ລາວສົ່ງໝາກກ້ວຍໄປ ສປ ຈີນ 500 ໂຕນ ຜ່ານຂະບວນລົດໄຟຖ້ຽວປະຖົມມະລືກ

ເພື່ອຈັດຕັ້ງປະຕິບັດແຜນດຳເນີນງານໃນການຈັດຕັ້ງຜັນຂະຫຍາຍວາລະແຫ່ງຊາດກ່ຽວກັບການແກ້ໄຂຄວາມທຸກຍາກດ້ານເສດຖະກິດການເງິນ 2021-2023 ແລະ ເພື່ອຫັນເອົາການຄ້າຊາຍແດນເຂົ້າສູ່ການຄ້າສາກົນບົນພື້ນຖານການຈັດຕັ້ງອະນຸສັນຍາກ່ຽວກັບຂໍ້ກຳນົດເງື່ອນໄຂດ້ານສຸຂານາໄມພືດສໍາລັບການສົ່ງອອກພືດ ແລະ ຜະລິດຕະພັນພືດໄປ ສປ ຈີນ.

ໃນວັນທີ 5 ທັນວາ ຜ່ານມາ, ກົມປູກຝັງກະຊວງກະສິກໍາ ແລະປ່າໄມ້ ໄດ້ຮ່ວມກັບບໍລິສັດຊວນເຢລາວຈໍາກັດ ຈັດພິທີເປີດຂະບວນລົດໄຟຖ້ຽວປະຖົມມະລືກສົ່ງອອກໝາກກ້ວຍຈາກ ສປປ ລາວ ໄປ ສປ ຈີນ ເປັນກຽດເຂົ້າຮ່ວມພິທີໃນຄັ້ງນີ້ມີ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະປ່າໄມ້, ທ່ານ ບຸນເຖິງ ດວງສະຫວັນ ຮອງລັດຖະມົນ ກະຊວງອຸດສາຫະກໍາ ແລະ ການຄ້າ, ທ່ານ ນາງ ລໍາພອຍ ສີອັກຄະຈັນ ຮອງປະທານສະພາປະຊາຊົນນະຄອນຫຼວງວຽງຈັນ, ທ່ານ ຫານເຢ້ ຜູ້ຮັບຜິດຊອບຊົ່ວຄາວຂອງຫ້ອງການເສດຖະກິດການຄ້າສະຖານທູດ ສປ ຈີນ, ຫົວໜ້າ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ກປ ແຂວງ, ປະທານບໍລິສັດຊວນເຢ, ນັກທຸລະກິດຜູ້ປະກອບການດ້ານກະສິກໍາຢູ່ສູນກາງ ແລະທ້ອງຖິ່ນເຂົ້າຮ່ວມ.

ໂອກາດນີ້ ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ ໄດ້ກ່າວວ່າ: ກົມປູກຝັງໄດ້ສຸມໃສ່ 2 ວຽກຈຸດສຸມຄືຊຸກຍູ້ສົ່ງເສີມການຜະລິດກະສິກໍາເພື່ອທົດແທນການນໍາເຂົ້າ ທັງຫຼຸດຜ່ອນການໄຫຼອອກເງິນຕາໄປຕ່າງປະເທດ ແລະ ສຸມໃສ່ການຊຸກຍູ້ການຜະລິດກະສິກໍາຕິດພັນກັບການປຸງແຕ່ງເປັນສິນຄ້າເພື່ອສົ່ງອອກໄປຕ່າງປະເທດນໍາເອົາເງິນຕາເຂົ້າມາໃຫ້ຫຼາຍຂຶ້ນ ຜ່ານມາການຊຸກຍູ້ການເຈລະຈາເປີດຕະຫຼາດເພື່ອສົ່ງອອກພືດ ແລະ ຜະລິດຕະພັນພືດນັບມື້ນັບຂະຫຍາຍຕົວ ນັບແຕ່ປີ 2012 ເປັນຕົ້ນມາ ໄດ້ສໍາເລັດການລົງນາມອະນຸສັນຍາສອງຝ່າຍ ລາວ-ຈີນ ຮ່ວມກັນ ທັງໝົດ 15 ພືດ ໃນ 10 ອະນຸສັນຍາ, ສໍາລັບໝາກກ້ວຍ ໄດ້ລົງນາມຮ່ວມກັນໃນຂໍ້ກໍານົດເງື່ອນໄຂດ້ານສຸຂານາໄມພືດ ກ່ຽວກັບການສົ່ງອອກໝາກກ້ວຍໃນປີ 2013 ໂດຍຜ່ານມາແມ່ນຜ່ານທາງລົດຜ່ານດ່ານສາກົນບໍ່ເຕ່ນບໍຫານ, ການເປີດຂະບວນລົດໄຟຖ້ຽວປະຖົມມະລືກສົ່ງອອກໝາກກ້ວຍຈາກ ສປປ ລາວ ໄປ ສປ ຈີນ ແມ່ນມີຄວາມໝາຍຄວາມສໍາຄັນຍິ່ງເປັນໂອກາດທີ່ເປີດຊ່ອງໃຫ້ສາມາດສ້າງມູນຄ່າການຄ້າຂອງທັງສອງປະເທດ, ການດຶງດູດການລົງທຶນເພື່ອກ້າວຜ່ານອຸປະສັກຈາກໂຄວິດ-19 ແລະ ຮອງຮັບຜົນສໍາເລັດຂອງການກໍ່ສ້າງທາງລົດໄຟລາວ-ຈີນ ຊຶ່ງຈະຊ່ວຍຫຼຸດຕົ້ນທຶນ ແລະ ສາມາດແຂ່ງຂັນກັບສິນຄ້າຂອງປະເທດ ແລະສາກົນໄດ້.

ອີງຕາມບົດບັນທຶນຄວາມເຂົ້າໃຈການຮ່ວມສ້າງໂຄງການໜຶ່ງທາງສອງເຂດໄດ້ລົງນາມເຊັນໃນວັນທີ 26 ສິງຫາ 2022 ລະຫວ່າງກະຊວງກະສິກໍາ ແລະ ປ່າໄມ້ ແລະ ອົງການປົກຄອງປະຊາຊົນແຂວງຫູໜານ ສປ ຈີນ ລະບຸວ່າແຂວງຫູໜານ ຈະຈັດຊື້ຜະລິດຕະພັນກະສິກໍາຈາກລາວ 1 ລ້ານໂຕນຕໍ່ປີ ຊຶ່ງບໍລິສັດຊວນເຢ ລາວຈໍາກັດ ໄດ້ຖືກມອບໝາຍໃຫ້ເປັນຜູ້ຮັບຜິດຊອບການຜະລິດ, ເກັບຊື້ ແລະ ສົ່ງອອກຜະລິດຕະພັນ, ການສົ່ງອອກໝາກກ້ວຍຈາກ ສປປ ລາວ ຜ່ານທາງລົດໄຟລາວ-ຈີນ ໄປຍັງ ສປ ຈີນ ໃນຂະບວນລົດໄຟຂົນສົ່ງຄັ້ງປະຖົມມະລືກດັ່ງກ່າວນີ້ແມ່ນມີຈໍານວນຂົນສົ່ງ 25 ຕູ້ຄອນເທເນີດ້ວຍລະບົບເຢັນ, ໄດ້ບັນຈຸໝາກກ້ວຍ 500 ໂຕນ ໂດຍເດີນທາງຂ້າມພູເຂົາ ແລະ ແມ່ນໍ້າຂອງ ໄປສູ່ເມືອງຊາງຊາ ແຂວງຫູໜານ ສປ ຈີນ ຊຶ່ງເປັນຂະບວນລົດໄຟຂົນສົ່ງຜະລິດຕະພັນກະສິກໍາ ແຫ່ງທໍາອິດ ພາຍຫຼັງໄດ້ເຊັນບົດບັນທຶກຮ່ວມກັນສ້າງໂຄງການ ໜຶ່ງທາງ ສອງເຂດ ໂດຍພາຍຫຼັງພິທີເປີດການຂົນສົ່ງແມ່ນຈະມີການສືບຕໍ່ສົ່ງອອກໝາກກ້ວຍທີ່ມີຄຸນນະພາບສູງ ແລະ ຜະລິດຕະພັນກະສິກໍາອື່ນໆຈາກລາວໄປແຂວງຫູໜານ ສປ ຈີນ ໂດຍຜ່ານທາງລົດໄຟລາວ-ຈີນໃນອາທິດໜຶ່ງບໍ່ຫຼຸດ 2 ຂະບວນ.

ທ່ານ ສຸຍ ໂກ້ວ ຫວູ ປະທານບໍລິສັດຊວນເຢ ໄດ້ກ່າວຕື່ມວ່າທາງບໍລິສັດພວກເຮົາກໍາລັງພະຍາຍາມເຕັມສ່ວນໃນການກໍ່ສ້າງເຂດພັດທະນາອຸດສາຫະກໍາ-ກະສິກໍາທັນສະໄໝ ນະຄອນຫຼວງວຽງຈັນ, ໂດຍຮ່ວມກັນກໍ່ສ້າງຂອງບໍລິສັດຊວນເຢ ແລະ ເອວິດ AVIC ສາກົນ ປັກກິ່ງຈໍາກັດຮ່ວມກັບກະຊວງກະສິກໍາ ແລະປ່າໄມ້ແຫ່ງ ສປປ ລາວ ຈຸດປະສົງເພື່ອສ້າງຕ່ອງໂສ້ ອຸດສາຫະກໍາຮອບດ້ານຂອງການສົ່ງອອກຜະລິດຕະພັນກະສິກໍາລາວທີ່ເລີ່ມຈາກການປັບປຸງພັນ, ການປູກ, ການປຸງແຕ່ງ, ການເກັບມ້ຽນ, ການຂົນສົ່ງຈົນຮອດການຄ້າຂາຍ, ໃນຖານະເປັນໂຄງການສະໜັບສະໜູນຂອງທາງລົດໄຟລາວ-ຈີນ ຕັ້ງແຕ່ເລີ່ມຕົ້ນການອອກແບບ ແລະຄັດເລືອກ ສະຖານທີ່ໂຄງການເຂດນີ້ຕັ້ງຢູ່ໃກ້ສະຖານີລົດໄຟນະຄອນຫຼວງວຽງຈັນ ມີເນື້ອທີ່ 66 ເຮັກຕາ, ມີແຜນກໍ່ສ້າງສາງເກັບຮັກສາສະບຽງອາຫານໃນລະດັບ 200.000 ໂຕນ ຊຶ່ງຈະກາຍເປັນສາງເກັບສະບຽງອາຫານຂ້າມຊາດແຫ່ງທໍາອິດໂດຍຜ່ານເສັ້ນໄຟລາວພາຍໃຕ້ຂໍ້ລິເລີ່ມ ໜຶ່ງເລວ ໜຶ່ງເສັ້ນທາງ ຄາດຄະເນຮອດປີ 2025, ເຂດດັ່ງກ່າວຈະບັນລຸເປົ້າໝາຍສົ່ງອອກຜະລິດຕະພັນກະສິກໍາລາວໃນຈໍານວນ 3 ລ້ານ ໂຕນຕໍ່ປີໄປຈີນ ສ້າງມູນຄ່າການສົ່ງອອກຫຼາຍກວ່າ 4 ຕື້ໂດລາຕໍ່ປີ ແລະ ຊ່ວຍໃຫ້ຊາວກະສິກອນລາວຫຼຸດພົ້ນອອກຈາກຄວາມທຸກຍາກ.
(ຂໍ້ມູນຈາກ: ຂ່າວສານກະສິກຳ, ປ່າໄມ້ ແລະ ພັດທະນາຊົນນະບົດ)

แชร์