ພະຣາຊາ ອັງຣີ ແຫ່ງ ຣາຊະອານາຈັກ ລຸກຊໍາບວກສືບຕໍ່ຢ້ຽມຢາມໂຄງການຊ່ວຍເຫລືອ ຢູ່ແຂວງວຽງຈັນ

ໃນວັນທີ 7 ທັນວາ 2022 ສົມເດັດ ພະຣາຊາ ອັງຣີ ແຫ່ງ ຣາຊະອານາຈັກ ລຸກຊໍາບວກ ແລະຄະນະໄດ້ສືບຕໍ່ເຄື່ອນໄຫວຢ້ຽມຢາມບັນດາໂຄງການຊ່ວຍເຫຼືອຂອງລຸກຊໍາບວກ ຢູ່ແຂວງວຽງຈັນ, ໂດຍໄດ້ເລີ່ມຕົ້ນຢ້ຽມຢາມໂຮງໝໍແຂວງວຽງຈັນ ຫຼືໂຮງໝໍມາເຣຍເຕເຣຊາ (Maria-Teresa) ຢູ່ເມືອງວຽງຄໍາໂດຍການຮັບຕ້ອນຈາກ ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ ພ້ອມດ້ວຍການນໍາແຂວງ ແລະພະນັກງານແພດໝໍຈໍານວນໜຶ່ງ.

ໃນໂອກາດດັ່ງກ່າວ, ສົມເດັດ ພະຣາຊາ ອັງຣີ ໄດ້ຮັບຟັງການລາຍງານຫຍໍ້ ກ່ຽວກັບ ສະພາບໂດຍລວມ, ການໃຫ້ບໍລິການໃນໄລຍະຜ່ານມາ ແລະ ແຜນການພັດທະນາໂຮງໝໍໃນອະນາຄົດ, ພ້ອມທັງຢ້ຽມຊົມຫ້ອງປະຕິບັດ ການຕ່າງໆ ແລະ ຢ້ຽມຢາມຄົນເຈັບຢູ່ໂຮງໝໍດັ່ງກ່າວ, ໂຮງໝໍແຫ່ງນີ້ ໄດ້ຮັບການສະໜັບສະໜູນການກໍ່ສ້າງຈາກລັດ ຖະບານ ລຸກຊໍາບວກ ໃນປີ 1998 ໂດຍໄດ້ເປີດໃຫ້ບໍລິການ ໃນປີ 2000 ແລະ ໄດ້ຈັດພິທີເປີດນຳໃຊ້ຢ່າງເປັນທາງ ການ ໃນປີ 2003 ໃນໂອກາດການເດີນທາງຢ້ຽມຢາມ ສປປ ລາວ ຂອງ ສົມເດັດ ພະຣາຊິນີ ມາເຣຍ ເຕເຣຊາ ແຫ່ງ ຣາຊະອານາຈັກ ລຸກຊໍາບວກ ແລະ ໄດ້ໃສ່ຊື່ໂຮງໝໍຫລັງດັ່ງກ່າວ ໃນນາມຊື່ຂອງ ສົມເດັດ ພະຣາຊິນີ ເພື່ອເປັນສັນຍາ ລັກແຫ່ງການຊ່ວຍເຫຼືອ.

ຈາກນັ້ນ, ກໍໄດ້ໄປຢ້ຽມຢາມໂຮງຮຽນພະຍາບານສາດ ເຕັກນິກແຂວງວຽງຈັນ ໂດຍໄດ້ຢ້ຽມຊົມບັນດາຫ້ອງຮຽນ, ເບິ່ງການສິດສອນ ແລະ ຫ້ອງພາກສະແດງ, ພ້ອມທັງໄດ້ໃຫ້ກຽດປູກຕົ້ນໄມ້ ທີ່ເດີ່ນດ້ານໜ້າຂອງໂຮງ ຮຽນ ເພື່ອເປັນອານຸສອນໃຫ້ແກ່ໂຮງຮຽນດັ່ງກ່າວ. ຕໍ່ມາ, ກໍໄດ້ເດີນທາງໄປຢ້ຽມຢາມໂຮງແຮມ ແລະ ຮ້ານອາຫານ ຝຶກປະຕິບັດ ເດີ ອະຄາເດມີ້ ຢູ່ເມືອງວັງວຽງ ຊຶ່ງເປັນສູນ ແລະ ທັງເປັນບ່ອນຝຶກອົບຮົມທັກສະດ້ານການບໍລິຫານ ໂຮງແຮມ, ການເຮັດອາຫານ ແລະການສ້າງຂີດຄວາມສາມາດດ້ານພາສາຕ່າງປະເທດໃນການບໍລິການ ແລະ ການຕ້ອນຮັບຕ່າງໆໃຫ້ແກ່ນັກທ່ອງທຽວ ພາຍໃຕ້ໂຄງການຝຶກທັກສະດ້ານການທ່ອງທ່ຽວ (ໂຄງການ ລາວ/029). ໂຮງແຮມ ແລະ ຮ້ານອາຫານ ຝຶກປະຕິບັດນີ້ ແມ່ນເປັນບ່ອນຝຶກວິຊາຊີບທີ່ມີປະສິພາບ ແລະ ປະສິດທິຜົນເປັນ ຢ່າງດີ.

ແຂວງວຽງຈັນ ເປັນແຂວງໜຶ່ງທີ່ນອນຢູ່ໃນຫລາຍໂຄງການຊ່ວຍເຫລືອເພື່ອການພັດທະນາຂອງລຸກຊໍາບວກເປັນຕົ້ນໂຄງການສະໜັບສະໜູນຂະແໜງສາທາລະນະສຸກ (ໂຄງການ ລາວ/027) ທີ່ໄດ້ໃຫ້ທຶນຊ່ວຍເຫຼືອ ປິ່ນປົວຜູ້ທຸກຍາກ ໂດຍບໍ່ໄດ້ເສຍຄ່າ ພາຍໃຕ້ກອງທຶນສຸຂະພາບ ສໍາລັບຜູ້ທຸກຍາກ (ກສທ) ຢູ່ແຂວງວຽງຈັນ, ຊຶ່ງໃນໄລຍະທີ 1 (2014-2016) ມີມູນຄ່າ 114.700 ໂດລາສະຫະລັດ ຫຼື ປະມານ 922 ລ້ານກີບ ແລະ ໄລຍະທີ 2 (2017-2017) ມີມູນຄ່າ 1.5 ຕື້ກວ່າກີບ; ໃນນັ້ນ, ຝ່າຍລາວໄດ້ສົມທົບທຶນ 20% ເພື່ອຊ່ວຍຄົນເຈັບ ທຸກຍາກອານາຖາ ລວມທັງແມ່ຍິງ ແລະ ເດັກນ້ອຍ ທີ່ມີອາຍຸຕໍ່າກວ່າ 5 ປີ ຢູ່ແຂວງວຽງຈັນ. ໂຄງການດັ່ງກ່າວຍັງໃຫ້ການຊ່ວຍເຫຼືອທາງດ້ານວຽກງານສະຖິຕິແບບອອນລາຍ, ວຽກງານປະກັນສຸຂະພາບ ແລະດ້ານບໍລິການ. ນອກຈາກນັ້ນ, ຍັງມີໂຄງການພັດທະນາທ້ອງຖິ່ນ (ໂຄງການ ລາວ/030) ທີ່ຊ່ວຍສ້າງຄວາມເຂັ້ມແຂງໃຫ້ແກ່ຂົງເຂດການປົກຄອງ, ການພັດທະນາຊົນນະບົດ ແລະການເຂົ້າເຖິງພື້ນຖານໂຄງລ່າງ.
ພາບ: ຂປລ. ອ່າຍຄຳ

แชร์