼຽນ, ອັນດັບທີ 4 ແຂວງໄຊສົມບູນ ຍາດໄດ້ 2 ຫຼຽນຄໍາ ແລະ 2 ຫຼຽນເງິນ ລວມ 4 ຫຼຽນ, ອັນດັບທີ 5 ແຂວງຄໍາມ່ວນ ຍາດໄດ້ 1 ຫຼຽນຄໍາ, 2 ຫຼຽນເງິນ ແລະ 2 ຫຼຽນທອງ ລວມ 5 ຫຼຽນ, ອັນດັບທີ 6 ກະຊວງປ້ອງກັນຄວາມສະຫງົບ ຍາດໄດ້ 1 ຫຼຽນຄໍາ, 2 ຫຼຽນທອງ ລວມ 3 ຫຼຽນ ແລະ ອັນດັບທີ 7 ແຂວງຫຼວງນໍ້າທາຍາດໄດ້ 1 ຫຼຽນທອງ.

ບັນຍາກາດການແຂ່ງຂັນເຕັມໄປດ້ວຍຄວາມສະໜຸກສະໜານ ແລະສ້າງຄວາມປະທັບໃຈໃຫ້ແກ່ຜູ້ຊົມຜູ້ເຊຍເປັນຢ່າງດີສ່ວນພິທີເປີດງານມະຫະກໍາກິລາແຫ່ງຊາດຄັ້ງທີ 11 ເປັນທາງການຈະຈັດຂຶ້ນໃນວັນທີ 13 ທັນວາ 2022 ທີ່ສະໜາມກິລາໄຫຫີນ (ສະໜາມເປີດ-ປິດ ຄັງໜອງຫຼວງ) ແລະຍັງມີອີກຫຼາຍໆປະເພດກິລາທີ່ຈະດໍາເນີນການແຂ່ງຂັນຈົນຮອດວັນທີ 22 ທັນວາ 2022 ຈຶ່ງສໍາເລັດ, ສະນັ້ນຈຶ່ງຂໍເຊີນຊວນພີ່ນ້ອງຊາວຊຽງຂວາງທຸກທົ່ວໜ້າກໍຄືຊາວລາວທົ່ວປະເທດ ແລະ ຊາວຕ່າງປະເທດ, ເຂົ້າມາຮ່ວມຊົມຮ່ວມເຊຍ ແລະໃຫ້ກໍາລັງໃຈແກ່ທັບນັກກິລາທຸກພາກສ່ວນໄດ້, ທຸກສະໜາມການແຂ່ງຂັນລວມທັງພິທີເປີດ-ປິດງານມະຫະກໍາກິລາແຫ່ງຊາດ ຄັ້ງທີ 11, ທ່ານສາມາດເຂົ້າຊົມໂດຍບໍ່ໄດ້ເສຍຄ່າ (ຊົມຟຣີ).
ຂ່າວ: ຄານສີສະຫວັນ

แชร์